Meldinga om Den kulturelle skulesekken er utarbeidd
på bakgrunn av vedtak i Stortinget i samband med handsaminga
av St.prp. nr. 1 (2002-2003).
Bakgrunnen for Stortingets vedtak er Besl. O.
nr. 52 (2001-2002), jf. Innst. O. nr. 44 (2001-2002) frå familie-,
kultur- og administrasjonskomiteen om lov om endring i lov av 28.
august 1992 nr. 103 om pengespel.
Meldinga omhandlar bakgrunnen for og verdiar
og målsetjingar med Den kulturelle skulesekken. Meldinga
gjev eit oversyn over dei utfordringane som både kultur-
og skulesektoren står overfor ved iverksetjinga og utviklinga
av tiltaket. Ho gjev eit bilete av nokre av dei modellane for Den
kulturelle skulesekken som er innførte i kommunar og fylke,
og eit oversyn over korleis dei tilgjengelege ressursane over statsbudsjettet
for Den kulturelle skulesekken er fordelte i perioden 2001-2003.
Avslutningsvis gjev meldinga eit oversyn over korleis avsetninga
av spelemidlar til skulesekken er fordelt i 2003, og kva planar
ein har for utviklinga av tiltaket i åra som kjem.
Utdannings- og forskingsdepartementet legg samstundes
fram ei eiga stortingsmelding om kunst og kultur i og i tilknyting
til grunnskulen (St.meld. nr. 39 (2002-2003)). Meldinga set kultur
og kulturopplevingar i grunnskulen inn i ein brei samanheng.
Dei to meldingane skal utfylle kvarandre og
gje eit best mogleg bilete av kultursektoren og utdanningssektoren
sine utgangspunkt i den vidare utviklinga av Den kulturelle skulesekken
på landsbasis, i den enkelte skule og kulturinstitusjon.
Kulturmeldinga (St.meld. nr. 48 (2002-2003))
vil vere eit viktig grunnlag for utviklinga av norsk kulturpolitikk
det neste tiåret. Ei implementering og utvikling av Den
kulturelle skulesekken i åra framover kan såleis
ikkje sjåast lausrive frå utviklingstrekk og rammevilkår
i den overordna nasjonale kulturpolitikken. Prinsipielle drøftingar
som også vil ha innverknad for Den kulturelle skulesekken,
vert difor ikkje tekne opp i denne meldinga, men sett inn i ein større
samanheng i kulturmeldinga.
Frå og med 2003 og i åra framover
vil det bli øyremerkt spelemidlar til profesjonell kulturformidling
til born i grunnskulen og eit utvida samarbeid mellom skule og kultur
gjennom Den kulturelle skulesekken. Midlane vil bli fordelte i kgl.
res. kvart år etter at rekneskapen for Norsk Tipping er
godkjend. I 2003 er avsetninga til Den kulturelle skulesekken 60
mill. kroner. Gjennom ein opptrappingsperiode vil denne summen kunne
auke til om lag 120 mill. kroner i 2004 og 180 mill. kroner i 2005.
Den kulturelle skulesekken er ei viktig kulturpolitisk satsing,
som har som sitt fremste mål å gje born i grunnskulen
ein kulturell kapital og ein kulturell kompetanse som vil gjere
dei betre i stand til å møte utfordringane i samfunnet.
Kunnskap om og forståing for kunst og kultur er viktig
og grunnleggjande kunnskap som det er viktig at born og unge får
med seg.
Utviklinga av Den kulturelle skulesekken i åra
framover vil måtte innebere at skulane og kommunane må tenkje
gjennom kva kunst og kultur kan og skal ha å seie for den
enkelte elev i grunnskulen, og korleis ein ynskjer å integrere
kunst- og kulturressursar i skulekvardagen. Det inneber også at
kultursida må arbeide målretta med korleis ein
best kan formidle kunst og kultur til elevar i grunnskulen, og korleis
ein best mogleg kan skape forståing og glede ved den profesjonelle
kunsten hos born og unge. I ei slik satsing vil det vere svært
viktig å utvikle møteplassar og nettverk for eit
utvida samarbeid mellom skule og kultur, samstundes som ein må arbeide
saman om å nå felles mål for satsinga.
Dette vil vere viktige utfordringar både på lokalt,
regionalt og nasjonalt plan.
Meldinga tek først føre seg
bakgrunnen for og verdiar og målsetjingar med Den kulturelle
skulesekken. Bakgrunnen vert skildra gjennom det arbeidet som sidan
byrjinga av 1990-talet er gjort i fleire kommunar og fylkeskommunar
for å etablere ei heilskapleg kunst- og kulturformidling
i grunnskulen. Dette arbeidet vert sett i samanheng med dei politiske
signala som kom til uttrykk gjennom handlingsplanen Broen og den
blå hesten frå 1996 og Læreplanverket
for den 10-årige grunnskulen frå 1997.
Det vert vidare gjort greie for den nasjonale
satsinga på Den kulturelle skulesekken frå 2001
og løyvingane til føremålet over statsbudsjettet
i perioden 2001-2003. Desse løyvingane kom som eit tillegg
til eksisterande løyvingar til institusjonar og tiltak
som arbeider med kunst- og kulturformidling til born og unge både
i og utanfor skuletida. Midlane har gjeve grunnlag for å stimulere
til aktivitet over heile landet og setje i gang eit knippe pilot-
og samarbeidsprosjekt mellom kultur og skule, forankra i læreplanverket.
I utviklinga av Den kulturelle skulesekken framover vert
det lagt vekt på å framheve kulturen sin eigenverdi.
Ein offensiv kulturpolitikk er eit naudsynt korrektiv og supplement
til den kommersielle underhaldningsindustrien og kan motverke einsretting,
intoleranse og kunnskapsløyse. Meldinga strekar under at
både tilbodet til skulane og dei samarbeidsprosjekta mellom skule
og kultur som etter kvart kjem i gang, må spegle det kulturelle
mangfaldet i Noreg.
Dei overordna målsetjingane med Den
kulturelle skulesekken er
– å medverke
til at elevar i grunnskulen får eit profesjonelt kulturtilbod
– å leggje til rette
for at elevar i grunnskulen skal få tilgang til, gjere
seg kjende med og få eit positivt forhold til kunst- og
kulturuttrykk av alle slag
– å medverke til å utvikle
ei heilskapleg innlemming av kunstnarlege og kulturelle uttrykk
i realiseringa av skulen sine læringsmål.
Det kulturelle mangfaldet i Noreg er eit viktig
aspekt som må synleggjerast i arbeidet med Den kulturelle skulesekken
over heile landet.
Den kulturelle skulesekken skal vere forankra
i den generelle delen av læreplanen for grunnskulen og
byggje opp under dei pedagogiske målsetjingane i skulen.
Det er ein føresetnad at avsetninga
av spelemidlar til Den kulturelle skulesekken skal vere eit tillegg
til og ikkje kome som erstatning for eksisterande engasjement og
ressursbruk til dette området i skule- og kultursektoren,
verken lokalt, regionalt eller nasjonalt. Midlane til Den kulturelle
skulesekken skal nyttast til kvalitativt gode kunst- og kulturopplevingar
og bidra til at intensjonane i L97 vert oppfylte.
Den framtidige utviklinga av Den kulturelle skulesekken
bør difor i hovudsak byggje vidare på dei strukturane
som allereie finst, og som er bygde opp gjennom mange år.
I tillegg vil midlane til Den kulturelle skulesekken skape høve
til særskilde satsingsområde og utviklingsprosjekt
og auka vekt på samarbeidsformer mellom kultur- og skulesektoren
på lokalt nivå.
For å nå målsetjingane
om at born i grunnskulen skal få ein kulturell skulesekk
med eit innhald av høg kvalitet, må skulesida
og kultursida samarbeide målretta og effektivt på alle
forvaltningsnivå. Opne og gode sambandsliner og ein konstruktiv
dialog på tvers av sektorgrenser vil vere avgjerande for å lukkast.
Både i kultursektoren og i skulesektoren er det trong for kompetanseheving
og auka kjennskap til strukturar og rammevilkår på begge
sider. Skulen sin tingingskompetanse må betrast, og kultursektoren
må setjast i stand til å utvikle aktivitetar og
tilbod som er tilpassa behov i skulesektoren.
Det er eit mål at kulturfeltet sine
tilbod ikkje berre skal kome elevane til gode, men også gje
inspirasjon og ny kunnskap til lærarane og på denne
måten skape auka forståing og kunnskap om kunsten
og kulturen sitt vesen, utvikling og verdi. Særleg viktig
vil det vere om røynsler og kunnskapar frå kultursektoren
sine utviklings- og signalprosjekt på ulike felt
kan kome til nytte i utviklinga av skulesektoren. Eit sterkare og
opnare samarbeid mellom kultur og skule på alle nivå kan
vise seg å vere både fruktbart og lærerikt
for begge partar.
Den kulturelle skulesekken skal først
og fremst syte for at det vert lagt til rette for gode møte
mellom den enkelte elev og det profesjonelle kulturlivet lokalt
og nasjonalt. Dette kan til dømes skje gjennom konsertar, museumsbesøk,
framsyningar og møte med forfattarar, men det kan også skje
ved ulike arbeidsmåtar der den profesjonelle kunstnaren
møter eleven i eit gjensidig fruktbart samarbeid, som også inkluderer
for- og etterarbeid ved skulen.
Det er eit stort utviklingspotensial i formidlinga
av musikk, visuell kunst, scenekunst, litteratur og bibliotek, kulturarv
og kulturminne og film til born og unge. Mange aktørar
kan i framtida i større grad medverke til å fylle
Den kulturelle skulesekken og samarbeide med skuleverket på ymse
vis. Dette krev initiativ og fantasi både i skulesektoren,
kultursektoren og i dei kommunale og fylkeskommunale forvaltingsorgana.
Det krev også ei statusheving av kunst- og kulturformidlinga
til born og unge.
Innanfor musikkfeltet er det ei utfordring å sikre
alle skular som ynskjer det gode møte med musikarar på høgt
nivå og innanfor eit mangfald av sjangrar.
Det er vidare ei utfordring å lyfte
fram den visuelle kunsten i Den kulturelle skulesekken på landsbasis
og styrkje formidlinga av samtidskunst, design og arkitektur i det
lokale og regionale arbeidet med Den kulturelle skulesekken.
Eit av hovudmåla på det visuelle
kunstfeltet er å sikre at flest mogleg skal få tilgang
til, forståing for og oppleving av biletkunst, kunsthandverk,
arkitektur og design av god kvalitet.
På scenekunstfeltet er hovudutfordringa å få til
eit meir differensiert tilbod til born og unge, i tillegg til å oppnå ein
reell auke i talet på produksjonar tilrettelagde for turné.
Det er også viktig at institusjonane legg til rette for
at elevane kan kome til teatret i skuletida.
På litteraturfeltet er det ei utfordring å inspirere
born og unge til å lese og å medverke til å realisere
gode prosjekt og tiltak knytte til auka leselyst. Det er ei utfordring å styrkje
samarbeidsstrukturane mellom folkebibliotek og skulebibliotek og
finne måtar for overføring av kunnskap og kompetanse
som er opparbeidd gjennom ei rekkje lokale leselystprosjekt av ulik
art.
Hovudmåla for Kultur- og kyrkjedepartementet
på bibliotekområdet er å fremje leseinteresse
og god språkbruk og sikre norsk som kulturspråk.
På museumsfeltet er det ei utfordring å heve
formidlingskompetansen og kjennskapen til L97. Det er vidare ei
utfordring å skape samarbeidsrelasjonar med kulturminnevernet
og lokale lag og foreiningar på kulturminneområdet.
Hovudføremålet for musea er å skape
grunnlag for kunnskap om, forståing for og oppleving av
natur, kultur og samfunn på ein måte som viser
både kontinuitet og endring, samanheng og ulikskapar.
Kultur- og kyrkjedepartementet har dei siste åra
lagt til grunn at musea skal prioritere utvikling av nye formidlingsmetodar,
særleg tilrettelagde for born og unge.
På filmfeltet er det utfordringar knytte
til å auke kunnskapen og haldninga til film som uttrykksform
og kunstform og la born og unge bruke film som uttrykksmiddel for
eigen aktivitet.
For å kunne skape eit godt innhald
i Den kulturelle skulesekken og for å sikre at Den kulturelle skulesekken
vil gje gode møte mellom kunstnar og elev, må produsentar
og formidlarar over heile landet arbeide målretta med nye
metodar og ny formidling. Innanfor alle kunst- og kulturuttrykka
ligg det eit stort potensial i å utvikle meir dialogbaserte
formidlingsmetodar og tilbod som i større grad aktiviserer
og inkluderer elevane i formidlingsarbeidet. Det er viktig å leggje
til rette for føre- og etterarbeid i skulen. I denne samanhengen
vil det vere naudsynt å leggje større vekt på kompetanseutvikling,
kurs og etterutdanningstilbod, og spreiing av kunnskap og røynsler
til andre.
Ei utfordring i arbeidet med Den kulturelle skulesekken
er utviklinga av dei formidlingsordningane som har ambisjonar om
landsomfattande virke, som får direkte tilskot over statsbudsjettet,
og som kommunane betaler relativt lite for å nyte godt
av. Døme er Rikskonsertane, Riksutstillingar, Norsk Scenekunstbruk
og Norsk Forfattarsentrum. Desse er ulikt bygde opp, men ordningane
er vesentlege delar av den sikringskosten som fylkeskommunane i
dag arbeider med å gje til alle kommunane i fylka, og er
såleis etterspurde i samband med utviklinga av skulesekken. Dersom
ein ikkje kan nytte spelemidlar for å styrkje desse ordningane
i tida framover, vil det verte vanskeleg å sikre alle elevar
i landet eit fast tilbod av høg kvalitet gjennom desse
ordningane.
Den lokale forankringa er basis i Den kulturelle skulesekken.
Det er i den enkelte kommunen at krafta og initiativet til ei satsing
på kultur skal liggje. Dette vil krevje både ein
politisk vilje til å satse, vilje til samarbeid mellom
skule og kultur på lokalt plan i den enkelte kommunen og
over kommunegrensene, og vilje til å lyfte opp og nytte
dei ressursane kommunane har i arbeidet med Den kulturelle skulesekken
på ein målretta og effektiv måte. L97
er eit godt grunnlag for å setje ei slik satsing inn i
ein breiare samanheng.
Utviklinga av Den kulturelle skulesekken framover vil
krevje eit godt samarbeid mellom kommunenivået og det regionale
nivået gjennom fylkeskommunen og fylkesmannen si utdanningsavdeling.
Det vil vere svært viktig å etablere ei arbeidsdeling
mellom skule- og kultursida på kommunalt og regionalt nivå.
Det er også viktig å forme ein visjon for utviklinga
av skulesekken i fylket og i kommunen som tek vare på dei
overordna målsetjingane med tiltaket.
I meldinga vert fem fylkesmodellar og tre kommunemodellar
presenterte.
Utforminga av Den kulturelle skulesekken på nasjonalt,
regionalt og lokalt nivå er eit sentralt emne i meldinga.
I utarbeidinga av den overordna strategien for utviklinga av Den
kulturelle skulesekken er det lagt til grunn som eit heilt sentralt
prinsipp at utforminga og utviklinga ikkje skal skje under sterk
statleg styring. Fylkeskommunen er tillagt eit stort ansvar for
regional samordning av tilboda og for kommunal innsats.
Kultur- og kyrkjeministeren har det politiske
ansvaret for å fordele spelemidlar til kulturføremål.
Sidan Den kulturelle skulesekken er eit samarbeidsprosjekt mellom
kultur og skule, er det lagt vekt på å inkludere skulesida
i planlegginga. På nasjonalt plan er det difor oppretta
ei styringsgruppe samansett av ein representant for politisk leiing
i Kultur- og kyrkjedepartementet og Utdannings- og forskingsdepartementet,
og ei fagleg referansegruppe med medlemmer frå både skule-
og kultursektoren. Sekretariatet for Den kulturelle skulesekken
er lokalisert til ABM-utvikling - Statens senter for arkiv, bibliotek
og museum. Sekretariatet skal samarbeide tett med Læringssenteret
for å sikre forankring i skuleverket. Det vil dessutan
vere eit nært samarbeid mellom ABM-utvikling og Norsk kulturråd
i det løpande arbeidet med dette tiltaket. Også andre
relevante faginstansar kan trekkjast inn når dette er naudsynt.
Både på fylkesnivå og
på kommunenivå vil det vere viktig å arbeide
for ei organisering og ei ansvarsdeling som inkluderer både
skulesida og kultursida. På fylkesnivået vil utdanningsavdelinga
hos fylkesmannen vere ein naturleg samarbeidspartnar for fylkeskommunen, saman
med kunst- og kulturinstitusjonar og frie kunstnarar.
På kommunenivå må ein
arbeide for å forankre Den kulturelle skulesekken i den
enkelte skulen og i lokale kulturinstitusjonar, lag og foreiningar.
Den kulturelle skulesekken skal vere forankra i den generelle delen
av læreplanen for grunnskulen og byggje opp under dei pedagogiske
målsetjingane i skulen. For å oppnå dei generelle
måla og prinsippa som ligg til grunn for L97, og for å innarbeide
Den kulturelle skulesekken i skulen sine læringsmål,
må kommunane leggje tilhøva til rette for at den
enkelte skule kan samarbeide målretta med profesjonelle
kulturinstitusjonar og kunstnarmiljø. For å skape
lokal eigarskap til Den kulturelle skulesekken må ein skape
ein lokal visjon om korleis ein ynskjer at kultur skal inngå i
skulen, og korleis ein kan inkludere lokale kunst- og kulturressursar
i arbeidet. Utforminga av Den kulturelle skulesekken lokalt må skje
ut frå lokale grunnlag og i samspel med det regionale arbeidet
som vert lagt til rette på fylkesplanet. Departementet
har lagt til grunn at det er fylkeskommunen sitt ansvar å syte
for at den overordna utviklinga av Den kulturelle skulesekken i
fylket også er basert på innspel og initiativ
frå kommunar, skular og kultursektoren. Eit godt samarbeid
mellom skule- og kultursida vil vere viktig for å lukkast
i arbeidet.
Regjeringa ynskjer å bidra til å styrkje
formidlinga av musikk på landsbasis. I 2003 er det avsett
tre mill. kroner i nasjonale midlar til formidling av musikk. Midlane
skal forvaltast av Norsk kulturråd på basis av kriterium
fastsette av Kultur- og kyrkjedepartementet etter tilråding
frå styringsgruppa for Den kulturelle skulesekken.
I fordelinga av avsetninga av spelemidlar til
Den kulturelle skulesekken i 2003 er det ikkje avsett særskilde midlar
til å dekkje inn etterspurnaden av skulekonsertar frå Rikskonsertane.
Skulekonsertordninga vil på generelt grunnlag verte drøfta
i den generelle kulturmeldinga, St.meld. nr. 48 (2002-2003).
Departementet vil bidra til å utvikle
og formidle god og mangfaldig visuell kunst og sikre eit likeverdig
og heilskapleg tilbod for alle elevar i heile landet.
Departementet ynskjer vidare å bidra
til å utvikle og formidle fleire scenekunstproduksjonar
for born og unge tilrettelagte for turné gjennom å setje
av fem mill. kroner frå Den kulturelle skulesekken i 2003.
Kultur- og kyrkjedepartementet ynskjer å medverke til å realisere
gode prosjekt og tiltak knytte til auka leselyst innanfor ramma
av Den kulturelle skulesekken. Departementet ynskjer også å styrkje samarbeidsstrukturane
mellom folkebibliotek og skulebibliotek.
Departementet ynskjer òg å leggje
til rette for betre og meir målretta formidling av kulturarven
til born og unge og auka samarbeid med kulturminnevernet gjennom å setje
av midlar frå Den kulturelle skulesekken.
Departementet ynskjer at fleire elevar etter
kvart kan få ei meir bevisst haldning til film som uttrykksform
og kunstform gjennom Den kulturelle skulesekken.
I 2003 vil det verte sett i gang eit førebuande
arbeid med tanke på ei særskild satsing på film
innanfor ramma av Den kulturelle skulesekken frå og med
2004.
Dei økonomiske rammene for Den kulturelle skulesekken
i åra som kjem og planar for bruken av midlane, er omtala
avslutningsvis i meldinga.
Frå og med 2003 får Den kulturelle
skulesekken 60 mill. kroner av avsetninga av overskotet til Norsk
Tipping. Dersom prognosane held, vil denne summen kunne auke til
120 mill. kroner i 2004 og 180 mill. kroner i 2005.
I tillegg til dette kan ein også rekne
med løyvingar over Kultur- og kyrkjedepartementet sitt
budsjett, jf. kap. 320 post 81 Den kulturelle skolesekken, og løyvingar
til ymse institusjonar som arbeider med landsomfattande og regional
profesjonell kulturformidling til born og unge. På landsbasis
vert det også nytta kommunale og fylkeskommunale midlar
til kulturformidling i Den kulturelle skulesekken, men departementet har
ikkje oversyn over omfanget av dette.
For 2003 er 60 pst. av dei tilgjengelege spelemidlane til
Den kulturelle skulesekken fordelt til fylkeskommunane. I 2003 utgjer
dette 36 mill. kroner. Departementet har i brev av 26. februar 2003
til fylkeskommunane lagt enkelte overordna føringar på bruken
av desse midlane.
Departementet understrekar i brevet at målgruppa
for Den kulturelle skulesekken er elevar i grunnskulen. Vidare skal
skulesekken vere forankra i den generelle delen av læreplanen
for grunnskulen og byggje opp under dei pedagogiske målsetjingane
i skulen. På regionalt hald må det etablerast
eit samarbeid mellom fylkeskommunane og fylkesmannen si utdanningsavdeling
om utviklinga av Den kulturelle skulesekken. Vidare må fylkeskommunen
syte for at det ligg føre ein plan for utviklinga av skulesekken,
at skulesekken får lokal forankring, og at kommunane får høve
til å utvikle eigne initiativ. Løyvingane
skal gå til meir kunst og kultur og ikkje til administrasjon.
Innhaldet skal inkludere alle kunst- og kulturuttrykka, og eksisterande
tiltak og institusjonar bør trekkjast inn. Departementet
legg til grunn at ei vidareutvikling og styrking av Den kulturelle
skulesekken i åra som kjem, må vurderast i lys
av korleis den enkelte fylkeskommunen lukkast med å utvikle
planar og tiltak i samsvar med intensjonane og målsetjingane
for tiltaket.
Dei resterande 24 mill. kronene til Den kulturelle skulesekken
vert i 2003 forvalta av ABM-utvikling og Norsk kulturråd
på basis av kriterium fastsette av Kultur- og kyrkjedepartementet
etter råd frå styringsgruppa for Den kulturelle
skulesekken. Midlane er prosjektmidlar og skal knytast til formidling
innanfor definerte satsingsområde.
I 2003 er det avsett prosjektmidlar til følgjande område:
– 3 mill.
kroner til formidling av dei visuelle kunstartane (biletkunst, kunsthandverk,
arkitektur og design)
– 3 mill. kroner til formidling
av musikk
– 5 mill. kroner til produksjon
og formidling av scenekunst
– 5 mill. kroner til prosjekt
innan litteraturformidling, stimulering av leselyst og samarbeid
mellom folkebibliotek og skulebibliotek
– 5 mill. kroner til utviklingstiltak
og formidlingsverksemd i vitensentra
– 3 mill. kroner til prosjekt
og formidling innanfor kulturarv og kulturminne.
Frå og med 2004 vert det lagt opp til
ei særleg satsing på film i Den kulturelle skulesekken.
Avslutningsvis vert det kort drøfta
på kva måte departementet ser føre seg
utviklinga av Den kulturelle skulesekken framover. I tråd
med Stortinget sine føringar om at Den kulturelle skulesekken
ikkje skal vere underlagt sterk sentral styring, ser departementet
det som lite føremålstenleg å planleggje
utviklinga av Den kulturelle skulesekken i detalj. Disposisjonane
i 2003 vil difor bli gjenstand for grundig og kontinuerleg vurdering
i tida som kjem. Det kan verte naudsynt å revurdere innretningane
og vurdere fleire og andre måtar å kanalisere
midlane på etter som det viser seg kva satsingar som er
vellukka og kva som er mindre vellukka.