EU sitt program for ei effektiv integrering
av informasjons- og kommunikasjonsteknologi (IKT) i utdannings-
og opplæringssystema i Europa (e-læringsprogrammet),
vart vedteke i EU 5.desember 2003 og skal vare i tidsrommet 2004-2006.
Programmet er ei vidareføring og oppgradering av handlingsplanen
for e læring frå 2001 under eEuropa-paraplyen,
som Noreg tok del i. Noreg har gjennom EFTA kome med innspel til
utforminga av programmet.
Norsk deltaking i programmet gjer det naudsynt
med eit budsjettvedtak for treårsperioden. Stortinget må difor gi
samtykke i å ta del i avgjerda i EØS-komiteen,
jf. §26 andre leddet i Grunnlova. For at Noreg skal kunne ta
del i programmet så tidleg som råd, fremjer departementet
proposisjonen før EØS-komiteen tek si avgjerd.
Departementet ventar ikkje at det vil kome endringar i
utkastet til avgjerd i EØS-komiteen. Dersom den endelege
avgjerda syner stort avvik frå det utkastet som er lagt
fram i proposisjonen, vil saka verte lagt fram for Stortinget på nytt.
Det overordna målet for programmet
er å støtte og vidareutvikle ein effektiv bruk
av IKT i europeiske utdannings- og opplæringssystem, for
såleis å medverke til at kvaliteten på utdanninga
vert betre og å fremje tilpassinga av systemet til dei
krava som kunnskapssamfunnet stiller innafor ramma av livslang læring.
Dei særskilde måla for programmet
er:
– å identifisere
dei aktuelle aktørane og informere dei om korleis e-læring
kan nyttast for å fremje digital kompetanse, og såleis
medverke til å styrkje sosial utjamning og personleg utvikling,
og å fremje dialogen mellom kulturar,
– å utnytte potensialet
til e-læring for å styrkje den europeiske dimensjonen
innafor utdanning,
– å skipe ordningar for å støtte
utviklinga av europeiske produkt og tenester av høg kvalitet,
og for å utveksle og overføre god praksis,
– å utnytte potensialet
for e-læring innafor ramma av nyskaping i undervisningsmetodar,
med sikte på å betre kvaliteten på læringsprosessen
og å fremje sjølvstendet til dei som skal lære.
Den finansielle ramma for programmet er på 44
mill. euro for heile treårsperioden. Løyvinga
frå EFTA vil på dagens nivå (2,19pst.)
vere 0,9636 mill. euro over tre år. Noreg sin del (94,94pst.)
vil vere 914842 euro. Med ein eurokurs på 8,6 vil dette
utgjere om lag 7,8 mill. kroner over tre år. I tillegg
til dette vil Noreg vere plikta til å betale 292500 euro
i administrasjonsutgifter til EU, noko som vil svare til om lag
2,5 mill. kroner. Totalt blir dette om lag 10,3 mill. kroner, noko
som vil seie ei løyving per år i snitt på om
lag 3,4 mill. kroner frå Noreg.
I tillegg til den økonomiske løyvinga
må dei statane som sluttar seg til programmet, skipa ei
nasjonal eining som skal administrere programmet. Departementet
ser det naturleg at administrasjonen av e læringsprogrammet
vert lagt til det nyskipa nasjonale organet Senter for internasjonalisering
av høgre utdanning som ligg i Bergen. Dette organet vil òg
administrere andre program som til dømes Sokrates og Erasmus
Mundus. Det er venta at om lag 500000 kroner vil gå med
til administrasjonen av e-læringsprogrammet.
Medrekna desse midlane vil programmet i snitt
koste Noreg om lag 3,9 mill. kroner kvart år i tre år.
Regjeringa vil kome attende til budsjettkonsekvensane av saka i
samanheng med Revidert nasjonalbudsjett for 2004. Utgiftene vil
verte dekte over statsbudsjettet, kap. 248.
Gjennomføringa i norsk rett gjer det
ikkje naudsynt med lov- eller forskriftsendring.
E-læringsprogrammet vil vere med på å styrke
samhandlinga mellom høgare utdanningsinstitusjonar i Noreg
og Europa. Det vil òg vere med på å knyte
skolar i Europa saman i eit nettverk. Noreg har gode røynsle frå deltaking
i noverande program i utdanningssektoren, med den auka vekt som
vert lagt på internasjonalisering i alle delar av sektoren.
Utdannings- og forskingsdepartementet rår difor til at
Noreg tek del i ei avgjerd i EØS-komiteen om innlemming
i EØS-avtala av e-læringsprogrammet, og Utanriksdepartementet sluttar
seg til dette.
Komiteen, medlemene frå Høgre, Ine Marie Eriksen, Jan Olav Olsen, Raymond Robertsen og Søren Fredrik Voie, frå Arbeidarpartiet, Vidar Bjørnstad, Eva M. Nielsen og Karita Bekkemellem Orheim, frå Framstegspartiet, Ursula Evje og Arne Sortevik, frå Sosialistisk Venstreparti, Lena Jensen og leiaren Rolf Reikvam, frå Kristeleg Folkeparti, Arne Lyngstad og Elsa Skarbøvik, frå Senterpartiet, Rune J. Skjælaaen, frå Venstre, Trine Skei Grande, og representanten Jan Simonsen, har ingen merknader og sluttar seg til proposisjonen.
Utkast til innstilling om saka har vore lagt fram for utanrikskomiteen til uttale, jf. referat frå Stortinget sitt møte 22.mars 2004. Utanrikskomiteen har ikkje merknader til innstillinga, og komiteen viser til dette.
Komiteen viser til
proposisjonen og rår Stortinget til å gjere følgjande
vedtak:
Stortinget gjev samtykke til at Noreg tek del
i ei avgjerd i EØS-komiteen om innlemming i EØS-avtala av
eit fleirårig program for ei effektiv integrering av informasjons-
og kommunikasjonsteknologi (IKT) i utdannings- og opplæringssystema
i Europa (e-læringsprogrammet).
Oslo, i kyrkje-, utdannings- og forskingskomiteen, den 30.mars 2004
Rolf Reikvam
leiar |
Vidar Bjørnstad
ordførar |