Til Stortinget
Det kommunale sjølvstyret har vore ein grunnpilar i
det norske folkestyret sidan 1837. Eit sterkt lokaldemokrati medverkar
til at utviklinga i lokalsamfunn generelt og lokale, kollektive
vedtak og reformer spesielt speglar preferansane og ynska til lokalbefolkninga.
Ein annan føremon med det kommunale sjølvstyret
er den demokratiske dynamikken som denne styreforma kan medføre:
Brei deltaking i lokale, politiske prosessar aukar sannsynet for
at kommunestyre fungerer som politiske laboratorium som genererer
konstruktive idear, løysingar og reformer. Dette kan auke
velferda og trivnaden i lokalsamfunn. Sjansane for at lokaldemokrati
utviser slik "innovasjonskraft" aukar med talet på borgarar
som aktivt engasjerer seg i lokalpolitikk og samstundes opererer
innanfor rammer - spesielt økonomiske - som gjer kreativ
politikkutvikling realistisk.
Makt- og demokratiutgreiinga har derimot vist at rammene til
det kommunale lokaldemokratiet har blitt markert avgrensa dei siste
20 åra. Årsaka til denne utviklinga er todelt:
Dels har statlege likskapskrav og nasjonale standardar svekka den
lokale handlefridommen kommunane har hatt til å tilpasse
tenestetilbod etter lokale tilhøve, dels har svekka kommunaløkonomi
og stramme budsjett redusert høvet til å vere nyskapande
og stette lokale preferansar generelt. I tillegg svekkjer budsjettkrisa
incitamenta til å ta på seg lokalpolitiske verv
fordi det reduserte (økonomiske) handlingsrommet minskar
sjansane for å setje lokale, politiske initiativ og langsiktige
planar ut i livet.
I sum kan utviklinga til det lokale sjølvstyret dei siste
tiåra oppsummerast som ein overgang frå lokal autonomi
til statleg styring. Samstundes minskar tilliten til lokale, folkevalde
organ, og det lokale sjølvstyret si rolle som demokratisk
lokomotiv og politisk laboratorium vert svekka.
Makt- og demokratiutgreiinga peikar på fleire teikn
i tida som syner at det lokale sjølvstyret misser attraksjonskraft:
Redusert valdeltaking
I siste kommuneval røysta 60,4 pst. av dei røysteføre,
mot 81 pst. i 1963. Blant ungdom er nedgangen i valdeltaking markant;
berre 33 pst. røysta i 1999, mot 54 pst. i 1971. I siste
fylkestingsval røysta totalt 56,8 pst., mot 70,3 pst. i
det aller fyrste fylkestingsvalet i 1975.
Mindre populære politiske parti og folkevalde organ
Talet på medlemmer i dei politiske partia er omtrent
halvert på 20 år. Samtidig er det stadig færre
som er villige til å la seg nominere til vallister, og
heile to tredelar av dei lokalt folkevalde takkar for seg etter
kvar periode i kommunestyret utan å ta attval. Sjølv
blant ordførarar er det merkbart at mange vegrar seg for å stille
på nytt.
Demokratiet som styreform er derimot avhengig av høg
og meiningsfull deltaking på lokalt nivå for å utvikle
løysingar på problem og spegle borgarane sine
preferansar i kollektive vedtak. Den samfunnsmessige utfordringa
vert å revitalisere den hjørnesteinen i det norske
demokratiet som det lokale folkestyret kan og typisk bør
representere. Eit steg i rett retning vil vere å etablere
eit lokaldemokratisk idéutval.
Eit slikt idéutval skal freiste å skape eit
fornya og framtidsretta ordskifte om denne problematikken med utgangspunkt
i analysane til makt- og demokratiutgreiinga. Idéutvalet
lyt også føre til torgs nytenkjande og konkrete
forslag til korleis det lokale sjølvstyret kan styrkje
stillinga si innanfor det norske demokratiet. Ideelt sett er det
ein målsetnad at fleirtalet av deltakarane i idéutvalet
består av menneske med omfattande røynsler frå lokaldemokratisk
praksis, og innsyn i dei utfordringane som det lokale sjølvstyret i
Noreg no står overfor. I tillegg bør idéutvalet
inkludere folk, gjerne internasjonale ekspertar, med grundig kjennskap
til lokaldemokratiske vilkår i, og lærdomar frå,
land det kan vere meiningsfullt å trekkje vekslar på,
t.d. Sveits og USA.
På denne bakgrunn vert det fremja fylgjande
forslag:
Stortinget ber Regjeringa opprette eit lokaldemokratisk idéutval
som skal arbeide ut eit innspel til stortingsmeldinga om makt- og
demokratiutgreiinga. Idéutvalet skal bestå av
medlemmer med aktuell, norsk lokalpolitisk erfaring og internasjonale
ekspertar på desentralisert demokrati.
Idéutvalet skal
a) gje ei vurdering av lokaldemokratiets
kår i Noreg, og identifisere faktorar som påverkar
vilkåra for lokalt folkestyre med sikte på å utløyse
engasjement og handlefridom i lokalpolitikken,
b) skissere konkrete forslag til meir omfattande deltaking
i det lokale folkestyret, inklusive ei betring av den praktiske
organiseringa av lokalpolitikken; tilrettelegging for å gjere
lokalpolitiske oppgåver og verv meir attraktive, arbeidsmetodar, økonomiske
incitament for lokalpolitisk deltaking osb,
c) vurdere lokaldemokratiske vilkår i land med
sterke innslag av desentralisert demokrati, og presentere forslag
til korleis lærdomar frå slike land kan implementerast
i Noreg.
3. oktober 2003