I denne proposisjonen blir Stortinget bedt om å samtykkje
til godkjenning av EØS-komiteen sitt vedtak nr. 43/1999
av 26. mars 1999 om endring av vedlegg XVIII i EØS-avtala
(Helse og sikkerhet på arbeidsplassen, arbeidsrett og lik
behandling av kvinner og menn).
EØS-komiteen sitt vedtak nr. 43/1999
av 26. mars 1999 gjeld innlemming av rådsdirektiv 97/80/EF
av 15. desember 1997 om provtyngsla i samband med ulik handsaming
av kvinner og menn på grunnlag av kjønn, og rådsdirektiv
98/52/EF av 13. juli 1998 om utviding av direktiv
97/80/EF til å omfatte Det sameinte kongerike
Storbritannia og Nord-Irland.
Direktivet om provtyngsla i samband med skilnadshandsaming
på grunnlag av kjønn har til føremål å sikre
ei effektiv gjennomføring av prinsippet om lik handsaming
av kvinner og menn.
Direktivet vart vedteke av EU 15. desember 1997. Fristen
for gjennomføring i nasjonal lovgjeving er 1. januar 2001.
For Noregs vedkommande medfører innlemminga av
rådsdirektiv 97/80/EF og 98/52/EF
visse endringar i likestillingslova. Vedtaket i EØS-komiteen
av 26. mars 1999 om å innlemme direktiva i EØS-avtala,
blei for Noregs vedkommande difor gjort med atterhald om Stortingets
samtykke.
Rådsdirektiv 97/80/EF
om provtyngsle krev at medlemsstatane innfører rettsreglar
om delt provtyngsle. Desse reglane skal nyttast i saker der personar
meiner at dei har lidd urett fordi prinsippet om lik handsaming ikkje
har blitt handheva i deira tilfelle. Delt provtyngsle inneber at
om ein person (klagaren) meiner at han/ho er blitt utsett
for skilnadshandsaming, må vedkommande som skal ha handsama
ulikt (den innklaga), prove at skilnadshandsaminga ikkje har si årsak
i kjønn. Om den innklaga ikkje maktar dette, skal domstolen
leggje til grunn at ei eventuell påvist skilnadshandsaming
har si årsak i kjønn.
Direktivet om provtyngsle uttrykkjer visse minimumskrav.
Det hindrar ikkje medlemsstatane i å innføre reglar
om provtyngsle som er gunstigare for klagaren enn reglane i direktivet.
Direktivet krev at reglane om delt provtyngsle
gjeld i alle sivile saker eller forvaltingssaker som følgje
av klage over tilhøve som er omfatta av direktivet.
Rådsdirektiv 98/52/EF
gjeld utviding av førnemnde rådsdirektiv 97/80/EF
om provtyngsle i samband med skilnadshandsaming på grunnlag
av kjønn, til å omfatte Det sameinte kongerike
Storbritannia og Nord-Irland.
Kravet om delt provtyngsle gjeld tilhøve
som fell inn under saksområdet i artikkel 119 i traktaten
og følgjande rådsdirektiv:
– rådsdirektiv
75/117/EØF av 10. februar 1975 om tilnærming
av medlemsstatenes lovgivning om gjennomføring av prinsippet
om lik lønn til mannlige og kvinnelige arbeidstakere
– rådsdirektiv 76/207/EØF
av 9. februar 1976 om gjennomføring av prinsippet om lik
behandling av menn og kvinner når det gjelder adgang til
arbeid, yrkesutdanning og forfremmelse samt arbeidsvilkår
og dessutan følgjande direktiv så langt
dei gjeld skilnadshandsaming på grunnlag av kjønn:
– rådsdirektiv
92/85/EØF av 19. oktober 1992 om iverksetting
av tiltak som forbedrer helse og sikkerhet på arbeidsplassen
for gravide arbeidstakere og arbeidstakere som nylig har født
eller ammer
– rådsdirektiv 96/34/EF
av 3. juni 1996 om rammeavtalen om foreldrepermisjon inngått
mellom UNICE, CEEP og EFF
Rådsdirektiv 75/117/EØF,
76/207/EØF og 92/85/EØF
er omfatta av EØS-avtala. Vidare vedtok EØS-komiteen
den 26. mars 1999 at rådsdirektiv 96/34/EF av
3. juni 1996 skal innlemmast i EØS-avtala.
Direktivet er langt på veg dekt av
reglane om delt provtyngsle i likestillingslova §§ 4,
5 og 6. Desse reglane gjeld lik handsaming av kvinner og menn ved tilsetjing/oppseiing
m.v., fastsetjing av løn og i visse høve utdanning.
Dessutan inneheld arbeidsmiljølova reglar om omvendt provtyngsle
for saker om oppseiing av arbeidstakarar som er gravide eller i
fødselspermisjon.
Men direktivet krev òg nasjonale reglar
om provtyngsle for saker om skilnadshandsaming i høve til andre
arbeidsvilkår enn dei som er dekte av dei førnemnde
paragrafane. Dette gjeld til dømes tilhøve som fordeling
av arbeidsoppgåver, arbeidstid, omplassering m.v.
Forbod mot skilnadshandsaming i slike saker
kan utgreiast av likestillingslova § 3, den såkalla
generalklausulen. Men lova inneheld ikkje reglar om delt provtyngsle
i saker som skal handsamast etter § 3, sjølv om
eit slik krav kan utgreiast av forvaltingspraksis (praksis hos Likestillingsombodet
og Klagenemnda for likestilling). Av omsyn til ei effektiv gjennomføring
av EØS-regelverket i norsk rett, bør likevel rekkjevidda av
reglane om provtyngsle gå klart fram av skriven lov. På bakgrunn
av dette bør likestillingslova endrast når rådsdirektiv
97/80/EF og 98/52/EF vert innlemma
i EØS-avtala.
Barne- og familiedepartementet vil fremje ein
odelstingsproposisjon om dei endringane i likestillingslova som
er naudsynte som følgje av vedtaket i EØS-komiteen.
Proposisjonen vil òg ta føre seg en rekkje andre framlegg
til endringar i likestillingslova, og skal etter planen fremjast
for Stortinget i sesjonen 1999-2000.
Som nemnd vil ei lovendring innebere ei kodifisering
av allereie gjeldande rett, slik han er forma gjennom forvaltingspraksis.
Gjennomføringa av EØS-komiteen
sitt vedtak vil difor vere utan økonomiske og administrative
konsekvensar både for det offentlege og det private.
Etter Barne- og familiedepartementets syn vil
direktivet ikkje endre den norske rettstilstanden på området, men
det vil gje eit høve til å omformulere og klargjere den
norske lovgjevinga på området. Vedtakinga av direktivet
kan òg ha ein viss opplysande verknad. Utanriksdepartementet
sluttar seg til dette.
Komiteen sitt fleirtal, medlemene
frå Arbeidarpartiet, Kristeleg Folkeparti, Høgre,
Senterpartiet og Sosialistisk Venstreparti, har ingen merknader
til proposisjonen.
Fremskrittspartiets medlemmer viser
til vedtak nr. 43/1999 av 26. mars 1999 om endring av vedlegg
XVIII i EØS-avtalen (Helse og sikkerhet på arbeidsplassen,
arbeidsrett og lik behandling av kvinner og menn).
Disse medlemmer mener disse endringer
allerede er ivaretatt i nasjonal lovgivning. Disse medlemmer ser
det derfor ikke nødvendig at Norge samtykker til godkjenning
av EØS-komiteens vedtak.
Komiteen sitt utkast til innstilling blei 23.
november 1999 sendt til utanrikskomiteen for merknader. I brev av
1. desember 1999 frå utanrikskomiteen heiter det:
«Utenrikskomiteen, unntatt medlemmene fra Fremskrittspartiet,
viser til flertallets merknader i utkastet. Fremskrittspartiets
medlemmer viser til mindretallets merknader. Utenrikskomiteen slutter
seg til utkastet til innstilling på dette grunnlaget.»
Komiteen har elles
ingen merknader, syner til proposisjonen og rår Stortinget
til å gjere slikt
vedtak:
Stortinget samtykkjer til godkjenning av EØS-komitéavgjerd
nr. 43/1999 av 26. mars 1999 om endring av vedlegg XVIII
i EØS-avtala (Helse og sikkerhet på arbeidsplassen,
arbeidsrett og lik behandling av kvinner og menn), jf. St.prp. nr.
79 (1998-1999).
Oslo, i familie-, kultur- og administrasjonskomiteen, den 2. desember 1999
Ågot Valle
fung. leiar og ordførar |
Grethe G. Fossum
sekretær |