Til Stortinget.

       Regjeringa legg i meldinga fram forslag om at Norsk rikskringkasting skal kunne etablere ein ny fjernsynskanal, NRK-2, og gjer greie for dei planane som ligg føre om eit samarbeid mellom Norsk rikskringkasting og Telenor AS om etableringa av eit sams eigd aksjeselskap for det samla sendarnettet for kringkasting i Noreg. Desse forslaga må sjåast i samanheng med Ot.prp. nr. 69 (1994-1995) , der det er lagt fram forslag om dei lovendringane som er nødvendige for at Norsk rikskringkasting skal omorganiserast frå stifting til aksjeselskap. Det vert opplyst at departementet i samanheng med budsjettet kjem attende med ei verdivurdering av NRK i samband med omorganiseringa til aksjeselskap, her medrekna fastsetjing av aksjekapital.