Til Odelstinget
Fleire domstolsavgjerder på underrettsnivå,
har i den seinare tid lagt til grunn ei forståing av lovene
om barneverntenester og sosialtenester som seier at kommunane ikkje
kan få prøvd fylkesmannen sitt vedtak om refusjonsplikt
for domstolane.
Dette synest ikkje å vera i tråd med Stortinget
sine intensjonar. Det er eit inngrep både i rettstryggleiken til
kommunane og i kommunane si stilling i høve til staten.
Fylkesmannen sitt vedtak om refusjonsplikt kan påleggja
utgifter for ein kommune til klienttenester i millionklassen årleg,
- for resten av levetida til ein klient. Kommunane kan ikkje få prøvd
vedtaket ved klage til departementet. Når vedtaket, slik
nokre nyare domstolsavgjerder har lagt til grunn, heller ikkje kan
prøvast for domstolane, risikerer kommunane å bli
underlagde vedtak som ikkje er rimelege, og som ingen kan prøva
om er rimelege.
Framlegget går difor ut på å presisera
i lovteksten at avgjerdene kan prøvast for domstolane,
som ein sikringsventil om rett sakshandsaming og rimeleg lovtolking
i vedtaket der ein kommune er i tvil.
Etter sosialtenestelova § 10-1 og barneverntenestelova § 8-1,
er det slik at det er opphaldskommunen som er ansvarleg for å yta
tenester til dei som treng det. Dersom to kommunar er usamde om
kven av dei som er opphaldskommune i eit konkret tilfelle, kan kommunane
be fylkesmannen avgjera denne tvisten, jf. sosialtenestelova § 10-3
og barneverntenestelova § 8-3.
Etter sosialtenestelova § 10-1 andre leden
er det slik at dersom ein person har vore innlagd i institusjon
utanfor heimkommunen, og så, etter utskriving frå denne
institusjonen, tar opphald i institusjonskommunen, så kan
institusjonskommunen krevja refusjon frå heimkommunen for
dei utgiftene den nye opphaldskommunen har til yting av sosiale
tenester til den nye innbyggjaren sin. Er desse kommunane usamde
om refusjonskravet, så kan dei be fylkesmannen avgjera
tvisten, jf. sosialtenestelova § 10-3.
Forslagsstillarane kjenner til to tilfelle i år, der kommunar,
som har fått avgjerd frå fylkesmannen mot seg,
har gått til sak mot staten for å få kjent
avgjerda ugyldig. I begge tilfella har retten avvist å ta saka
opp til førehaving, med den grunngjevinga at domstolane
er avskorne frå å prøva desse avgjerdene. Tilfella
er orskurd frå Oslo tingrett 27. februar 2003 og
orskurd frå Drammen tingrett 28. oktober 2003. Partane
i den første saka var Vefsn kommune mot staten ved Barne-
og familiedepartementet. Saksøkjar i den andre saka var
Kongsberg kommune mot staten ved Sosialdepartementet.
Forslagsstillarane er usamde med retten i at sosialtenestelova
og barneverntenestelova er slik å tyde at domstolane ikkje
kan prøva avgjerdene til fylkesmannen. I og med at tingrettane
i Oslo og Drammen ikkje ser dette på same måten,
bør dette klargjerast i lova.
Det er konstitusjonell sedvanerett at domstolane kan prøva
avgjerder gjorde av forvaltinga. Dette gjeld like mykje for kommunane,
som for andre. Unnatak frå denne hovudregelen skal gå klart
fram av samanhengen. Idealet er at spørsmålet
vert avklara direkte i ordlyden i lova.
Korkje sosialtenestelova eller barneverntenestelova seier noko
om innskrenking i prøvingsretten til domstolane. Det gjer
heller ikkje innstillingane til Odelstinget, og heller ikkje proposisjonane
frå regjeringa.
Tingrettane ser ut til å byggja sitt standpunkt om lovgjevarviljen
på ein påstått lang tradisjon innan sosialretten
for at det ikkje er prøvingsrett i slike tilfelle som dette.
Tradisjonen startar, ifølgje med retten, med lov om fattigvesenet
19. mai 1900 nr. 1 § 45, der det vert
sagt at tvistar mellom kommunane "skal afgjøres uden Domstolenes
Mellemkomst". Fattiglova av 1900 vart avløyst av sosialomsorgslova
av 1964. I sosialomsorgslova er føresegna om at tvistar
ikkje kan føreleggjast domstolane teke ut, men ein lagmannsrettsdom
frå Frostating i 1976 legg til grunn at Stortinget nok
har meint å vidareføra rettstilstanden frå fattiglova
når det gjeld prøvingsretten. Sosialomsorgslova
vart avløyst av någjeldande sosialtenestelov i
1991. Ordlyden i lova inneheld ingenting om innskrenkingar i prøvingsretten.
Det gjer heller ikkje innstillinga eller proposisjonen. Det same
gjeld for barneverntenestelova. Ut frå dette kjem tingrettane
til at lovgjevar nok har meint å vidareføra unnataket
frå prøvingsretten. Forslagsstillarane meiner
det rette må vera at når lovgjevar tar ut ei føresegn
om unnatak frå prøvingsretten, så tyder
dette at prøvingsretten skal gjelda.
Særleg må dette gjelda når prøvingsretten
er konstitusjonell sedvanerett. Domstolane skal då krevja ein
positiv uttale frå lovgjevar om at unnataket frå prøvingsretten
vert vidareført, og ikkje motsett, at lovgjevar positivt
må uttala at hovudregelen om prøvingsrett skal
følgjast.
Forslagsstillarane ynskjer ikkje å oppmuntra kommunane
til å bruka tid og ressursar i ulike rettsorgan. Forslagsstillarane
meiner likevel det er fleire gode grunnar som tilseier at domstolane
skal kunna prøva avgjerdene frå fylkesmannen.
For det første er det slik at avgjerdene frå fylkesmannen
ikkje kan påklagast til overordna forvaltingsorgan. Dette
er sagt med reine ord i proposisjonen til lova. Utan høve
til domstolsprøving, vil det då vera slik at førsteinstansvedtaket
er endeleg. Eit vedtak om kva for kommune som skal reknast som opphaldskommune,
eller ileggjing av refusjonsplikt, kan ha store økonomiske konsekvensar.
Det er då rimeleg at den kommunen som får avgjerda
frå fylkesmannen mot seg, kan få prøvd
sine innvendingar mot denne avgjerda, av eit anna organ. Hovudtyngda
av dei innvendingane som kan rettast mot ei slik avgjerd, vil nok
vera rettslege, og då høver det godt at domstolane
kan få prøvd saka.
For det andre, tilseier omsynet til rettseinskap overprøving.
Slik den forvaltingsmessige sakshandsaminga er, at avgjerda er lagt
til atten fylkesmenn utan høve til overprøving
av t.d. departementet, kan det utvikla seg rettsulikskapar fylkesmennene
imellom. Dette unngår ein ved at domstolane kan overprøva
fylkesmennene.
For det tredje, bør ikkje kommunane stå svakare overfor
staten enn kva andre rettssubjekt gjer. Kommunane må ha
same vern av prøvingsretten som andre private rettssubjekt
har. Slike pålegg som har vore tema i dei rettssakene som
er nemnde ovanfor, hadde tvillaust blitt prøvd av domstolane,
dersom det ikkje var ein kommune som var saksøkjar. Slike
skilnader er ikkje ynskjelege. At kommunane også er ein del
av den offentlege forvaltinga, endrar ikkje på dette. Legalitetsprinsippet
gjeld på same måten for kommunane, som for andre
private rettssubjekt; inngripande vedtak må ha heimel i
lov. Meiner den som får eit inngripande pålegg,
at dette er uheimla, må dette kunna prøvast av
domstolane.
For det fjerde, tilseier prinsippet om det kommunale sjølvstyret,
at avgjerdene frå fylkesmannen skal kunna prøvast
for domstolane. Det å ha styring med kva økonomiske
skyldnader ein kommune har, høyrer til kjernen i det kommunale
sjølvstyret. Sett til dei økonomiske konsekvensane
ei avgjerd frå fylkesmannen kan ha, er det rimeleg at kommunane
kan få rettsleg prøving av om skylnaden ligg føre
eller ikkje.
For det femte, så vil det truleg vera i strid med konvensjonen
om lokalt sjølvstyre av 15. oktober 1985 artikkel
11 (gjeldande for Noreg frå 1. september 1989), at kommunane
ikkje får prøva slike statlege avgjerder rettsleg.
Med denne grunngjevinga vert det fremja fylgjande
framlegg:
Vedtak til lov
om endring i lov 13. desember 1991 nr. 81 om sosiale tjenester
m.v. (sosialtjenesteloven) og lov om endring i lov 17. juli 1992
nr. 100 om barneverntjenester.
I
I lov 13. desember 1991 nr. 81 om sosiale tjenester m.v.
(sosialtjenesteloven) vert følgjande endring gjort:
Ny § 10-3 andre led skal lyda:
Fylkesmannens avgjørelse i tvistesak
kan bringes inn til prøving for domstolene. Alle sider
av avgjørelsen kan prøves.
II
I lov 17. juli 1992 nr. 100 om barneverntjenester vert
følgjande endring gjort:
Ny § 8-3 andre led skal lyda:
Fylkesmannens avgjørelse i tvistesak
kan bringes inn til prøving for domstolene. Alle sider
av avgjørelsen kan prøves.
III
Lova tek til å gjelde straks.
28. mai 2004