Jørgen Holte (Sp):
Eg vil stille
fylgjande spørsmål til kyrkje-, utdannings- og forskingsministeren:
I læreplanverket for den 10-årige
grunnskulen vert det vist til eit eige rundskriv frå departementet når det
gjeld fordelinga av timetal på kvart årstrinn. Vi er kjende med at kommunar
ikkje har mottatt dette rundskrivet enno.
Vil statsråden sette fortgang i denne
saken slik at kommunane får komme videre i planleggingsarbeidet?
Statsråd Reidar Sandal:
Fag- og
timefordelinga for hovudtrinna i den 10-årige grunnskulen er lagd inn i det
trykte læreplanverket som er sendt kommunar, skular og andre aktuelle
instansar.
Når det gjeld timetalet på kvart
årssteg, viser planen til eige rundskriv frå departementet. Dette
rundskrivet er under utsending til kommunane.
Jørgen Holte (Sp):
Eg takkar for
svaret frå statsråden. Det er eit stort behov for at dette som er under
arbeid, no blir sluttført rimeleg fort. Eg er kjend med at det i delar av
planverktøyet som er utsendt, er gitt signal om at rundskrivet vil komme.
Når ein har annonsert det lenge, blir det spekulasjonar om ei reform som
både vi i Senterpartiet og statsråden sjølv har ein viss eigedomsrett til,
og som vi føler må få ein heilt annan goodwill enn ein no er i ferd med å
legge til rette for. Det er mange gode grunnar for at kommunane no bør få
det, helst i går, og det har å gjere med at både kommunane og den enkelte
skulen no planlegg neste skuleår. Det ligg ting i St.meld.nr.15
(1995-1996), som la grunnlaget for det læreplanverket som vi er kjende med,
og det er mange ting der som tilseier at vi no må få ei avklaring. Det går
på fordeling av timar innanfor småskuletrinnet, osv. Kan statsråden gi eit
klarare signal om tempoet?
Statsråd Reidar Sandal:
Det nye store,
flotte og inspirerande læreplanverket er nyleg sendt ut frå departementet
til alle det vedkjem - først og fremst dei som skal bruke det i si
pedagogiske verksemd. Rundskrivet som representanten Holte etterlyste, er
under utsending. Eg trudde faktisk at med eit så klart og positivt svar
ville representanten Holte vere tilfreds, og at saka dermed var løyst.
Dette rundskrivet er politisk klarert - det er den tekniske gjennomføringa
og utsendinga det no dreier seg om. Det er svært få dagar - svært få dagar
- til rundskrivet er komme ut. Det er under utsending!
Jørgen Holte (Sp):
Eg takkar for
svaret og er glad for at statsråden her seier at dette rundskrivet er under
utsending og vil vere i kommunane og ved den enkelte skule - der det skal
vere - om få dagar. Det dreier seg kort og godt om om den posttenesta som
vi har vedtatt i Stortinget, fungerer slik at dette rundskrivet kjem fram
til dei som skal ha det, rimeleg raskt. Eg er tilfreds med den siste
presiseringa, og eg vil gjerne føye til at dette spørsmålet hadde ikkje
blitt stilt dersom vi ikkje hadde ein underbygd mistanke om at det har lege
ein politisk uavklart situasjon rundt denne saka.
Statsråd Reidar Sandal:
Situasjonen og
svaret skulle eigentleg ikkje tilseie noka nærare utdjuping frå mi side.
Men eg vil få lov å peike på som ei faktisk konstatering at sjølv med det
reformtempoet og med den breidda vi har i reformarbeidet innanfor
utdanningssektoren samla sett i dette landet, må vi få høve til å handtere
sakene skikkeleg og førebu dei godt nok. No er vi à jour både med
læreplanverket og med dette rundskrivet, nesten eitt år før den nye
læreplanen og den nye grunnskulereforma skal takast i bruk. Det er få
eksempel på at ein har førebudd eit reformarbeid så godt og er i så god rute
som vi snakkar om i dette tilfellet. Det er eg svært tilfreds med, og eg er
faktisk stolt over at vi er komne så pass langt så tidleg.