Den internasjonale kaffiavtalen av 28. september
2007 har som føremål å styrkje den internasjonale kaffisektoren
og hjelpe til ei berekraftig utviding av sektoren i eit marknadsbasert
klima, til beste for alle som deltar i sektoren. Noreg sine økonomiske
plikter ifølgje avtalen vil vere avgrensa til eit årleg tilskot
til Kaffiorganisasjonen sitt administrasjonsbudsjett. Tilskotet
utgjorde i 2009 kr 156 215. I og med at gjennomføring av avtalen
krev løyvingsvedtak, er Stortingets samtykke til ratifikasjon naudsynt
i medhald av § 26 andre ledd i Grunnlova.
Noreg er tilslutta Den internasjonale kaffiavtalen av
2001. Avtalen er den sjette i rekka. Det har vore internasjonale
kaffiavtalar i kraft samanhengande sidan 1963, og Noreg har vore
tilslutta alle. Den internasjonale kaffiavtalen 2001 skulle opphøyrt
30. september 2007, men er ved Det internasjonale kaffirådets resolusjon
443 av 23. september 2009 forlenga til 30. september 2010.
28. september 2007 vart medlemsstatane i Den internasjonale
kaffiorganisasjonen samde om ein ny avtale. Denne vil tre i kraft
når tilstrekkeleg mange medlemer har ratifisert avtalen. Den nye
avtalen vil gjelde i ti år, med høve for Den internasjonale kaffiorganisasjonen til
å forlengje den med ytterlegare åtte år.
Etter artikkel 40 var avtalen opphavleg open
for underteikning i London til og med 31. august 2008 og for ratifikasjon
innan 30. september 2008. Fristen for underteikning og ratifikasjon
er ved Det internasjonale kaffirådets resolusjonar nr. 441 og 442
av 23. september 2009 forlenga til 25. september 2010. Vedtak om
å underteikne vart gitt ved kgl.resolusjon av 21. mai 2010, og Noreg
underteikna avtalen 2. juni 2010.
Organisasjonen sine administrasjonsutgifter
skal dekkjast av årlege tilskot frå medlemene etter artikkel 19.
Desse tilskota blir rekna ut på grunnlag av medlemene sitt røystetal
i Rådet, jf. artikkel 20.
Medlemene forpliktar seg til å arbeide for å fjerne
hindringar for handel med, og forbruk av, kaffi, jf. artikkel 24,
og å rapportere om sine tiltak til Rådet, som kan gi tilrådingar
for fjerning av slike hinder. Vidare skal medlemene leggje til rette
for salsfremjande tiltak og marknadsutvikling etter artikkel 25,
og ein eigen komité skal arbeide med dette etter mandat nedsett
av Rådet.
Tilslutnad til Den internasjonale kaffiavtalen 2007
vil sikre Noreg deltaking i Den internasjonale kaffiorganisasjonen.
Organisasjonen sitt arbeid vil gjennom ovannemnde tiltak for marknadsinformasjon,
kvalitetsforbetring, finansiering i kaffisektoren og utviklingsprosjekt, kunne
hjelpe til berekraftig utvikling og mindre fattigdom mellom småskalaprodusentar,
samt betre innsyn og balanse i marknaden. Norsk tilslutnad vil vere
ei vidareføring av etablert norsk politikk på råvareområdet. Avtalen
er i stor mon ei vidareføring av 2001-avtalen, men med lengre verketid
og noko høgare årleg økonomisk bidrag.
Noreg sitt tilskot i 2009 var utrekna etter
12 røyster, og utgjorde kr 156 215. Dette tilsvarte 16 608 britiske
pund. Etter 2007-avtalen vil Noreg ha 14 røyster. Beløpet vil auke
om lag proporsjonalt med talet på røyster. For 2010 er det sett
av kr 192 000 (Prop. 1 S (2009–2010), kap. 116 post 70).
Tilslutnad til avtalen gjer det ikkje turvande
med endringar i lover eller forskrifter.
Spørsmålet om norsk tilslutnad til avtalen er førelagt
Finansdepartementet, Landbruks- og matdepartementet, og Nærings-
og handelsdepartementet, som ikkje hadde merknader. Norsk kaffibransje,
representert ved Norsk Kaffeinformasjon, er konsultert, og har tilrådd
at Noreg sluttar seg til avtalen.
Kaffiavtalen 2007 i engelsk originaltekst med omsetjing
til norsk følgjer som trykt vedlegg til proposisjonen.
Avtalen er open for underteikning fram til 25. september
2010.
Komiteen, medlemmene fra Arbeiderpartiet,
Laila Gustavsen, Eva Kristin Hansen, Svein Roald Hansen, Sverre Myrli,
Tore Nordtun og Helga Pedersen, fra Fremskrittspartiet, Jan Arild Ellingsen,
Morten Høglund, Siv Jensen, Peter N. Myhre og Karin S. Woldseth, fra
Høyre, Peter Skovholt Gitmark, Ivar Kristiansen og lederen Ine M.
Eriksen Søreide, fra Sosialistisk Venstreparti, Bård Vegar Solhjell,
fra Senterpartiet, Trygve Slagsvold Vedum, og fra Kristelig Folkeparti,
Kjell Arvid Svendsen, har ingen merknader, viser til proposisjonen
og rår Stortinget til å gjøre slikt
vedtak:
Stortinget samtykkjer i ratifikasjon av Kaffiavtalen
av 28. september 2007.
Oslo, i utenriks- og forsvarskomiteen, den 16. juni 2010
Ine M. Eriksen Søreide |
leder og ordfører |