Til Stortinget
Foreldingsreglane i strafferetten er knytt til adgangen til å
reise straffesak for domstolane. Når eit forhold er forelda, er
det ikkje lenger mogleg å bringe forholdet inn for domstolane. Moment
som talar for å ha ein foreldingsfrist, er at bevisa avtek over
tid. Etter som åra går, blir det vanskelegare å stille eventuelle
gjerningspersonar til ansvar for dei straffbare handlingane. Samtidig
er foreldingsreglane eit insitament for at strek må setjast på eit
eller anna tidspunkt.
Foreldingsinstituttet er viktig, og skal framleis gjelde for
dei aller fleste straffbare handlingar. Stortinget har vedteke å
fjerne foreldingsfristane på nokre typar alvorleg kriminalitet,
som drap, incest og valdtekt. Vedtaket tok sikte på å gjera det
mogleg å etterforske og straffeforfølgje somme av dei mest alvorlege,
straffbare handlingane uavhengig av om det har gått lang tid sidan
lovbrotet vart gjennomført.
I kjølvatnet av denne endringa meiner forslagsstillarane at det
er uheldig at ein ikkje også fjerna foreldingsfristen for handlingar
som blir ramma av straffelova § 148 første ledd første punktum andre straffalternativ,
tilfelle som gjeld mordbrann.
Straffelova § 148, den såkalla mordbrannparagrafen, har ei øvre
strafferamme på 21 år.
Ved denne type handlingar tar ein gjerningsperson livet av ein
eller fleire personar, i tillegg til at det blir påført store materielle
og menneskelege skadar. I slike saker kan det liggje både økonomiske
motiv og drapsmotiv bak handlinga. Svært mange menneskeliv kan også
gå tapt. Det kan støyte den allmenne rettskjensla om drap utført
etter straffelova § 148 kan foreldast, når andre drap ikkje blir
forelda.
Det har vore fleire døme på saker som er kompliserte og krevjande
å etterforske. I ein del saker kan dei økonomiske motiva for å motarbeide
etterforskinga vera så sterke at ein foreldingsfrist i desse sakene
er uheldig.
Forslagsstillarane vil understreke at det er viktig at foreldingsinstituttet
ikkje blir uthula. Samtidig vil forslagsstillarane peike på at når
nokon har begått alvorleg kriminalitet kor menneskeliv har gått
tapt som ei følgje av handlinga, bør ein ikkje føle seg trygg på at
ein ikkje blir stilt til ansvar.
Forslagstillarane meiner derfor at dette forslaget er ein naturleg
konsekvens av tidlegare vedtak i Stortinget. Intensjonen til forslagsstillarane
er at lovendringa skal gjelde dei tilfella kor brannen har dødsfall som
følgje, og at slike saker såleis ikkje lenger skal kunne foreldast.
På denne bakgrunn fremjar forslagsstillarane følgjande
forslag:
Vedtak til lov
om endring i straffeloven (fjerning av foreldesesfristen for
brudd på straffeloven § 148)
I
I lov 22. mai 1902 nr. 10 om Almindelig borgerlig Straffelov
(Straffeloven) skal § 66 tredje ledd nytt tredje punktum lyde:
Det samme gjelder overtredelser av straffeloven
§ 148 første ledd første punktum annet straffalternativ når noen
på grunn av forbrytelsen omkommer.
II
Denne lov trer i kraft straks.
6. oktober 2014