EØS-komiteen vedtok 7. juli
2006 å endre vedlegg IX til EØS-avtala til å omfatte
direktiv 2005/60/EF av 26. oktober 2005 om tiltak
for å hindre at det finansielle systemet vert nytta til
kvitvasking av pengar og finansiering av terrorisme.
Ettersom gjennomføringa av rettsakta
i norsk rett krev lovendring, vart avgjerda i EØS-komiteen
teken med atterhald for samtykke frå Stortinget til godkjenning
i samsvar med § 26 andre leddet i Grunnlova.
Avgjerda i EØS-komiteen og direktiv
2005/60/EF i uoffisiell norsk omsetjing følgjer
som trykte vedlegg til proposisjonen.
I direktiv 2005/60/EF er det
fastsett førebyggjande tiltak mot bruk av det finansielle
systemet til kvitvasking av pengar og til finansiering av terrorisme.
Direktivet byggjer på tidlegare direktiv på dette
området, men utvidar tiltaka m.a. i høve til tiltak
mot finansiering av terrorisme og verkeområdet
til direktivet. Direktivet kjem i staden for tidlegare kvitvaskingsdirektiv
(direktiv 91/308/EØF og direktiv 2001/97/EF).
Direktivet følgjer opp tilrådingar
frå Financial Action Task Force (FATF) om tiltak mot kvitvasking av
utbytte (revidert i juni 2003) og delar av dei spesielle
tilrådingane frå FATF mot terrorfinansiering frå oktober
2001, med samordna gjennomføring og bruk av tilrådingane
på fellesskapsnivå. FATF er ein internasjonal
organisasjon med deltakarar frå alle OECD-land, medrekna
Noreg, og einskilde andre land. Sidan skipinga i 1989 har FATF utarbeidd
tilrådingar om tiltak mot kvitvasking av utbytte. Tilrådingane
gjeld m.a. identifisering av kundar, og gransking og rapportering av
transaksjonar ved mistanke om at transaksjonen er knytt til utbytte
frå ei straffbar handling.
På bakgrunn av terroråtaka
i USA 11. september 2001 har FATF utvida verkeområdet sitt
til å omfatte tiltak mot terrorfinansiering. Føremålet
med tilleggstilrådingane er m.a. å hindre at terroristar
og støttespelarane deira får tilgang til det internasjonale
finansielle systemet, og dessutan å kunne avdekkje kven
som står bak innsamling av midlar til terrorføremål.
Tilleggstilrådingane gjeld m.a. tiltak for å sikre
opplysningar om identiteten til avsendaren ved elektronisk overføring
av midlar.
Direktivet inneheld ein ny definisjon av "kvitvasking av
pengar" ved at finansiering av terrorisme òg er omfatta.
Tidlegare kvitvaskingsdirektiv krev nasjonal
regulering av ei rekkje ulike typar institusjonar, m.a. finansinstitusjonar,
kredittinstitusjonar, verdipapirføretak, eigedomsmeklarar,
advokatar og revisorar. Etter det nye direktivet skal verkeområdet
for nasjonale reglar òg omfatte livsforsikringsmeklarar
og tilbydarar av tenester som omfattar hjelp ved etablering eller
leiing av selskap og såkalla trustar. Dessutan skal alle
fysiske og juridiske personar som handlar med varer og aksepterer
betaling i kontantar over ein terskel på 15 000 euro, omfattast.
Sett i høve til tidlegare direktiv på dette området
opplyser direktivet om endringar i krav til identifikasjon av kundar,
m.a. ved at prosedyrane skal gjennomførast på grunnlag
av ei risikovurdering. Direktivet opnar for at medlemsstatane kan
tillate meir lempelege identifikasjonskrav når det er lågare
risiko for kvitvasking av pengar. Det skal nyttast skjerpa identifikasjonskrav
når risikoen for kvitvasking vert rekna som stor - som
minstekrav i tilfelle der kunden ikkje er fysisk til stades, ved
korrespondentbankavtaler mellom ein EØS-institusjon og
institusjonar frå tredjestatar (korrespondentbankar er
bankar som avtalar at betalingstransaksjonar over landegrensene
skal finne stad gjennom overføringar mellom kontoane som
dei høvesvise bankane har hos kvarandre) eller overfor samband
med utanlandske såkalla politisk utsette personar (dette
tyder fysiske personar som har eller har hatt høgtståande
offentlege stillingar, familiemedlemmene deira og andre som dei
er nært knytte til).
Vidare inneber direktivet at det i nasjonal
rett skal stillast krav til å slå fast kven som
er den reelle eigaren, og til å forstå selskapskonstruksjonen
til kunden.
Etter direktivet skal det setjast i verk føremålstenlege tiltak
for å unngå at tilsette og familiane deira vert utsette
for truslar etter rapporteringar.
Det skal førast tilsyn med at alle
institusjonar og personar som er omfatta av direktivet, stettar
krava i direktivet.
EU-kommisjonen har fått fullmakt til å vedta
einskilde gjennomføringstiltak. Det er skipa
ein komité for kvitvaskingsspørsmål som
skal hjelpe Kommisjonen i dette arbeidet.
Finansdepartementet har varsla at eit utval
vil få i oppdrag å vurdere om det er naudsynt
med endringar i kvitvaskingslova og kvitvaskingsforskrifta til gjennomføring
av EØS-plikter som svarar til direktiv 2005/60/EF
og til gjennomføringsrettsakter som er fastsette av Kommisjonen
til utfylling av det nemnde direktivet, og å kome med framlegg
til slike naudsynte endringar.
Dei gjeldande reglane om tiltak mot kvitvasking
er gjevne i lov av 20. juni 2003 nr. 41 om tiltak mot kvitvasking
av utbytte frå straffbare handlingar mv. (kvitvaskingslova)
og forskrift av 10. desember 2003 nr. 1487 om tiltak mot kvitvasking
av utbytte frå straffbare handlingar mv. (kvitvaskingsforskrifta),
som tok til gjelde 1. januar 2004. Desse gjennomfører m.a.
det første og andre kvitvaskingsdirektivet til EU, saman
med nokre av tilrådingane frå FATF.
Det vil vere naudsynt med visse endringar i
gjeldande reglar (lova og forskrifta) for å gjennomføre direktivet.
Det vil vere naudsynt å endre krava til kundeidentifikasjonsprosedyrane,
skjerpe identifikasjonskrava når det gjeld politisk utsette
personar og å skjerpe krava til gransking av kven som er
reell eigar. Det vil òg vere naudsynt med endringar i regelverket for å sikre
tilsyn med at alle institusjonar og personar som er omfatta av direktivet,
stettar krava i direktivet.
Gjennomføringa av direktivet vil få nokre økonomiske
og administrative konsekvensar for styresmaktene, m.a. ved at det
skal førast tilsyn med at alle institusjonar og personar
som er omfatta av direktivet, stettar krava i direktivet.
Men etter Finansdepartementet si vurdering krev direktivet
ikkje tiltak som vil føre til vesentlege meirkostnader
verken for næringslivet eller for styresmaktene.
Det vert lagt til grunn at gjennomføringa
av direktivet på nokre punkt vil føre til auka
kostnader for næringslivet. Dette gjeld m.a. i høve
til reglar om skjerpa krav til kundeidentifikasjon. På den
andre sida vil den tilgangen som direktivet gjev til å tillate
forenkla kundeidentifikasjon i tilfelle der risikoen vert rekna
som låg, leggje til rette for å avgrense kostnadene for
næringslivet.
Direktivet skal medverke til å hindre
at finanssektoren og andre utsette delar av økonomien vert
nytta til å kvitvaske utbytte frå straffbare handlingar
eller vert nytta i samband med terrorfinansiering. Gjennom førebyggjande
tiltak tek direktivet sikte på å motkjempe slik
kriminalitet.
Regjeringa rår til at Noreg godkjenner
avgjerda i EØS-komiteen om endring av vedlegg IX til EØS-avtala
om innlemming av direktiv 2005/60/EF om tiltak
for å hindre at det finansielle systemet vert nytta til kvitvasking
og finansiering av terrorisme.
Komiteen, medlemmene fra Arbeiderpartiet,
Marianne Aasen Agdestein, Rolf Terje Klungland, Torgeir Micaelsen, Reidar
Sandal, lederen Karl Eirik Schjøtt-Pedersen og Eirin Kristin
Sund, fra Fremskrittspartiet, Gjermund Hagesæter, Ulf Leirstein,
Jørund Rytman og Christian Tybring-Gjedde, fra Høyre, Svein
Flåtten, Peter Skovholt Gitmark og Jan Tore Sanner, fra
Sosialistisk Venstreparti, Magnar Lund Bergo og Heikki Holmås,
fra Kristelig Folkeparti, Hans Olav Syversen, fra Senterpartiet,
Per Olaf Lundteigen, og fra Venstre, Lars Sponheim, viser
til at EØS-komiteens beslutning nr. 87/2006 av
7. juli 2006 om innlemming i EØS-avtalen av direktiv 2005/60/EF
av 26. oktober 2005 om tiltak for å hindre at det finansielle
systemet blir benyttet til hvitvasking og finansiering av terrorisme,
krever Stortingets samtykke på grunnlag av Grunnloven § 26 annet
ledd, jf. EØS-avtalen art. 103. Komiteen har forelagt
innstillingsutkastet for utenrikskomiteen, som opplyser at den ikke
har merknader til utkastet til innstilling.
Komiteen har for øvrig ingen merknader, viser til proposisjonen og rår Stortinget til å gjøre følgende
vedtak:
Stortinget gir samtykke til godkjenning av EØS-komiteens beslutning nr. 87/2006 av 7. juli 2006 om innlemming i EØS-avtalen av direktiv 2005/60/EF av 26. oktober 2005 om tiltak for å hindre at det finansielle systemet blir benyttet til hvitvasking og finansiering av terrorisme.
Oslo, i finanskomiteen, den 30. november 2006
Karl Eirik Schjøtt-Pedersen
leder |
Marianne Aasen Agdestein
ordfører |