1.1 Bakgrunn

Stortinget har over fleire år forventa at ein ved å ta i bruk ny teknologi og ulike former for digital heimeoppfølging i helsetenestene skal kunne halde oppe eit tenestetilbod av god kvalitet og bremse auken i behovet for personell i primær- og spesialisthelsetenesta.

Det overordna målet for Meld. St. 7 (2019−2020) Nasjonal helse- og sykehusplan 2020−2023 var å realisere helsetenesta for pasienten på ein berekraftig måte. Gjennom behandlinga av meldinga slutta Stortinget seg til at pasientane i større grad skal kunne møte spesialisthelsetenesta i heimen ved hjelp av digital heimeoppfølging, nettbaserte behandlingstilbod og digitale konsultasjonar. Bruk av teknologi og medisinsk utstyr skal redusere reisebelastninga for sårbare pasientar og spare pasientar og helsepersonell for unødvendige reiser.

Forventningane om utnytting av teknologiske framsteg for å flytte spesialisthelsetenester nærmare pasientane er vidareførte i Nasjonal helse- og samhandlingsplan 2024−2027.

Det er risiko for at arbeidet går sakte med å ta i bruk ulike teknologiske løysingar og implementere nye tenestemodellar i helseføretaka, inkludert ulike løysingar for digital heimeoppfølging.

Ved hjelp av skjemabasert oppfølging, nettbaserte behandlingstilbod og digitale konsultasjonar skal pasientane i større grad kunne møte spesialisthelsetenesta i heimen og ressursane i helsetenesta nyttast meir effektivt.

Bruk av digitale løysingar og betre digital samhandling gir også nye moglegheiter for å følgje opp pasientar med behov for oppfølging frå fleire nivå.

1.2 Formål

Målet med revisjonen er å vurdere arbeidet til spesialisthelsetenesta med å flytte spesialisthelsetenester nær pasienten ved hjelp av teknologi. Det er også eit mål å vurdere om styring og verkemiddel er innretta for at flytting av tenester nær pasienten bidreg til berekraftige helsetenester og auka samarbeid med kommunar om dette.

1.3 Problemstillingar

1. Kor langt har spesialisthelsetenesta komme i arbeidet med å flytte tenestene nær pasienten ved hjelp av teknologi?

2. I kva grad samarbeider spesialisthelsetenesta med kommunehelsetenesta når spesialisthelsetenester blir flytta nær pasienten ved hjelp av teknologi?

3. Er styringa og verkemiddelbruken til helseføretaka og dei regionale helseføretaka innretta for å flytte spesialisthelsetenester nær pasienten ved hjelp av teknologi i tråd med mål om auka samhandling og berekraft?

4. Er statleg styring og verkemiddel innretta for å flytte spesialisthelsetenester nær pasienten ved hjelp av teknologi i tråd med overordna nasjonale mål om auka samhandling og berekraft?

Dei viktigaste vedtaka og føresetnadene undersøkinga har teke utgangspunkt i, er:

• komitéinnstillinga til Meld. St. 7 (2019−2020) Nasjonal helse- og sykehusplan (2020–2023), jf. Innst. 255 S (2019–2020)

• lov om spesialisthelsetjenesten m.m. (spesialisthelsetenestelova) og Ot.prp. nr. 10 (1998−99) Om lov om spesialisthelsetjenesten m.m.

• lov om helseforetak m.m. (helseføretakslova) og Ot.prp. nr. 66 (2000−2001) Om lov om helseforetak m.m.

• innstillingane frå helse- og omsorgskomiteen til statsbudsjettet for 2019 og 2022

• reglement for økonomistyring i staten (økonomireglementet) og bestemmelser om økonomistyring i staten (økonomiføresegnene)

Undersøkinga omfattar i hovudsak perioden 2020−2025 og inkluderer dei 20 helseføretaka som driv med pasientbehandling, og tre private, ideelle sjukehus som har driftsavtale med dei regionale helseføretaka.

Rapporten vart lagd fram for Helse- og omsorgsdepartementet ved brev 6. juni 2025. Helse- og omsorgsdepartementet har gitt kommentarar til rapporten i brev til Riksrevisjonen av 11. august 2025. Kommentarane er i hovudsak innarbeidde i Riksrevisjonens dokument og i faktagrunnlaget.

1.4 Konklusjonar

• Det er mogleg å auke bruken av ulike typar digital heimeoppfølging i spesialisthelsetenesta og samarbeide meir med kommunar om dette.

• Føretaka og Helse- og omsorgsdepartementet kan leggje betre til rette for arbeidet med å flytte spesialisthelsetenester nærmare pasienten ved hjelp av teknologi.

• Føretaka og departementet har lagt lite vekt på samarbeid med kommunehelsetenesta i styringa av arbeidet med å flytte spesialisthelsetenester nærmare pasienten ved hjelp av teknologi.

• Styringsinformasjonen om bruk av digitale helsetenester bidreg til effektiv ressursbruk, er mangelfull på alle nivå.

1.5 Overordna vurdering

Det er ikkje tilfredsstillande at:

• mange helseføretak har komme kort i å ta i bruk ulike former for digital heimeoppfølging av pasientane sine

• helseføretaka i liten grad har teke i bruk moglegheiter teknologien gir for å samarbeide med kommunar om tenester nærmare pasientane

• det manglar styringsinformasjon om bruk av digitale helsetenester bidreg til effektiv ressursbruk

1.6 Tilrådingar

Riksrevisjonen tilrår at Helse- og omsorgsdepartementet:

• sørgjer for å auke kunnskapen om effektar av digital heimeoppfølging og om måla med å flytte spesialisthelsetenester heim blir nådde, slik at helsetenesta innfører tenesteformer som har ein ønskt effekt på ressursbruk og behandlingskapasitet

• følgjer opp at statlege verkemiddel støttar godt nok opp under samarbeid mellom helseføretak og kommunar om å flytte tenester nær pasienten. Det inkluderer også å leggje til rette for enklare tilgang til styringsdata som gir høve til å sjå samla effektar når helseføretak og kommunar samarbeider om tenester

• følgjer opp om innretninga av finansieringa i tilstrekkeleg grad stimulerer til å ta i bruk digital heimeoppfølging

• vurderer om det er heildigitale tilbod som kan vere eigna til å samle og tilby nasjonalt

Riksrevisjonen tilrår at Helse- og omsorgsdepartementet sørgjer for at dei regionale helseføretaka:

• set i verk tiltak for at alle helseføretaka tek i bruk moglegheitene for å flytte tenester nærmare pasientar ved hjelp av teknologi der dette har ønskt effekt, og særleg følgjer opp helseføretak som i liten grad tilbyr slike tenester

• legg til rette for at helseføretaka kan samarbeide med kommunale helsetenester om å tilby spesialisthelsetenester nær pasienten ved hjelp av teknologi

Dokument 3:3 (2025−2026) Riksrevisjonen si undersøking av bruk av teknologi for å flytte spesialisthelsetenester nær pasienten vart sendt til statsråden i Helse- og omsorgsdepartementet til fråsegn. Svaret frå statsråden følgjer i vedlegg 2 til Riksrevisjonens dokument.