Etter likningslova § 6-7 har forsikringsselskap og
Norsk pasientskadeerstatning plikt til å levere oppgåver over utbetaling
til forsikra og skadelidne. På denne måten kan innsamla grunnlagsdata
om beløp som er skattepliktig inntekt bli lagt inn i førehandsutfylt
sjølvmelding. Vidare vil informasjonen syte for at dei som oppfyller
vilkåra for fritak for skatt på formue for utbetaling av forsikring
til barn og unge for personskade eller tap av forsørgjar etter skattelova § 4-22,
faktisk kan få fritak.
Desse omsyna gjer seg gjeldande på same måte for
utbetaling frå andre utbetalarar av skadebot for personskade og
tap av forsørgjar. Dette gjeld utbetaling frå for eksempel Kontoret
for voldsoffererstatning, Yrkesskadeforsikringsforeningen, Trafikkforsikringsforeningen
og Legemiddelansvarsforeningen. Behovet for rapportering er ytterlegare
aktualisert ved ei nyleg endring av skattelova § 4-22 som utvidar
fritaket for skatt på formue for utbetalingar til barn og unge for personskade
eller tap av forsørgjar, jf. Prop. 70 L (2012–2013). Departementet
foreslår derfor at plikta til å gi oppgåve i likningslova § 6-7
blir utvida til å gjelde generelt for utbetaling av skadebot for
personskade og tap av forsørgjar.
Skadebot for personskade og tap av forsørgjar kan
komme frå ein privatperson. Det er lite føremålstenleg å gi privatpersonar
ei slik plikt til å gi oppgåve. Departementet foreslår at desse blir
unntatt.
I medhald av lov 26. april 2013 nr. 16 om endringer
i ligningsloven og merverdiavgiftsloven mv. (kontrollbestemmelser
og personalliste) blir gjeldande likningslov § 6-7 flytt til ny
§ 5-5 nr. 3 når endringslova tek til å gjelde 1. juli 2013. Departementet
har følgjeleg laga forslag til lovendring i ny § 5-5 nr. 3 i likningslova
som tek til å gjelde frå same tidspunkt. Departementet viser til
forslag til endring i likningslova § 5-5 nr. 3. Endringa får verknad
for utbetalingar etter 1. januar 2013. Opplysningar om utbetalingar
i inntektsåret 2013 skal den opplysningspliktige levere i januar
2014.
Komiteen slutter seg
til regjeringens forslag.