Grenseoverskridande kriminalitet er eit stadig større problem.
Smugling av varer, dyr, menneske og narkotika aukar i omfang. Verksemda
får stadig eit meir profesjonelt preg, og det ligg store pengar
i organisert kriminalitet.
Det å drive effektiv grensekontroll er viktig av fleire årsaker.
Organisert kriminalitet medfører store kostnader for samfunnet både
menneskeleg og økonomisk. Ulovleg innførsel av varer medfører også store
avgiftsunndragingar, samstundes som det gir stor økonomisk vinning
for organiserte kriminelle nettverk.
Tollvesenet er avhengig av metodar og verktøy som gjer det mogleg
å nedkjempe denne type kriminalitet effektivt. Forslagsstillarane
meiner såleis at det er sentralt at det blir satsa på teknologiske
hjelpemiddel som kan effektivisere dette arbeidet.
Fleire grenseovergangar på det sentrale Austlandet har fått etablert
ordningar med såkalla «smarte overvakingskamera» (ANPR). Desse bidreg
til skiltgjenkjenning og informasjon om kjøretøyet. Det gjer at
Tollvesenet på desse køyrbare grenseovergangane kan arbeide meir
effektivt og målretta. Erfaringar viser at kamerabruken fører til
at meir kriminell aktivitet blir avdekka. Det blir gjort fleire
store narkotikabeslag, og fleire avgiftsunndragingar blir oppdaga. Det
har også ført til meir generell kontrollaktivitet.
Når ein etablerer eit slikt system, vil det i framtida vera lettare
å utvikle kontrollrutinane, samt drive auka metodebruk. Det er grunn
til å tru at Tollvesenet kan gis eit betydeleg potensial for innsamling
og analyse av informasjon som kan brukast til utvelging av objekt
for kontroll. For eksempel gir kameraovervakinga tollmyndigheitene
ei oversikt over kva for køyretøy som kryssar grensa, og til kva
tidspunkt.
Forslagsstillarane ser ingen argument mot å etablere slike kamera
på alle køyrbare grenseovergangar i Noreg.
Forslagsstillarane meiner difor at regjeringa straks må starte
ei utgreiing om å innføre ordninga i heile landet, slik at systemet
kan etablerast på alle norske køyrbare grenseovergangar i løpet
av 2015.