Arne Haukvik (Sp):
« Eggemoen er mellom
anna peika ut som ny småflyplass, men kommunane i distriktet ønskjer ikkje
den auka trafikken. Småflydrivarane ønskjer heller ikkje å flytte til
Eggemoen.
Kvifor kan ikkje den eldste delen av
Fornebu framleis brukast som småflyplass? »
Statsråd Kjell Opseth:
Ved handsaminga
av St.prp.nr.90 (1991-1992) og
Innst.S.nr.1
(1992-1993) om ny hovudflyplass på Gardermoen vedtok Stortinget at staten
sin del av verdiane på Fornebu skulle tilførast utbyggingsselskapet og
nyttast til utbygginga av ny hovudflyplass på Gardermoen. Verdien av
arealet og bygga på Fornebu vurderte Luftfartsverket til 2.000 mill.
1992-kroner. Som omtala i St.prp.nr.1 Tl.09 (1994-1995) og i St.prp.nr.1
(1994-1995), ønskjer staten som grunneigar å sjå utviklinga av
Fornebuområdet i eit lengre perspektiv. Regjeringa har diford overført
ansvaret for etterbruken av Fornebu frå Luftfartsverket til Statsbygg frå 1.
januar 1995. Dei økonomiske krava for denne overføringa framgår av nemnde
proposisjon.
Ein småflyplass på den eldste delen av
Fornebu vil med støysoner og hinderavgrensingar leggje direkte og indirekte
beslag på eit område på meir enn 1.000 daa - indirekte fordi ein vil få
restriksjonar på bruken av areala. Dette vil vere i strid med Stortingets
føresetnad om at arealet skal nyttast til bustader, rekreasjon og
næringsverksemd.
Arne Haukvik (Sp):
Eg takkar for
svaret.
Statsråden seier at ein småflyplass på
Fornebu vil legge beslag på 1.000 daa. Eg har sjølv funne ut at det som
trengst til sjølve flyplassen, med administrasjonsbygg, er 300 daa eller 9 %
av Fornebu sitt nåverande areal. Eg trur nok at me må kunne be Statsbygg
vurdere differansen mellom 300 og 1.000 daa når det gjeld arealbehovet. Det
kan ikkje vere så gale som det høyrest ut for.
Dessutan: Allmennflyging, som òg har
ei viktig oppgåve, rekrutterer flygarar og anna personell. Drifta er på
Fornebu. Det er positivt ungdomsarbeid og haldningskapande, noko samfunnet
har bruk for. Bruk av allmennfly er viktig til redningsteneste/søk,
skogbrannvakt, anna overvaking og i Forsvarets teneste, flyambulanse og
transport av transplantasjonsorgan, og bruk av allmennfly til eigentransport
er effektiv bruk av tid. Dette er allmennfly som er nyttige å ha for
samfunnet. Eg kan ikkje skjøne at me skal jage dei langt vekk frå der det
er behov for dei. Kva meiner statsråden om det?
Statsråd Kjell Opseth:
Det er faktisk
slik at når det gjeld vurdering av areal i tilknyting til ein flyplass, også
ein flyplass for allmennflyging, er det Luftfartsverket som har kompetanse.
Og det er støysonene rundt ein flyplass som gjer at dette blir særleg
arealkrevjande. Eg ser difor ingen grunn til å dra i tvil at det er eit
arealbehov på 1.000 daa som her er ført opp.
Det er klårt at den flyginga som skal
gå føre seg på ein småflyplass, er viktig ut frå ulike omsyn. Difor kan ein
gjerne seie seg lei for at det ikkje har vore mogleg å finne areal til ein
slik flyplass nærare Oslo, men det har det altså ikkje vore.
Arne Haukvik (Sp):
Eg takkar for
svaret.
Me kan alle vere einige om at det er
synd at det er så vanskeleg å finne ein plass som passar til dette
føremålet. Det er klart eg ser at Fornebu er ei verdfull tomt som kan gi
betre økonomisk utteljing på annan måte. Samtidig er dette eit
samfunnsnyttig føremål som me skulle ha råd til, for me har bruk for denne
småflyplassen.
Eg tillèt meg å be statsråden vurdere
om dei iallfall kan utsette avgjerda til ein finn ein laglegare plass, som
brukarane kan dra nytte av. Det tar trass i alt ein del år før Fornebu kan
byggast ut. Det er ennå ikkje planlagt kva arealet skal nyttast til, så eg
vil be om at småflydrivarane kan få vere der i fleire år til ein finn fram
til ein annan plass som dei kan bruke.
Statsråd Kjell Opseth:
Eg vil berre
streke under at Stortinget har slått fast at Fornebu skal stengjast for
flytrafikk når den nye flyplassen på Gardermoen står ferdig. Eg har tenkt å
halde meg til det. Difor er det ikkje aktuelt å forlengje drifta på Fornebu
lenger enn til trafikken er flytta til Gardermoen.