Samferdselsdepartementet legg i proposisjonen fram
eit forslag om utbygging og finansiering av vegprosjekt og tiltak
i Bodø kommune (Bypakke Bodø). I tillegg blir det foreslått endringar
i takst- og rabattopplegget for prosjektet rv. 80 Løding–Vikan (Tverlandsbrua),
slik at dette blir samordna med bompengeopplegget for Bypakke Bodø.
Bypakke Bodø er utvikla gjennom eit samarbeid mellom
Bodø kommune, Nordland fylkeskommune, Statens vegvesen og Jernbaneverket.
Bypakke Bodø skal vidareutvikle Bodø som ein attraktiv by å bu og
drive verksemd i ved å fremje effektiv, miljøvenleg og trygg transport. Formålet
med Bypakke Bodø er å byggje ein ny og trafikksikker innfartsveg
til Bodø og samstundes leggje til rette for gåande, syklande og kollektivreisande.
Bypakka er tidlegare omtalt i mellom anna Meld. St. 26 (2012–2013)
Nasjonal transportplan 2014–2023, Prop. 1 S (2012–2013), og Prop.
1 S (2013–2014).
Det er gjennomført konseptvalutgreiing (KVU) og
ekstern kvalitetssikring (KS1) for Bypakke Bodø. KVU/KS1 for rv.
80 Løding–Bodø sentrum blei handsama i samband med arbeidet med Nasjonal
transportplan 2014–2023. Det er vedteke at «kombinasjonskonseptet»
skal leggjast til grunn for vidare planlegging. Konseptet omfattar
mellom anna utvida vegkapasitet frå Bertnes til Bodø hamn, styrka
kollektivtilbod, ny haldeplass for tog og tilrettelegging for gåande og
syklande.
Bypakke Bodø har ei samla økonomisk ramme på
2 820 mill. 2014-kroner. I tillegg vil fylkeskommunen styrkje drifta
av kollektivtilbodet med til saman 59 mill. 2014-kroner i perioden 2014–2021,
og det vil bli bygd ny haldeplass for tog på Tverlandet i regi av
Jernbaneverket. Utbyggingsplanen er vist i tabell 2.1. i proposisjonen.
Det dominerande prosjektet i pakka er utbygginga
av rv. 80 på strekninga Hunstadmoen–Thallekrysset. Vegstrekninga
har dårleg trafikkavvikling, mange trafikkulykker og dårleg tilrettelegging
for gåande og syklande. I tillegg er bustadmiljøet langs vegen dårleg
på grunn av støy og forureining. Prosjektet omfattar bygging av
5,4 km ny firefelts veg. Frå Hunstadmoen vert det bygd ein om lag
2,8 km lang tunnel i to løp vestover til Bodøelv. Prosjektet går vidare
langs dagens rv. 80 til Thallekrysset og langs Olav V gate (arm
av rv. 80) forbi kryss med Gamle Riksvei. Rekna om til 2014-kroner er
styringsramma 2 080 mill. kroner og kostnadsramma 2 400 mill. kroner
for prosjektet.
Tiltak for gåande og syklande (inkl. trafikktryggleikstiltak)
har ei økonomisk ramme på 500 mill. kroner og kollektivtrafikktiltak
ei økonomisk ramme på 210 mill. kroner. Nordland fylkeskommune vil
dessutan styrkje kollektivtilbodet ved å auke driftstilskotet med til
saman 59 mill. 2014-kroner i perioden fram til og med 2021.
I tillegg er det lagt opp til å byggje ny haldeplass for
tog på Tverlandet i regi av Jernbaneverket.
Den lokalpolitiske handsaminga går fram av pkt. 2
i proposisjonen.
Trafikktala som er lagt til grunn for Bypakke Bodø,
er observerte trafikktal frå faste teljepunkt i Bodø og resultata
frå «Reisevaneundersøkelse Salten (2009)».
Finansieringa av Bypakke Bodø er basert på innkrevjing
av bompengar og statlege, fylkeskommunale og kommunale midlar. Finansieringsplanen
er vist i tabell 5.1 i proposisjonen.
Samla ramme for prioriterte prosjekt og tiltak
er rekna til 2 820 mill. 2014-kroner. Samanlikna med det som er
lagt til grunn i dei lokalpolitiske vedtaka, har ramma blitt auka.
Årsaka til dette er auka kostnader for prosjektet rv. 80 Hunstadmoen–Thallekrysset
og auka meirverdiavgiftspåslag som følgd av oppheving av vegfritaket
frå 1. januar 2013.
Dei statlege midlane utgjer 542 mill. kroner
og dei fylkeskommunale og kommunale midlane utgjer til saman 253
mill. kroner.
Det er lagt opp til delvis parallellinnkrevjing
av bompengar i 7 automatiske bomstasjonar (AutoPASS) med innkrevjing
i begge retningar.
Det skal berre betalast for ei passering per
time. Denne skal òg gjelde for prosjektet rv. 80 Løding–Vikan (Tverlandsbrua),
og det skal betalast for maksimum 80 passeringar per køyretøy i
kalendermånaden.
Det blir vurdert som realistisk å starte opp
innkrevjinga i 2015 og innkrevjingsperiode om lag 15 år.
Basert på føresetnadene i proposisjonen er dei samla
bompengeinntektene rekna til om lag 3 100 mill. kroner i 2014-prisnivå.
Av dette er 1 995 mill. kroner føresett nytta til investeringar i
prosjekt og tiltak innafor Bypakke Bodø, 30 mill. kroner til etablering
av bomstasjonar, 760 mill. kroner til å dekkje finansieringskostnader og
315 mill. kroner til å dekkje innkrevjingskostnader og drift av
bompengeselskapet.
Departementet vurderer både trafikkgrunnlaget og
dei andre føresetnadene for finansieringsopplegget som sannsynlege
og robuste.
Innkrevjinga av bompengar til delfinansiering
av prosjektet rv. 80 Løding–Vikan (Tverlandsbrua) starta 9. november
2013. Som det går fram av den lokalpolitiske handsaminga, jf. kapittel
3 i proposisjonen, har Nordland fylkeskommune og Bodø kommune vedteke
at innkrevjing av bompengar i Bypakke Bodø skal samordnast med innkrevjinga
til Tverlandsbrua ved at timesregelen skal gjelde i begge prosjekta.
Av praktiske årsaker inneber dette vedtaket at òg passeringstaket
på 80 passeringar per månad må gjelde for Tverlandsbrua.
Det er rekna med at innføring av timesregel,
passeringstak og endra rabattstruktur vil gi ei forlenging av innkrevjingstida
med om lag 2 år, dvs. frå om lag 5 år til om lag 7 år.
Som omtalt i Prop. 97 S (2013–2014) legg regjeringa
opp til ei omorganisering av bompengesektoren frå dagens mange bompengeselskap
til eit fåtal selskap. Det overordna målet for dei nye selskapa
er å sørgje for effektiv bompengefinansiering av transportinfrastruktur gjennom
effektiv innkrevjing og gode finansieringsvilkår. For å spare bilistane
for å dekkje store løpande finansieringskostnader, vil regjeringa
òg innføre ei rentekompensasjonsordning for bompengelån.
Bompengeopplegget i proposisjonen er basert
på føresetnad om 6,5 pst. rente. Dette er i tråd med dei lokalpolitiske
vedtaka. Samferdselsdepartementet legg samtidig opp til at det kan
gjerast endringar i takst- og innkrevjingsopplegget for Bypakke
Bodø når den varsla omorganiseringa av bompengesektoren med rentekompensasjonsordning
fører til reduserte finansieringskostnader for prosjektet. Samferdselsdepartementet vil
komme tilbake til Stortinget om dette når den tid kjem.
Fram til ny ordning er på plass, skal det for
nye bompengeprosjekt som vil inngå i dei nye bompengeselskapa, som
ei overgangsordning, kunne reknast takstar baserte på 10 års statsobligasjonsrente.
Samferdselsdepartementet viser til nærare omtale av innrettinga
av overgangsordninga i Prop. 119 S (2013–2014).
I samband med KS2 for Bypakke Bodø tilrådde ekstern
kvalitetssikrar at det blir vurdert ei noko anna innretting på bompengeopplegget
enn det som ligg til grunn i proposisjonen, mellom anna med einvegs
innkrevjing. I lys av dei nemnde tilrådingane frå ekstern kvalitetssikrar
og i tråd med overgangsordninga for rentekompensasjonsordninga,
legg Samferdselsdepartementet opp til at det kan gjerast endringar
i takst- og innkrevjingsopplegget. Samferdselsdepartementet ber
om fullmakt til å gjere slike endringar.
For bompengepakker er det vanleg at omfanget av
utbygginga blir tilpassa den økonomiske ramma. Det er etablert ei
styringsgruppe for planlegging og gjennomføring av Bypakke Bodø.
I styringsgruppa møter ordførar og rådmann i Bodø kommune, fylkesråd
for samferdsel i Nordland fylkeskommune og regionvegsjef i Statens vegvesen
Region nord. Styringsgruppa si hovudoppgåve er å prioritere prosjekt
innafor hovudsatsingsområda i porteføljen og sjå til at gjennomføringa
skjer i tråd med føringane i proposisjonen.
Bodø kommune og Nordland fylkeskommune har fatta
vedtak om å stille garanti for ei gjeld på til saman 1 430 mill.
kroner, fordelt med halvparten på kvar. Garantiperioden er sett
til 17 år. Bompengeselskapet si maksimale gjeld er rekna til om
lag 1 430 mill. kroner i 2019. Ved ein eventuell kostnadsauke på
prosjektet Hunstadmoen–Thallekrysset opp til kostnadsramma vil den
maksimale gjelda auke med om lag 220 mill. kroner.
Bodø kommune og Nordland fylkeskommune har i
tillegg fatta vedtak om å forlenge gjeldande garantiar til prosjektet
rv. 80 Løding–Vikan (Tverlandsbrua) med 4 år.
Etter at Stortinget har gjort vedtak om delvis bompengefinansiering
av Bypakke Bodø og utbygginga av rv. 80 Hunstadmoen–Thallekrysset, vil
det bli inngått avtale mellom Vegdirektoratet og bompengeselskapet
i tråd med gjeldande standardavtale og dei føresetnadene som er
lagt til grunn i proposisjonen.