Kap. 490 Utlendingsdirektoratet

Post 1 Driftsutgifter

Løyvinga på posten skal dekke utgifter til drift av Utlendingsdirektoratet (UDI). UDI får meirinntekter knytte til IKT-utvikling for andre verksemder. Løyvinga på posten blir derfor i proposisjonen foreslått auka med 12,8 mill. kroner for å handtere denne kostnaden. Det blir foreslått tilsvarande justering av inntektsramma på kap. 3490 post 5.

Vidare blir det i proposisjonen foreslått å redusere løyvinga til barnefagleg kompetanse i asylkjeda på posten med 5,8 mill. kroner mot tilsvarande auke på kap. 491 post 1 og kap. 440 post 1.

Totalt blir det i proposisjonen foreslått å auke løyvinga på posten med 7 mill. kroner samanlikna med gjeldande budsjett.

Post 21 Særskilte driftsutgifter, asylmottak

Det går fram av proposisjonen at det er anslått at talet på asylsøkjarar i 2017 blir 3 750 personar. Dette er ein nedgang på 4 500 personar frå gjeldande budsjett, og isolert sett tyder dette på ein reduksjon i løyvinga på posten.

Løyvingsbehovet på posten er imidlertid høgare enn ei rein volumjustering. Hovudårsaka til dette er at kapasitetsutnyttinga i asylmottaka er lågare enn føresetnadene som ligg til grunn for gjeldande budsjett. Ei låg kapasitetsutnytting gir eit meirbehov fordi UDI betalar for plassar som ikkje blir nytta. Trass i at det har vore ein kraftig reduksjon i talet på plassar i løpet av året, har dette blitt motverka av at det faktiske talet på asylsøkjarar har vore lågare enn det prognosane tilsa.

Det blir i proposisjonen foreslått å redusere løyvinga på posten med 9,2 mill. kroner.

Post 22 Særskilte driftsutgifter, tolk og omsetting

UDI har gjennomført færre intervju enn forventa, hovudsakleg fordi talet på asylsøkjarar i 2017 har vore lågare enn venta.

Det blir i proposisjonen foreslått å redusere løyvinga på posten med 4 mill. kroner.

Post 45 Større innkjøp og vedlikehald, kan overførast

Det blir i proposisjonen foreslått å tilføre stikkordet «kan overførast» på posten.

Post 60 Tilskot til vertskommunar for asylmottak

Som omtalt under kap. 490 post 21 er det ein nedgang i forventa tal på asylsøkjarar i 2017, noko som isolert sett ville ført til lågare løyvingsbehov på posten.

Løyvingsbehovet er imidlertid høgare enn den reine volumjusteringa, hovudsakleg grunna høgare del unytta plassar i asylmottak enn det som låg til grunn for gjeldande budsjett. Vidare er det fleire barnehageplassar til disposisjon enn det som ligg til grunn for gjeldande budsjett.

Samla blir det i proposisjonen foreslått å auke løyvinga på posten med 26,7 mill. kroner.

Post 70 Stønader til bebuarar i asylmottak

Løyvingsbehovet som følgje av ei rein volumjustering av posten tilseier ein reduksjon i løyvinga. Løyvingsbehovet er imidlertid høgare enn det volumjusteringa tilseier.

Årsaka til avviket skuldast fleire forhold som trekkjer i ulike retningar. Det er mellom anna betalt ut tilleggsytingar frå 2016 i 2017. Færre asylsøkjarar fører til lågare utbetaling av basisytingar. Rekneskapstal viser at prisen som er på sengetøyspakkar, kjøkkenpakkar etc., har vore høgare enn det som tidlegare er lagt til grunn.

Det blir i proposisjonen foreslått å redusere løyvinga på posten med 0,9 mill. kroner.

Post 71 Tilskot til aktivitetstilbod for barn i asylmottak

Det er venta eit mindreforbruk på posten på 1,8 mill. kroner knytt til tilskot til aktivitetsmidlar for barn i mottak fordi midlar som ikkje blir nytta, til dømes til mottak som blir lagt ned i løpet av året, blir tilbakebetalte på slutten av året. Vidare er kostnadene til informasjonstilbod til au pairar 0,3 mill. kroner lågare enn det som blei løyvd til tiltaket i revidert nasjonalbudsjett 2017.

Samla blir det foreslått å redusere løyvinga på posten med 2,1 mill. kroner.

Post 72 Retur av asylsøkjarar med avslag og tilbakevending for flyktningar, overslagsløyving

Departementet vurderer at det vil vere eit mindreforbruk på posten, mellom anna på grunn av eit lågare tal på returar enn lagt til grunn for gjeldande budsjett.

Det blir i proposisjonen foreslått å redusere løyvinga på posten med 3,7 mill. kroner.

Post 75 Reiseutgifter for flyktningar til og frå utlandet, kan overførast

Det er venta eit mindreforbruk på posten. Hovudårsaka er redusert prognose for talet på asylsøkjarar, lågare kostnader fordi det er inngått ny avtale om assistanse på Oslo Lufthamn og lågare reisekostnader som følgje av endra dollarkurs.

Det blir i proposisjonen foreslått å redusere løyvinga på posten med 4,5 mill. kroner.

Kap. 3490 Utlendingsdirektoratet

Post 1 Retur av asylsøkjarar med avslag og tilbakevending for flyktningar, ODA-godkjente utgifter

Det er gjort ei oppdatert vurdering av delen som kan ODA-godkjennast, og det blir derfor foreslått å redusere inntektsramma på posten.

Det blir i proposisjonen foreslått å redusere løyvinga på posten med 10,5 mill. kroner.

Post 3 Reiseutgifter for flyktningar til og frå utlandet, ODA-godkjente utgifter

På bakgrunn av forslag om reduksjon på kap. 490 post 75 blir det i proposisjonen foreslått å redusere løyvinga på posten med 5 mill. kroner.

Post 4 Asylmottak, ODA-godkjente utgifter

På bakgrunn av forslag om endra løyvingar på kap. 490 post 21, post 60, post 70 og post 71 blir det foreslått å redusere løyvinga på posten med 603,5 mill. kroner.

Post 5 Refusjonsinntekter

Det blir i proposisjonen foreslått å auke løyvinga på posten med 12,8 mill. kroner mot tilsvarande auke av løyvinga på kap. 490 post 1.

Kap. 491 Utlendingsnemnda

Post 1 Driftsutgifter, kan nyttast under post 21

I samband med behandlinga av Prop. 1 S (2016–2017) vedtok Stortinget å auke løyvinga på kap. 490 post 1 med 20 mill. kroner for å styrke den barnefaglege kompetansen i heile asylkjeda. Av desse midlane blei 5,2 mill. kroner satt til disposisjon for Utlendingsnemnda. Av desse er 3,4 mill. kroner brukt.

Det blir i proposisjonen foreslått å overføre dei resterande midlane disponert av UNE, til posten. Midlar som ikkje blir nytta til formålet i 2017, kan overførast til 2018 og nyttast til formålet neste år.

Det blir i proposisjonen foreslått å auke løyvinga på posten med 1,8 mill. kroner mot ein tilsvarande reduksjon på kap. 490 post 1.

Post 21 Særskilte driftsutgifter, nemndbehandling, kan nyttast under post 1

Det er ein reduksjon på 1,5 mill. kroner i utgifter knytt til nemndbehandling i 2017.

Det blir i proposisjonen foreslått å redusere løyvinga på posten med 1,5 mill. kroner.

Kap. 496 Busetting av flyktningar og tiltak for innvandrarar

Post 60 Integreringstilskot, kan overførast

Behovet for 2017 er anslått redusert samanlikna med gjeldande budsjett. Reduksjonen skuldast i hovudsak at kommunane som busett flyktningar, tek i mot ein lågare del tilskot for flyktningane busett i 2017 samanlikna med gjeldande budsjett. Dette etterslepet blir i staden utbetalt i 2018.

Det blir i proposisjonen foreslått å redusere løyvinga på posten med 88,2 mill. kroner.

Post 61 Særskilt tilskot ved busetting av einslege mindreårige flyktningar, kan overførast

Behovet i 2017 er anslått redusert samanlikna med gjeldande budsjett. Reduksjonen skuldast i hovudsak ein reduksjon i talet på einslege mindreårige som det utbetalast høg sats for samanlikna med gjeldande budsjett.

Det blir i proposisjonen foreslått å redusere løyvinga på posten med 30,9 mill. kroner.

Post 62 Kommunale innvandrartiltak

Det blir i proposisjonen foreslått at løyvinga på posten blir redusert med 4,7 mill. kroner som følgje av lågare behov på ordninga med Jobbsjansen. I 2017 blei innretninga endra, og det blei lyst ut fire delordningar. I 2017 har det vore få søknadar frå kommunar på delordningane C Forsøk med lengre programtid for deltakarar i introduksjonsprogrammet og D Utfasing av ungdomsprosjekt som var i drift i 2016. Det låge talet på søknadar på del C er antatt å henge saman med at ordninga er i etableringsfasen.

Løyvinga på posten blir i proposisjonen foreslått redusert med 2,3 mill. kroner på grunn av lågare behov for ordninga med nasjonalt bu- og støttetilbod for personar over 18 år utsatt for tvangsekteskap og æresrelatert vold. Årsaka er at talet på plassar ikkje har auka, og at tilbodet ikkje er utvida i 2017. Det blir arbeidd med å utvide tilbodet.

Det blir i proposisjonen foreslått å redusere løyvinga på posten med til saman 7 mill. kroner.

Kap. 3496 Busetting av flyktningar og tiltak for innvandrarar

Post 1 Integreringstilskot for overføringsflyktningar, ODA-godkjente utgifter

Det blir i proposisjonen foreslått å redusere løyvinga på posten med 27,9 mill. kroner. Årsaka er at prognosen for busette overføringsflyktningar er redusert med 300 personar samanlikna med det som ligg til grunn i gjeldande budsjett. Desse 300 busettingane blir i staden forskyvd til 2018.

Post 2 Særskilt tilskot ved busetting av einslege mindreårige flyktningar. ODA-godkjente utgifter

Det blir i proposisjonen foreslått å redusere løyvinga på posten med 546,8 mill. kroner samanlikna med gjeldande budsjett. Reduksjonen skuldast i hovudsak ein feil i talet på einslege mindreårige busett i 2017 som blei lagt til grunn for gjeldande budsjett.

Kap. 497 Opplæring i norsk og samfunnskunnskap for vaksne innvandrarar

Post 60 Tilskot til opplæring i norsk og samfunnskunnskap for vaksne innvandrarar

Det blir i proposisjonen foreslått å auke løyvinga på posten med 136,9 mill. kroner samanlikna med gjeldande budsjett. Endringa skuldast i hovudsak ein auke i talet på personar som det utbetalast persontilskot år 2 for.

Kap. 3497 Opplæring i norsk og samfunnskunnskap for vaksne innvandrarar

Post 1 Norskopplæring i mottak, ODA-godkjente utgifter

Det blir i proposisjonen foreslått å redusere løyvinga på posten med 18,9 mill. kroner samanlikna med gjeldande budsjett. Reduksjonen skuldast lågare prognosar for talet på asylsøkjarar i 2017 og dermed ein reduksjon i talet på asylsøkjarar i målgruppa for opplæring i norsk og norsk kultur og norske verdiar. For tilskot til opplæring i norsk kultur og norske verdiar er målgruppa ytterlegare redusert fordi det i gjeldande budsjett blei lagt til grunn at ein like stor del av mottaka ville tilby opplæring i norsk kultur og norske verdiar som ordinær norsk for asylsøkjarar i mottak.