Ved lov 30. juni 2000 nr. 57 vedtok Stortinget å endre
reglane for rehabiliteringspengar og attføringspengar etter
folketrygdlova kapittel 11. Endringane er mellom anna omtalt i St.prp.
nr. 1 (2001-2002) Skatte-, avgifts- og tollvedtak under kapittel
2.2.12.
I skattebetalingslova §§ 11 nr. 1
og 33 nr. 2 er det særreglar for trekk i dagpengar under
arbeidsløyse og andre korttidsytingar frå folketrygda.
Når rehabiliterings- og attføringspengar blir
likestilt med dagpengar under arbeidsløyse i lovgjevinga
elles (se punkt 3.1 i proposisjonen), bør likestillinga òg
gjelde på skattebetalingslova sitt område. Departementet
foreslår derfor visse endringar i skattebetalingslova § 11
nr. 1.
Utbetaling av attføringspengar og dagpengar under arbeidsløyse
vil i løpet av 2002 bli overført frå trygdeetaten
til Aetat. Denne endringa gjer det òg nødvendig
med enkelte endringar i skattebetalingslova §§ 11
nr. 1 og 33 nr. 2.
Etter skattebetalingslova § 11 nr. 1 første
punktum skal forskotstrekket vere 50 pst. når
den skattepliktige ikkje legg fram skattekort og arbeidsgjevaren heller
ikkje på annan måte har fått dei opplysningane som
går fram av skattekortet. Etter andre punktum gjeld det
same for trygdekontoret når det skal gjennomføre
forskotstrekk i visse ytingar etter folketrygdlova. Forskotstrekk
i andre ytingar som nemnt i skattebetalingslova § 5
bokstav e blir gjennomført med 30 pst. Rehabiliterings-
og attføringspengar fell inn under opprekninga i skattebetalingslova § 5
bokstav e.
Departementet foreslår at skattebetalingslova § 11 nr.
1 andre punktum blir endra slik at hovudregelen om 50 pst.
forskotstrekk når den skattepliktige ikkje legg fram skattekort,
og den som skal gjennomføre trekket heller ikkje har fått
dei opplysningane som går fram av skattekortet, omfattar
rehabiliteringspengar og attføringspengar.
Når Aetat overtek ansvaret for å utbetale dagpengar
under arbeidsløyse og attføringspengar, bør
trekkplikta etter første punktum òg gjelde for
Aetat. Departementet foreslår at § 11
nr. 1 andre punktum blir endra slik at det går fram at
trekkplikta gjeld utan omsyn til kven som utbetalar ytingar som
nemnt der.
Forslaget om å likestille rehabiliterings- og attføringspengar
med dagpengar under arbeidsløyse i skattebetalingslova § 11
nr. 1 er ei oppfølging av tidlegare lovendringar. Framlegget
er derfor ikkje sendt på høyring.
Departementet viser til forslag til endring av skattebetalingslova § 11
nr. 1 andre punktum. Departementet foreslår at endringa
trer i kraft straks.
Etter skattebetalingslova § 33 nr. 1 kan skatteoppkrevjaren
drive inn forskotsskatt, restskatt, etterskotsskatt eller anna utligna
skatt som ikkje blir betalt i rett tid ved trekk i løn
eller andre liknande ytingar etter reglane i dekningslova § 2-7.
Etter § 33 nr. 2 første punktum blir
skattetrekk etter § 33 sett i verk ved at det
i rekommandert brev eller på annan påviseleg måte
blir gitt pålegg til arbeidsgivaren eller den som tek hand
om utbetalinga på vegne av arbeidsgivaren om å halde
trekkbeløpet tilbake. Etter tredje punktum gjeld trekkpålegget òg
for trygdekontoret når dette utbetalar dagpengar under
arbeidsløyse etter kapittel 4 i folketrygdlova.
Trekkpålegget bør òg gjelde Aetat
når etaten overtek ansvaret for å utbetale dagpengar
under arbeidsløyse. Departementet foreslår at
regelen blir endra slik at det går fram at trekkpålegget
gjeld det organet som utbetalar ytingane som nemnt i andre og tredje
punktum. Departementet foreslår samtidig at reglane som
i dag er gitt i andre og tredje punktum blir samla i eit nytt andre
punktum. Den sistnemnte endringa inneber inga realitetsendring.
Departementet viser til forslag til endring av skattebetalingslova § 33
nr. 2 andre og tredje punktum. Departementet foreslår at
endringa trer i kraft straks.
Komiteen slutter seg til forslaget
om endring av skattebetalingsloven § 11 nr. 1
og § 33 nr. 2 og ikrafttredelses- og virkningstidspunkt.