Eg viser til brev av 26. mai 1999 frå næringskomiteen
med førespurnad om å stadfeste opplysningar gjevne
i høyring i komiteen i dag.
1. At Stortinget sine føresetnader
om ein heilskapleg plan for utvikling av eit IT- og kompetansesenter
blir lagt til grunn for val av privat aktør som det skal
forhandlast vidare med for utvikling av IT- og kunnskapssenteret
på Fornebu?
Ja, som eg nemnde i komiteen har samtlege av
dei mest aktuelle tilboda ein heilskapleg plan. Eg kan stadfeste
at det ikkje er aktuelt å plukke ut delar av ulike tilbod.
2. At Stortinget sine føresetnader
om bruken av Terminalbygget blir lagt til grunn?
Ja, eg kan stadfeste at Terminalbygget vil bli
brukt som ein del av IT- og kunnskapssenteret i samsvar med Stortinget
sine føresetnader.
3. At interessent som opererer
med eit totalkonsept med eit areal på ca. 500 da ikke er
utelukka fordi samla plan for arealbruk går ut over dei
270 da regjeringa har lagt til grunn.
Ja, eg kan stadfeste dette, og viser til Nærings-
og handelsdepartementet sine krav og retningsliner av 8. april 1999
der det mellom anna går fram at tilbydar "kan eventuelt
foreslå og begrunne et større eller mindre areal
for eit IT- og kunnskapssenter" enn 270 da. Eg gjer for ordens skuld
merksam på at dette ikkje inneber at staten tek på seg
plikt til å skaffe det overskytande arealet, heller ikkje
at staten pliktar å ta på seg medansvar for utvikling
av eigedomar med andre formål enn det som inngår
i eit IT- og kunnskapssenter.
4. At det vil vere tryggast,
for å unngå krav om melding til ESA, at ein går
vidare med til dømes 3 aktørar i forhandlingar
etter 1. juni 1999 som Stortinget har sett som frist for val av
aktør.
Ja. I evalueringa har det skilt seg ut fleire
tilbod som er kvalifiserte. Det er i og for seg mogleg å velje
ut ein aktør innan fristen 1. juni 1999. Men ut frå omsynet
til forsvarleg sakshandsaming vil den beste løysinga truleg
vere å gå vidare i forhandlingar med fleire aktørar etter
1. juni.
Det er samtidig rett at ein slik framgangsmåte
også skapar ein ryddigare prosess, og at ein på den
måten gjer det mindre sannsynleg at notifikasjon til ESA
blir nødvendig.