Med direktivet har ein ikkje meint å gripe inn i avtalefridomen
på betalingsfristar. Dersom rettidig betalingstid ikkje
er avtalt, fastset direktivet kva for tidspunkt rentene startar å laupe.
Det går uttrykkjeleg fram av direktivteksten at det ikkje
skal vere naudsynt for kreditor å setje fram purring. Skjeringstidspunktet
varierer ut frå dei faktiske omstenda. Det er for alle
alternativa ein føresetnad at kreditor har oppfylt sine
lovbestemte og avtalebestemte plikter, og at skuldnaren er ansvarleg
for forseinkinga.
Etter forseinkingsrentelova har ein krav på forseinkingsrenter
når kravet ikkje vert innfridd ved forfall. Når
forfallsdagen er fastsett på førehand, kan kreditor
krevje forseinkingsrenter allereie frå forfallsdagen. Dersom
forfallsdag ikkje er fastsett på førehand, kan
ein krevje forseinkingsrenter frå ein månad etter
at det er sendt skriftleg påkrav til skuldnaren med oppmoding
om å betale.
Justisdepartementet la i høyringsnotatet til grunn at
forseinkingsrentelova stort sett oppfyller krava i direktivet. Departementet
meiner at den einaste naudsynte endring som følgje av direktivet
på dette punkt, er å endre fristen i forseinkingsrentelova
frå ein månad til 30 dagar. På bakgrunn
av høyringsrunda held departementet fast ved dette framlegget.
Departementet held også fast ved at det ikkje er naudsynt å endre
reglane for når fristen startar.
Medlemsstatane kan, etter direktivet, i deira lovgiving setje
fristen for å betale forseinkingsrenter til 60 dagar for
bestemte kategoriar av avtalar. Føresetnaden er at partane
ikkje kan avtale ein lengre frist, eller at partane fastset ein
ufråvikeleg rentesats som er vesentleg høgare
enn den lovbestemte satsen.
Departementet såg i høyringsnotatet ikkje behov for å nytte
høvet til å innføre slike særskilte
fristar, og held fast ved dette sidan det ikkje har kome fram noko
slikt behov under høyringa.
Etter forseinkingsrentelova er det overlete til Kongen å fastsetje
kor høg rentesatsen skal vere. Rentesatsen har sidan 1.
januar 1994 vore på 12 pst. p.a. Rentesatsen kan fastsetjast
lågare for skuldnarar som er skuldnarar i eigenskap av å vere
forbrukar. Slik situasjonen er i dag er rentesatsen den same både for
forbrukarar og andre skuldnarar.
Reglane i direktivet om korleis ein skal fastsetje rentesatsen,
skil seg frå gjeldande norsk rett. Departementet gjorde
difor framlegg om å endre dei norske reglane slik at dei
kjem i samsvar med direktivet. Departementet foreslo at Kongen kvart
halvår fastsetter ”størrelsen av forsinkelsesrenten
til en fast prosent årlig rente, som skal svare til den
pengepolitiske styringsrenten slik denne er fastsatt av Norges Bank
pr. 1. januar og 1. juli det aktuelle år tillagt minst
sju prosent." I og med at direktivet berre gjeld i handelshøve,
meinte departementet at det ikkje er noko i vegen for å halde
fast ved regelen om at det kan fastsetjast lågare forseinkingsrente
i forbrukarforhold.
Høyringsinstansane gir i hovudsak støtte til
Justisdepartementet sitt framlegg i høyringsnotatet, og departementet
held fast på framlegget.
Etter ordninga som følgjer av direktivet og som blir
foreslått i proposisjonen skal rentesatsen fastsetjast
to gonger i året. Dette må seiast å vere
relativt ofte. Omsynet til Regjeringa si arbeidsbyrde taler såleis for å delegere
kompetansen til departementet. Totalt sett meiner difor departementet
at dei beste grunnar taler for at kompetansen blir delegert, og
går inn for dette. Også kompetansen til å fastsetje
lågare rentesats i forbrukarhøve, bør
delegerast til departementet, då rentesatsen i forbrukarhøve
alltid bør vurderast i høve til den rentesatsen
som skal gjelde i næringshøve. Departementet går
difor inn for også å delegere kompetansen på dette
punktet til departementet.