Departementet orienterer i St.prp. nr. 45 (2007–2008),
sak 2.1, om system for styring og rapportering i Statens vegvesen.
Etter raset i Hanekleivtunnelen på E18 i nordre Vestfold
den 25. desember 2006 blei det oppnemnd fleire undersøkingsgrupper
og arbeidsgrupper, som hadde til oppgåve å finne årsaka til at dette
kunne skje, samt å foreslå eventuelle tiltak for å unngå at slike
hendingar skal kunne skje i framtida.
Etter at desse utgreiingane var utførde, og
ein rapport frå internrevisjonen i Vegdirektoratet ikkje gav svar
på dei spørsmåla Samferdselsdepartementet ønskte å få avklara, avgjorde
departementet at det skulle gjennomførast ei ekstern undersøking
som skulle sjå på rapporteringsrutinar og formidling av styringsinformasjon
i Statens vegvesen i perioden då E18 i nordre Vestfold blei prosjektert
og bygd. Undersøkinga skulle også omfatte ein gjennomgang av tilsvarande forhold
i Statens vegvesen i dagens organisasjon.
Konsulentselskapet AGENDA Utredning & Utvikling
AS blei gitt dette oppdraget, og rapport frå konsulentselskapet
blei overlevert til Samferdselsdepartementet 15. oktober 2007.
Samferdselsdepartementet konstaterer at AGENDA
Utredning & Utvikling AS fann svakheiter ved ansvarsforhold
og styringssystem i samband med bygging av Hanekleivtunnelen, men
har ikkje funne tilsvarande på andre prosjekt frå den same tidsperioden.
Dette kan etter departementet si vurdering tyde på at det var spesifikke
problem knytte til forholda på det konkrete prosjektet og ikkje
nødvendigvis eit problem som var gjennomgåande i heile organisasjonen.
Dei problema med uklåre ansvarsforhold som er avdekka
i samband med Hanekleivprosjektet, synest ikkje å kunne oppstå med
den organiseringa som i dag er i vegsektoren, der produksjonsverksemd
ikkje lenger er ein del av oppgåvene til vegvesenet. Dette blir
òg klårt stadfesta gjennom AGENDA sin rapport. Dei områda som AGENDA
peiker på, der Statens vegvesen og dei fleste andre store byggherreorganisasjonane
i Noreg har eit potensial for å forbetre seg, er tekne tak i. Vegstyresmaktene
har gjennom heile det siste året lagt ned eit omfattande arbeid
for å ta tak i desse utfordringane.
Samla vurderer Samferdselsdepartementet situasjonen
slik at Statens vegvesen i dag er ein organisasjon med klåre ansvarsforhold
og styringssystem som i hovudsak er tilfredsstillande.
Som omtala i St.prp. nr. 68 (2006–2007) har Regjeringa
sett ned eit offentleg utval som skal sjå på organiseringa av tilsynsoppgåver
knytt til infrastrukturen i vegsektoren. Ei hovudoppgåve for ei
slik utgreiing vil vere å utgreie behov for å opprette eit sjølvstendig
tilsyn og behov for endringar i regelverk. Ein viktig del av dette
arbeidet er å vurdere ei føremålstenleg ansvarsdeling mellom Statens
vegvesen og eit slikt eventuelt tilsyn og mellom tilsyn og departement.
Utvalet skal leggje fram innstillinga si i form av ei offentleg
utgreining innan utgangen av 2008.