Ingrid Fiskaa (SV): Kva for driftskonsept for teknisk vedlikehald blir vurdert for maritime overvakingsfly P-8 på Evenes, blir private aktørar vurdert, som for eksempel Kongsberg Aviation Maintenance Services (KAMS), og i kva grad er i så fall ulike modellar greia ut?
Begrunnelse
Første leveranse av nye maritime overvakingsfly P-8 skal etter planen skje i februar, og stortingsfleirtalet har vedtatt å flytta basen for overvakingsflya frå Andøya til Evenes. I samband med dette har eg fått spørsmål om planane for det tekniske vedlikehaldet, inkludert det operative vedlikehaldet.
Luftforsvaret utfører i dag alt operativt vedlikehald sjølv, medan delar av det tyngre og sjeldnare vedlikehaldet er sett ut til private aktørar gjennom såkalla strategiske avtalar. Grunngivinga for modellen der det operative vedlikehaldet skjer av Forsvarets eigne tilsette er mellom anna omsynet til beredskap i tilfelle krigssituasjonar, behovet for å ha eigen kompetanse i kritisk viktige funksjonar og forholdet til krigens folkerett. Personell som opererer inne på ein militær flystasjon vil vera legitime mål, og på militære oppdrag vil det vera behov for å ha med seg teknisk personell.
I Hurdalsplattformen seier regjeringa at ein vil «Gå gjennom Forsvarets samarbeid med private aktørar, med omsyn til blant anna sikkerheit, beredskap, kompetanse og krigens folkerett.» Regjeringa gir her inntrykk av at ein tar dei nemnde utfordringane på alvor.
Ei eventuell privatisering av det operative vedlikehaldet vil vera eit brot med norsk forsvarspolitisk tradisjon, utan at det har vore ein offentleg debatt eller blitt gjort politiske vedtak som avklarer dei prinsipielle spørsmåla dette reiser.
Regjeringa har også lova å ta reinhaldet inn igjen i Forsvarets eigen regi, noko som uttrykkjer ei generelt skeptisk haldning til privatisering av arbeidsplassane i Forsvaret.
Teknisk bransje i Luftforsvaret består av mange tilsette med verdifull kompetanse som kan gå tapt i tilfelle tenestene blir privatisert. På Andøya og Bodø er det i dag mellom 60 og 70 tilsette som risikerer få arbeidsplassane sine nedlagt.
Eit ofte brukt argument for privatisering er at det skal gjera tenestene billegare. Eit eventuelt kjøp av alt teknisk vedlikehald inkludert døgnkontinuerleg beredskap vil tvert imot kunna bli svært kostbart for Forsvaret.
På denne bakgrunnen er det viktig å få avklart om regjeringa faktisk vurderer ei privatisering av alt teknisk vedlikehald på maritime overvakingsfly, og om ein i så fall har kartlagt og vurdert fordelar og ulemper med ulike modellar.