Samferdselsdepartementet legg i proposisjonen fram
forslag om utbygging av rv. 2 på strekninga Kongsvinger–Slomarka
i Hedmark. Dette er andre etappe av utbygginga av rv. 2 mellom Kongsvinger
og Kløfta i Hedmark og Akershus. Finansieringa av prosjektet er
basert på statlege midlar og bompengar. Samferdselsdepartementet
legg opp til at anleggsarbeida på strekninga Kongsvinger–Slomarka
kan starta i 2011, og at prosjektet kan opnast for trafikk hausten
2014.
Riksveg 2 Kongsvinger–Kløfta er lokalpolitisk vurdert
som eitt bompengeprosjekt. Det er lokal tilslutning til at utbygginga
av heile strekninga skal delfinansierast med bompengar. Gjennom behandlinga
av St.prp. nr. 47 (2003–2004) slutta Stortinget seg til eit opplegg
for delvis bompengefinansiering av strekninga Kløfta–Nybakk. Gjennom
behandlinga av St.prp. nr. 64 (2004–2005) blei utbyggingsstandarden
for strekninga endra frå tofelts veg til smal firefeltveg med breidde
16 m. Første del blei opna for trafikk i 2006, og heile strekninga
sto ferdig i 2007.
I St.meld. nr. 16 (2008–2009) Nasjonal transportplan
2010–2019 er det lagt til grunn at utbygginga av rv. 2 mellom Kongsvinger
og Kløfta skal vidareførast i første fireårsperiode. Det er lagt
til grunn statlege midlar til anleggsstart på strekninga Kongsvinger–Slomarka i
første fireårsperiode under føresetnad av tilslutning til eit opplegg
for delvis bompengefinansiering av prosjektet. Fylkestinga i Hedmark
og Akershus har seinare slutta seg til eit slikt opplegg.
Riksveg 2 er eit viktig regionalt samband frå Solør/Glomdalsregionen
til Oslo/Akershus, og er mellomriksveg til Sverige. Vegen har i
tillegg ein funksjon som lokalveg, og på lange strekningar er det
bustader langs vegen, mange avkøyrsler og manglande tilbod for gåande
og syklande. Riksveg 2 mellom Kongsvinger og Kløfta er om lag 60
km og har ein årsdøgntrafikk (ÅDT) som varierer mellom 7 000 og
14 000 køyretøy. Det er nedsett fartsgrense på 55 pst. av strekninga,
og årleg er det rundt 20 ulukker med personskade.
Det ligg føre planar om å forlengja E16 frå Hønefoss
til Gävle i Sverige. Dersom desse planane blir realiserte, vil rv. 2
bli ein del av ein framtidig E16 mellom Gävle og Bergen.
Ny trasé for rv. 2 vil betra situasjonen for
trafikken mellom Oslo og Kongsvinger/Sverige, og vil føra til redusert
ulukkesrisiko både på eksisterande rv. 2 som blir lokalveg med gang-
og sykkelvegfunksjon, og på ny rv. 2.
Strekninga frå Kurusand i Kongsvinger til Slomarka
i Sør-Odal er om lag 16,5 km lang. Ny veg blir bygd langs fv. 175
(riksveg før 2010) og kryssar Glomma med ny bru. Ny veg gjennom Sør-Odal
blir bygd langs noverande rv. 2 nord for Glomma. Vegen skal byggjast
som firefelts veg med vegbreidde 16,5 m. Prosjektet tar om lag 1 000
daa matjord.
Samferdselsdepartementet legg til grunn ei styringsramme
omrekna til 2011-prisnivå på 1 700 mill. kroner og kostnadsramme
på 1 816 mill. kroner.
Netto nytte for prosjektet (NN) er rekna til
om lag -210 mill. 2010-kroner. Netto nytte over budsjettkostnad
(NNB) er rekna til om lag -0,25. Netto nytte over totale kostnader
er rekna til -0,13.
Den lokalpolitiske handsaming går fram av pkt. 3
i proposisjonen.
Bompengeselskapet Rv2 Kongsvingervegen AS blei
oppretta i 2000 med Akershus og Hedmark fylkeskommunar som eigarar.
Selskapet skal vera bompengeselskap for utbygginga av rv. 2 på heile
strekninga Kongsvinger–Kløfta.
Utbygginga av rv. 2 på strekninga Kongsvinger–Slomarka
er føresett finansiert med statlege midlar og bompengar. Finansieringsplanen
er vist i tabellen nedanfor:
Finansieringsplan for rv. 2
Kongsvinger–Slomarka. Mill. 2011-kr
| 2006–2009 | 2010–2013 | 2014–2017 | Sum |
Statlege midlar | | 305 | 410 | 715 |
Bompengar | 301 | 1 145 | -190 | 985 |
Sum | 30 | 1 450 | 220 | 1 700 |
1 Forskottering av utgifter til planlegging.
Det er lagt opp til å etablera bomstasjonar
både på ny rv. 2 og fv. 175 ved SIVA. I tillegg er det føresett
ein bomstasjon på framtidig lokalveg (noverande rv. 2) ved Øyset.
Det er lagt til grunn etterskotsinnkrevjing i automatiske, ubemanna stasjonar.
I proposisjonen er det lagt til grunn samla bompengeinntekter
på 1 775 mill. kroner i 2011-prisnivå, fordelte med 985 mill. kroner
til å dekkja delar av investeringskostnadene, 655 mill. kroner i
netto renteutgifter, inkl. kostnader ved at bompengeselskapet forskotterer
delar av dei statlege løyvingane, og 135 mill. kroner til å dekkja
innkrevjingskostnader og kostnader til drift av bompengeselskapet.
Basisføresetnadene for finansieringsanalysen går
elles fram av pkt. 5 i proposisjonen. Med føresetnadene er innkrevjingsperioden
rekna til om lag 15 år.
Samferdselsdepartementet har merka seg at Hedmark
og Akershus fylkeskommunar har vurdert utbygginga av heile rv. 2
mellom Kløfta og Kongsvinger som eitt bompengeprosjekt, og har slutta
seg til at heile strekninga skal delfinansierast med inntil 60 pst.
bompengar. Første etappe som omfattar strekninga Kløfta–Nybakk blei opna
for trafikk i 2006/2007. Det er lokalpolitisk tilslutning til at
strekninga Kongsvinger–Slomarka skal byggjast som andre etappe.
Sjølv om jordvernomsyn gjer at det er ulike
syn lokalt når det gjeld trasévalg har prosjektet brei lokalpolitisk
tilslutning. Når strekninga Kongsvinger–Slomarka er ferdigstilt,
står det att å byggja ut den om lag 33 km lange strekninga Slomarka–Herbergåsen–Nybakk
i Sør-Odal og Nes kommunar. Fleirtalet i transport- og kommunikasjonskomiteen
har i samband med Stortinget si handsaming av St.meld. nr. 16 (2008–2009)
Nasjonal transportplan 2010–2019, jf. Innst. S. nr. 300 (2008–2009),
lagt til grunn at regjeringa vurderer om det er mogleg å byggja
ut dei to prosjekta på rv. 2 samanhengande, dvs. Kongsvinger–Slomarka
og Slomarka–Herbergåsen–Nybakk. Det ligg ikkje føre tilstrekkelege
avklaringar til at eit samla forslag til finansieringsopplegg for
dei attståande strekningane kan leggjast fram for Stortinget no.
Utbygging av rv. 2 på strekninga Slomarka–Herbergåsen–Nybakk vil
bli vurdert i samband med Nasjonal transportplan for perioden 2014–2023.
Samferdselsdepartementet har merka seg at Akershus
og Hedmark fylkeskommunar har fatta vedtak som inneber at dei står
som likeverdige garantistar for låneopptak i samband med utbygginga
av strekninga Kongsvinger–Slomarka i Hedmark fylke. Departementet
føreset difor at det blir gjennomført ei grundig samla vurdering av
økonomien til bompengeselskapet før avslutning av bompengeinnkrevjinga
knytt til prosjektet Kløfta–Nybakk.
Etter at Stortinget har fatta vedtak om utbygging og
finansiering av rv. 2 på strekninga Kongsvinger (Kurusand)–Slomarka
i Hedmark, vil det bli inngått avtale mellom Vegdirektoratet og
bompengeselskapet i tråd med gjeldande standardavtale og dei føresetnadene
som er lagt til grunn i proposisjonen.