1.1 Bakgrunn

I proposisjonen viser Utanriksdepartementet til at EØS-komiteen sitt vedtak nr. 70/1999 av 2. juni 1998 gjeld innlemming i EØS-avtala av verksemda til EU med omsyn til analyse, forsking og samarbeid på sysselsetjings- og arbeidsmarknadsområdet (1998-2000). Programmet vart skipa ved avgjerd i Rådet 23. februar 1998 (rådsvedtak nr. 98/171/EF). EØS-komiteen sitt vedtak og rådsvedtaket følgjer som trykte vedlegg i norsk versjon til proposisjonen.

1.2 Nærare om programmet

Verksemda til EU med omsyn til analyse, forsking og samarbeid på sysselsetjings- og arbeidsmarknadsområdet skal medverke til å byggje opp under sysselsetjingsstrategien til EU. I rådsvedtaket om verksemda heiter det i art. 5 at ho er open for deltaking for EFTA/EØS-landa og dei nye søkjarlanda. Informasjonen som vert generert gjennom verksemda skal mellom anna evaluere sysselsetjings- og arbeidsmarknadspolitikken for å gje innspel til diskusjonen om sysselsetjingspolitikken blant deltakarlanda og Kommisjonen.

Under den første aktiviteten, overvaking og analyse av arbeidsmarknaden og sysselsetjingspolitikken, vil ein utvikle samanliknbar statistikk og indikatorar for arbeidsmarknaden. Vidare vil ein gjennomføre studiar på område som har tilknyting til arbeidsmarknadspolitikken for å få kunnskap om kva for faktorar som verkar inn på tilbod og etterspørsel av arbeidskraft, studiar relatert til sysselsetjingspolitikken, og dessutan effektstudiar for å få betre kunnskap om verknader av politikken innan sysselsetjingsområdet.

Under identifikasjon og overføring av beste praksis skal ein styrkje arbeidet for å synleggjere gode døme på arbeidsmarknadspolitikkområdet og korleis desse kan gjennomførast for å nå måla for arbeidsmarknadspolitikken. Innanfor denne aktiviteten vil ein sjå spesielt på røynsler med arbeidsmarknadstiltak innenfor miljøvernsektoren og kultursektoren, og korleis røynslene kan overførast til andre land. Det skal skipast til samarbeid med ILO og OECD for å styrkje feltet og unngå dobbeltarbeid.

Den siste aktiviteten, spreiing av kunnskap, omfattar finansiering av nasjonale og internasjonale seminarar, og av publikasjonar for å spreie resultata av dei aktivitetane som vert finansierte under programmet.

Det er skipa ein rådgjevande programkomité under leiing av Kommisjonen, som handsamar dei årlege aktivitetane under programmet.

1.3 Økonomiske og administrative konsekvensar

EØS-komiteen sitt vedtak vil medføre ei plikt for EFTA-landa til å delta i finansieringa av programmet. Av den finansielle ramme på 8,55 mill. euro for perioden 1998-2000 vil EFTA-landa sin del utgjere 167 580 euro. For Noreg vil deltaking i verksemda innebere ein total kostnad på om lag 1,4 mill. NOK, av dette om lag 80 000 NOK for 1999. Det vert teke atterhald om at kostnadene kan variere frå år til år ut frå den ramma som EU-parlamentet årleg stiller til disposisjon, og i høve til den aktiviteten som vert sett i gang.

Deltakinga i verksemda vil innebere halvårleg møtedeltaking i programkomiteen. Ein vil oppmode norske forskingsmiljø til å delta i anbod om utlyste forskings- og utgreiingsoppdrag.

Deltakinga i verksemda får ikkje nemnande administrative konsekvensar.

1.4 Konklusjon og tilråding

Arbeids- og administrasjonsdepartementet meiner at verksemda til EU med omsyn til analyse, forsking og samarbeid på sysselsetjings- og arbeidsmarknadsområdet kan gje viktige bidrag til forskinga om sysselsetjing og arbeidsløyse, og samanheng mellom arbeidsmarknaden og andre politikkområde. Delar av dette vil dessutan vere samanliknande forsking mellom land som kan gje oss utvida perspektiv i høve til forsking og analyse der ein berre ser på norske tilhøve. Utanriksdepartementet sluttar seg til dette.