Jørgen Holte (Sp):
Eg har fylgjande
spørsmål til kyrkje-, utdannings- og forskingsministeren:
Ifylgje oppslag i Arbeiderbladet 21.
februar 1997 får høgskular som uteksaminerer hovudfagsstudentar på normert
tid, ikkje utbetalt bonus, slik universiteta får.
Vil statsråden rette opp denne
forskjellshandsaminga av utdanningsinstitusjonane?
Statsråd Reidar Sandal:
Departementet
varsla i St.prp.nr.1 (1991-1992) at ein arbeider langs fleire linjer med
sikte på at studietilhøva skal bli betre og at studentane skal kunne nå
studiemåla på kortare tid. Det blei vidare varsla at ein legg vekt på
tiltak som kan stimulere institusjonane til omleggingar som både gir betre
undervisning og raskare studieprogresjon.
Som stimulans til å få
hovudfagsstudentane til å gjennomføre studia sine raskare, blei det ut frå
det som er nemnt ovanfor, m.a. innført ei ordning i 1992 med midlar til
universiteta basert på gjennomførte hovudfagseksamenar. Universiteta fekk
tildelt 10.000 kr for kvar mannleg hovudfagsstudent som avslutta sitt
studium i 1992, og 15.000 kr for kvar kvinneleg student som tok ein slik
eksamen.
Ordninga blei innført ved universiteta
fordi problema med gjennomføring var størst ved desse institusjonane.
Midlane som blei nytta til tiltaket, blei trekte inn frå universiteta sine
ordinære budsjettrammer. Universiteta er med andre ord ikkje tilførte
ekstra midlar gjennom denne ordninga. Høgskulane har ikkje vore med på å
finansiere tiltaket og er derfor heller ikkje blitt tildelt midlar gjennom
ordninga.
Eg viser til at departementet på
statsbudsjettet for 1997 har lagt inn ei resultatbasert tildeling på
grunnlag av talet på kandidatar på sjukepleiar- og førskulelærarutdanning i
budsjettrammene til statlege høgskular, og viser i den samanheng til
St.prp.nr.1 (1996-1997)
. Departementet har vidare varsla at ein vil vurdere ulike
resultatkriterium som grunnlag for ressursfordeling. På statsbudsjettet for
1997 er det omfordelt midlar mellom dei statlege høgskulane med det formålet
etter kvart å jamne ut forskjellar mellom høgskulane som ikkje er grunna i
faktiske kostnadsskilnader.
Eg vil vurdere tildeling av midlar til
uteksaminerte hovudfagsstudentar ved statlege høgskular i samband med ei
vidare omfordeling av midlar mellom desse institusjonane. Ein føresetnad
for ei eventuell slik ordning ved høgskulane vil likevel vere at midlane til
tiltaket må bli trekte inn frå høgskulesektoren, og at tiltaket gir effekt i
form av å stimulere til betre gjennomføring av hovudfag.
Jørgen Holte (Sp):
Eg takkar
statsråden for svaret, og tolkar han dit, spesielt i den siste delen av det
han sa, at han i den vurderinga som no skal gjerast, tar sikte på å rydde
bort den forskjellsbehandlinga som er mellom universitet og høgskular,
spesielt når det gjeld desse hovudfagsstudentane som vi veit i dag også blir
førte fram ved høgskulane våre. Eg vil gjerne ha stadfesta om mi
oppfatning, som eg her har prøvt å målbere, er i samsvar med det statsråden
tar sikte på å gjere i den vurderinga han gav uttrykk for.
Statsråd Reidar Sandal:
Eigentleg
meiner eg jo at spørsmålet som representanten Holte no stilte, burde vere
unødvendig på bakgrunn av det svaret eg allereie har gitt. Eg har presisert
at eg vil leggje opp til ei vurdering av det spørsmålet som er reist om å
tildele midlar til uteksaminerte hovudfagsstudentar ved høgskulane i samband
medden omfordelinga av midlar som vi skal arbeide vidare med. Eg har òg
understreka at ein føresetnad for denne gjennomgangen er at det er snakk om
å bruke midlar innafor høgskulesektoren på same vis som når det gjeld den
ordninga som gjeld for universiteta, der det ikkje har vore snakk om å
tilføre ekstra midlar, men å gje ein stimulans innafor den ramma som
universiteta allereie har.
Jørgen Holte (Sp):
Eg takkar for
svaret, og registrerer at det nok ikkje er den store usemja mellom meg og
statsråden om korleis dette skal finansierast, anten det går på universiteta
si ramme i forhold til hovudfagsstudentane eller det går på høgskulane si
ramme i forhold til hovudfagsstudentane. Det som er kjernepoenget her, slik
som eg tolkar statsråden, er at ein vil ryddebort den forskjellsbehandlinga
som her er mellom universiteta og høgskulane. Det er eg oppteken av å få ei
stadfesting av. Eg tolkar statsråden dit.
Statsråd Reidar Sandal:
Det er ikkje
grunnlag for noko meir oppklaring rundt tolkinga. Eg har sagt at det
spørsmålet som er reist, skal vi vurdere. Eg vil i dag ikkje seie kva
konklusjonen blir etter den vurderinga. Eg har òg sagt at i det arbeidet må
vi sjå på spørsmålet, dersom det blir aktuelt, innafor den økonomiske ramma
som høgskulesystemet har. Med det som opplysning, vil eg tru at
representanten Holte burde vere tilfreds med at ein får ein slik
gjennomgang, og så få tida vise kva den endelege konklusjonen blir.