Sigvald Oppebøen Hansen (A): Eg tillèt meg å stille følgjande
spørsmål til kyrkje-, utdannings- og forskingsministeren:
«Eg viser til Kyrkje-, utdannings-
og forskingsdepartementet sine forskrifter til § 1-1 i
opplæringslova som er ute på høyring.
Der står det: «Den prosentdelen av tida som skal
nyttast til temaorganisert opplæring og prosjektarbeid,
gjeld for dei enkelte hovudtrinna samla sett.»
Medfører dette at prosjektarbeid og
temaorganisert opplæring blir redusert?»
Statsråd Jon Lilletun: Svaret på spørsmålet
er nei.
Forslaget til forskrifter til opplæringslova
om dette spørsmålet fylgjer opp Stortinget sitt
lovvedtak om binding av fagstoff, arbeidsmåtar og fag-
og timefordeling på hovudtrinn og ikkje på årstrinn.
Samla sett vil såleis prosjekt og
temaorganisert opplæring ikkje utgjere ein mindre del,
men kommunane, skulane og den enkelte lærar får
større fridom til å organisere opplæringa
og velje arbeidsmåtar innanfor dei enkelte hovudtrinna.
Slik sett skulle dette på ein god måte fylgje
opp det vi var samde om i stor grad i debatten i går, at
det var nødvendig å finne fleksible ordningar
for å gjennomføre måla i læreplanen.
Sigvald Oppebøen Hansen (A): Eg takkar statsråden for svaret.
I læreplanen for grunnskulen, Reform
97, står det at innafor småskuletrinnet, dvs.
1. – 4. klasse, skal minst 60 pst. av den samla
tida vere temaorganisert opplæring eller prosjekt, med
særleg vekt på dei to første åra.
Når det gjeld mellomsteget, skal minst 30 pst.
av tida nyttast til dette kvart år, og når det
gjeld ungdomstrinnet, minst 20 pst. Læreplanen
er forskrift og etter mi meining bindande. Så kjem forskrifta
til opplæringslova, der det blir lagt opp til at læreplanens
krav om prosjektarbeid skal settast ut av drift. Det statsråden
seier, er altså at prosentdelen ikkje skal gjelde kvart år,
men samla for trinnet. Det vil etter mi meining seie ein reduksjon.
Er det slik at statsråden nå med si forskrift
vil oppheve det som er bestemt i læreplanen?
Statsråd Jon Lilletun: Eg er ikkje samd med representanten Oppebøen
Hansen i at dette er ein reduksjon. Det er ein fridom til å ta
meir prosjektarbeid/ temaarbeid eitt år og noko
mindre neste år, men i sum på steget skal det
verte likt. Så dette er godt i samsvar med det eg oppfatta
det var stor semje om, at ein skulle ha tillit til at den enkelte
lærar faktisk var i stand til å nå desse
måla.
Når det gjeld dette med læreplanen
og forskrift, slik den førre regjeringa vedtok at det skulle
vere, har veldig mange lærarar følt det som vanskeleg.
Det er svært mykje å gå igjennom, og
då klarer ein ikkje å fylgje opp det med tema-
og prosjektarbeid. Det eg har sagt, er at eg vil ha ein prosess
i lag med lærarorganisasjonar, foreldre og elevar, for
eventuelt å løyse opp dette som bindande forskrift.
Det kjem eg tilbake til.
Sigvald Oppebøen Hansen (A): Nå er det slik at det i Aftenposten
for nokre dagar sidan kom fram at det er eit problem at det er for
lite prosjektarbeid i skulen, særleg da på ungdomssteget.
Eg har registrert at statsråden er samd i det.
Når statsråden nå seier
at lærarane oppfattar det som var intensjonen i læreplanen
for grunnskulen, Reform 97, som vanskeleg, trur eg det skaper forvirring.
Eg held meg til den vedtekne læreplanen for den tiårige
grunnskulen, og det står òg innleiingsvis
i departementets utkast til forskrift at dei held seg til den læreplanen.
Da synest eg det som nå ligg i forskriftsutkastet, bryt
med den intensjonen som er trekt opp i læreplanen.
Eg vil spørje statsråden
om han vil gå tilbake på dette, slik at temaorganisering
og prosjektarbeid blir i tråd med læreplanen for
grunnskulen, som er vedteken av Stortinget.
Statsråd Jon Lilletun: Denne forskrifta er ei oppfylging av den oppmjukinga
som Stortinget gjorde i samband med behandlinga av opplæringslova.
Ein skulle kunne sjå på tvers av årstrinnet,
altså sjå på dette samla sett over nokre år.
Det er det vi fylgjer opp her, og det vil eg sjølvsagt
ikkje gå tilbake på.
Når det gjeld dette med at det er
for lite prosjekt- og temaundervisning, er vi samde om det. Men
i omtrent all kommunikasjon med Skule-Noreg om kvifor det er slik, er
eit av dei vesentlege svara ein får at stoffmengda i læreplanen,
som samtidig er forskrift, er så stor at ein ikkje rekk
gjennom alt. Då synest eg det er grunn til å gå inn og
sjå på om det er det som har gjort at vi ikkje
har greid å fylgje opp innhaldsreforma i Reform 97 i tilstrekkeleg grad– spesielt
på ungdomsskulesteget. Det arbeidet kjem eg til å føre
vidare.