Framlegg til endringar i løyvingar under kapittel og postar i 2012

Kap. 1100 Landbruks- og matdepartementet

Post 1 Driftsutgifter

I Prop. 1 S (2011–2012) for Landbruks- og matdepartementet blei det lagt til grunn ein auke på departementet sitt driftsbudsjett i samband med departementet si flytting frå regjeringsbygg R5 til R6. Statsbygg har seinare justert arealfordelinga, og dermed òg kostnadene til husleige og andre driftskostnader. Departementet gjer derfor framlegg om å redusere utgifta på posten med 7,8 mill. kroner.

Post 45 Større utstyrskjøp og vedlikehald

Landbruks- og matdepartementet har i 2012 seld eigedom på Kjeller i Skedsmo for 15,6 mill. kroner, jf. omtale under kap. 4100 post 40. Med bakgrunn i Prop. 1 S (2011–2012) legg departementet til grunn at utgifter i samband med salsprosessen blir dekte av salsinntektene. I 2012 har departementet hatt utgifter i samband med regulering og sal på 9,9 mill. kroner.

Samla gjer departementet framlegg om å auke løyvinga på posten med 10,1 mill. kroner.

Kap. 1115 Mattilsynet

Post 22 Reguleringspremie til kommunale og fylkeskommunale pensjonskasser

Posten blei i Prop. 111 S (2011–2012) Tilleggsbevilgninger og omprioriteringer i statsbudsjettet 2012 auka med 760 000 kroner for 2012. Departementet gjer framlegg om å auke løyvinga på posten med 1 mill. kroner grunna eingongspremiar for tidlegpensjon m.m.

Post 71 Tilskott til erstatningar

Tilskotta over posten dekkjer utgiftene Mattilsynet har til nødhjelp til dyr etter dyrevernloven § 6, og der utgifta ikkje kan drivast inn frå eigar.

Ved utgangen av september 2012 er det ført om lag 2,5 mill. kroner på kap. 1115. Departementet foreslår å auke løyvinga over posten med 2,6 mill. kroner, til 3,7 mill. kroner.

Kap. 1148 Naturskade – erstatningar

Post 71 Naturskade, erstatningar

2011 var eit år med mange og store naturskadehendingar. Løyvinga blei auka til 163 mill. kroner i samband med behandlinga av Prop. 111 S (2011–2012). Anslaget er no justert opp til 220 mill. kroner for 2012. Løyvinga er ei overslagsløyving, og departementet gjer framlegg om ein auke på 57 mill. kroner.

Kap. 1150 Til gjennomføring av jordbruksavtalen m.m.

Post 50 Fondsavsetningar

Prognoser frå SLF viser eit overforbruk på 6 mill. kroner. Departementet gjer derfor framlegg om å auke løyvinga på posten med 6 mill. kroner, mot ein tilsvarande reduksjon på kap. 1150 post 74 Direkte tilskott.

Departementet gjer òg framlegg om å styrkje LUF med 3,7 mill. kroner, svarande til inntekta på kap. 4150 post 70.

Post 71 Tilskott til erstatningar m.m.

Formålet med løyvinga er å gi økonomisk kompensasjon til føretak i jordbruket som har lidd tap som kjem av forhold føretaket ikkje rår over.

Prognosane viser no at utbetalingane i 2012 vil bli 40 mill. kroner høgare enn lagt til grunn i Prop. 1 S (2011–2012), og departementet gjer framlegg om å auke løyvinga på posten i tråd med dette.

Post 73 Pristilskott

Formålet med løyvinga er å styrkje bøndene sine inntekter og å jamne ut distriktsforskjellar som skuldast ulike dyrkingsvilkår og infrastruktur.

Prognosen frå Statens landbruksforvaltning viser eit mindreforbruk på 143,7 mill. kroner for 2012. Departementet gjer derfor framlegg om å redusere løyvinga på posten i tråd med dette.

Post 74 Direkte tilskott

Forbrukarprognosane for 2012 viser eit underforbruk på 7,8 mill. kroner. Landbruks- og matdepartementet viser til omtalen under kap. 1150 post 50 Fondsavsetningar, og gjer framlegg om å redusere løyvinga på posten med 6 mill. kroner for å dekkje overforbruket på Landbrukets utviklingsfond (LUF).

Kap. 4100 Landbruks- og matdepartementet

Post 40 Sal av eigedom

Landbruks- og matdepartementet har i 2012 seld eit større utbyggingsareal på Kjeller i Skedsmo for 14,5 mill. kroner. Departementet gjer framlegg om å opprette kap. 4100 post 40 for 2012 med ei inntektsløyving på 15,8 mill. kroner.

Kap. 4115 Mattilsynet

Post 1 Gebyr m.m.

Foreløpige utrekningar viser at gebyrinntektene under Mattilsynet vil bli lågare enn det var budsjettert med i Prop. 1 S (2011–2012). Departementet gjer framlegg om å redusere inntekta over posten med 16,9 mill. kroner, til 105 mill. kroner.

Kap. 4150 Til gjennomføring av jordbruksavtalen m.m.

Post 70 Tilbakebetalt tilskott til reguleringsanlegg

Omsetningsrådet gjorde i mai 2012 vedtak om tilbakebetaling på totalt 3,7 mill. kroner for fire reguleringsanlegg som ikkje lenger blir nytta til formålet. Departementet gjer derfor framlegg om å opprette kap. 4150 post 70 for 2012 med ei løyving på 3,7 mill. kroner.

Post 85 Marknadsordninga for korn

Nye anslag tyder på at inntektene blir høgare enn forventa, og departementet foreslår derfor å auke inntekta over posten med 9,3 mill. kroner, til 37 mill. kroner.

Kap. 4162 Statskog SF – forvaltning av statleg eigarskap

Post 90 Avdrag på lån

Landbruks- og matdepartementet legg til grunn at inntektene frå arronderingssalet som starta hausten 2011, blir nytta til avdrag på det statlege lånet Statskog SF fekk i samband med oppkjøpet av Borregaard Skoger AS, Borregaard Vafos AS og Børresen AS frå Orkla ASA, jf. Prop. 11 S (2010–2011). Prognosane for salet tilseier ei inntekt på 67 mill. kroner i 2012. Departementet gjer derfor framlegg om å auke løyvinga på posten med 23 mill. kroner.

Kap. 5576 Sektoravgifter under Landbruks- og matdepartementet

Post 70 Avgifter i matforvaltninga

Avgiftene i matforvaltninga fall bort med verknad frå 1. januar 2012.

Den budsjetterte inntekta på 117 mill. kroner i Prop. 1 S (2011–2012) er knytt til oppsamla utgifter frå 2011 som kom til innbetaling i 2012. Pr. 1. september 2012 var det rekneskapsført 151,5 mill. kroner på posten. Det er ikkje forventa ytterlegare innbetalingar i år, og departementet gjer derfor framlegg om å auke løyvinga over posten med 34,5 mill. kroner.

Kap. 5651 Aksjar i selskap under Landbruks- og matdepartementet

Post 85 Utbytte

I Prop. 1 S (2011–2012) for Landbruks- og matdepartementet er det budsjettert med eit utbytte på 5 mill. kroner frå dei aksjeselskapa der departementet representerer statens eigardel. Departementet gjer framlegg om å redusere løyvinga over posten med 405 000 kroner.

Kap. 5652 Renter og utbytte – Statskog SF

Post 80 Renter

Rentene på lånet Statskog SF fekk ved kjøpet av selskapa Borregaard Skoger AS, Borregaard Vafos AS og Børresen AS frå Orkla ASA, jf. Prop. 11 S (2010–2011), vil vere på om lag 22,5 mill. kroner i 2012. Departementet gjer derfor framlegg om ein auke av løyvinga på posten på 0,6 mill. kroner.

Andre saker

Auka tilsegnsfullmakt, naturskade

Oppdaterte prognoser viser at det vil bli gitt tilsegn om erstatningar i 2012 som ikkje vil komme til utbetaling same året. Landbruks- og matdepartementet foreslår derfor å auke tilsegnsfullmakta for 2012 med 65 mill. kroner, til 142 mill. kroner.