Sosial- og helsedepartementet legg i proposisjonen fram
ein handlingsplan for redusert bruk av rusmiddel i perioden 1998-2000.
Regjeringa ser med uro på at forbruket
av alkohol er aukande, samstundes som illegale rusmiddel får
innpass i nye ungdomsmiljø. Ei slik utvikling forsterkar dei
sosiale problema som er knytte til bruk av alkohol og narkotika
og aukar presset på helsestellet. Regjeringa meiner det
i denne samanhengen er viktig med eit aktivt arbeid i alle aldersgrupper
for å motverke rusmisbruk som ei kjelde til dårleg
helse, kriminalitet og valdsbruk. Handlingsplanen tek sikte på å presentere strategiar
og satsingsområde som kan føre til auka innsats
i det haldningsskapande og førebyggjande arbeidet mot rusmiddelbruk.
Departementet peikar på at rusmiddelpolitikken handlar
om den vanskelege avveginga mellom individet sin sjølvråderett
og samfunnet sitt ynske om å verne mot skadeverknader av
dei val som vert gjorde. Ein heilskapleg politikk må etter
Regjeringa sitt syn innebere både kontrolltiltak og stimuleringstiltak. Regjeringa
vil vidareføre ein restriktiv rusmiddelpolitikk for å avgrense
skadeverknadene. Handlingsplanen tek sikte på å styrkje
handhevinga av regelverket. Regjeringa vil vidare stimulere til
brei mobilisering basert på omsorg for dei svakaste og
for komande generasjonar. Det blir vist til at det er påvist
ein klar samanheng mellom totalforbruket av alkohol i eit samfunn
og talet på storforbrukarar. Haldningsskapande arbeid er
vektlagt i planen.
Det blir i proposisjonen peika på at
næringsinteresser i Noreg og andre land no driv eit aktivt
arbeid for å knytte alkoholbruk til stadig fleire situasjonar
og aldersgrupper. Planen inneheld tiltak for å styrkje
medvitet om og setje grenser for desse strategiane. Fleire av tiltaka
i planen tek sikte på å heve debutalderen for bruk
av alkohol. Regjeringa vil leggje til rette for ei samfunnsutvikling
der det er mogleg å tilby trygge og inkluderande rammer
om oppveksten til born og unge.
Regjeringa legg vekt på at det gjennom
utarbeiding og oppfølging av kommunale rusmiddelpolitiske
handlingsplanar blir lagt til rette for utvikling av organiserte og
forpliktande samarbeidsformer i kommunar og lokalsamfunn.
Det blir i proposisjonen understreka at målet
for alkoholpolitikken står fast. Regjeringa ønskjer
i størst mogleg grad å avgrense dei skadane som
bruk og misbruk kan føre til. Dette gjeld både
dei samfunnsmessige og dei individuelle skadane.
Målet for narkotikapolitikken står òg
fast: Eit samfunn fritt for narkotikamisbruk.
Regjeringa har formulert desse måla
for ein meir offensiv rusmiddelpolitikk:
– reduksjon
av det totale alkoholforbruket med 25 prosent innan år
2000
– reduksjon av misbruket av illegale
stoff
– auka medvit om samanhengane
mellom bruk og misbruk av ulike rusmiddel
– heva debutalder for bruk av
alkohol
– styrkte negative haldningar
til bruk av narkotika og misbruk av alkohol
– eit betra og meir effektivt
behandlings-, etterverns- og omsorgstilbod for rusmiddelmisbrukarar
Regjeringa legg opp til følgjande strategiar
for å nå måla:
– samarbeid
med heim og skule og fritidstiltak i det haldningsskapande arbeidet
– brei mobilisering av frivillige
krefter, organisasjonar og ungdomskulturelle miljø
– la kommunane, det lokale politiet
og lokalmiljøa spele ei sentral rolle i det førebyggjande
arbeidet
– la det førebyggjande
arbeidet ha eit langsiktig perspektiv
– rette innsatsen både
mot heile befolkninga og mot risikogrupper
– la ungdom og unge vaksne vere
viktige målgrupper for innsatsen
– syte for at behandlings- og
omsorgstiltak spelar på lag med frivillige organisasjonar,
grupper og einskildpersonar
– styrking av ettervernet
Noreg ligg lågt samanlikna med andre
land i Europa når det gjeld omsetnad av alkohol. I 1996
var det årlege gjennomsnittsforbruket (registrert forbruk)
i Noreg av rein alkohol pr. innbyggjar (15 år og over)
5,04 liter. Til samanlikning har fleire andre europeiske land ein omsetnad
på over 10 liter pr. innbyggjar. Forbruket i Noreg nådde
eit toppunkt på 5,98 liter i 1980. I perioden frå 1980
og fram til i dag, har det totalt sett vore ein stagnasjon og nedgang
på om lag 16 prosent målt i liter alkohol. Dei
siste åra kan det sjå ut som om forbruket igjen
er aukande. Øl er den dominerande alkoholtypen i Noreg
med 57,4 prosent av omsetnaden rekna i rein alkohol. Sidan 1980
har brennevinsomsetnaden vist sterk nedgang, medan vinomsetnaden
derimot har stige. Ein ny type alkoholdrikk som kom til Noreg i 1996,
er rusbrusen som på kort tid har fått ei ikkje
uvesentleg utbreiing særleg blant ungdom. I tillegg til
den registrerte omsetnaden blir det drukke uregistrert alkohol i
form av legalt eller illegalt heimeprodusert alkohol og alkohol
importert som reisegods. I Noreg reknar ein med at det uregistrerte
forbruket er rundt rekna 25-30 prosent av totalforbruket.
Det blir peika på at i internasjonal
samanheng er narkotikaproblemet relativt avgrensa i Noreg. Nye undersøkingar
tyder likevel på at narkotikamisbruket er aukande også her.
Det typiske norske misbruket er eit blandingsmisbruk der alkohol,
vanedannande lækjemiddel og ulovlege stoff blir misbrukte
saman eller kvar for seg. Det er introdusert nye stoff i ungdomsmiljø,
gjerne knytte til visse ungdomskulturelle trendar. Stadig fleire
ungdommar oppgir å ha brukt ulike narkotiske stoff. Talet
på dødsfall på grunn av misbruk av slike
stoff har auka, og i 1997 blei det på landsbasis registrert
177 narkotikarelaterte dødsfall. Også den gruppa
som bruker dei tyngre stoffa, ser ut til å ha blitt større
dei siste åra. Det har dei siste ti åra vore ein
markant auke av narkotikarelatert kriminalitet og i talet på narkotikabeslag
i Noreg. I dei siste åra gjeld dette først og
fremst for stoff som LSD, kokain, ecstasy og amfetamin.
Det vert understreka at det særs ofte
er slik at ungdommar som kjem i kontakt med illegale rusmiddel, gjerne
først har starta med alkohol, dernest sigarettar, så sniffestoff,
så hasj og til slutt andre illegale stoff. Medan hasjbruk
så å seie er fråverande blant ungdom som
ikkje røykjer eller drikk alkohol, viser fleire studiar
at om lag halvparten av dei som tidleg blir daglegrøykjarar
og tidleg utviklar eit høgt forbruk av alkohol, også prøver
hasj. Fleire studiar viser at om lag halvparten av dei som har eit
jamt forbruk av hasj, også bruker andre narkotiske stoff,
som amfetamin, ecstasy, kokain og heroin. Bruken av hasj kjem først
i tid. Ofte utviklar hasjbrukarane eit alkoholproblem òg.
I aukande grad vev hasj seg altså inn i eit blandingsmisbruk
saman med alkohol, vanedannande lækjemiddel og andre narkotiske
stoff.
Det blir peika på at medan det tidlegare
var tydelege skott mellom dei illegale og dei legale rusmidla, så har skiljelinene
no teke til å bli viska ut. Tidleg debut og høgt
forbruk av sigarettar og alkohol er i dag dei sterkaste teikna på at
ungdom er i risikosona for misbruk av narkotiske stoff. Dette er
etter departementet si meining kanskje det som utgjer den mest utfordrande
endringa i forbruksmønsteret av rusmiddel dei seinare åra. Samstundes
som departementet meiner det er gode grunnar til å halde
fast ved skiljet mellom legale og illegale rusmiddel, så ser
ein at legale rusmiddel i aukande grad dannar grunnlag for bruk
av illegale rusmiddel, og at dei ulike rusmiddeltypane i aukande
grad blir brukte saman og i blanding.
Det blir òg peika på at rusmiddelbruken
blir forma i ein sosial samanheng, og at foreldra er særleg
viktige. Det har lenge vore klart at born av foreldre med rusmiddelproblem
er meir utsette enn andre for å bli misbrukarar sjølve.
I dei seinare åra er det dokumentert kor avgjerande det
er når og på kva måte foreldra introduserer
borna sine til alkohol. Svært mange får alkohol heime
lenge før dei sjølve kan skaffe seg slike varer
på lovleg vis.Etter departementet si meining er heimen kanskje
den viktigaste arenaen når det gjeld å forme det
forholdet born og ungdom får til rusmiddel, og foreldra
dei som best er i stand til å gjere noko for å førebyggje
ei uheldig utvikling, noe som ofte vil måtte innebere at
foreldra sjølve må stille spørsmål
ved eige konsum og eigne normer.
Undersøkingar utførte av Statens
institutt for alkohol- og narkotikaforskning (SIFA) viser at haldningane til
alkoholbruk og alkoholpolitiske lover og reglar har endra seg i
liberal retning gjennom ein lang periode, truleg i mesteparten av
etterkrigstida. Folk aksepterer no både mykje hyppigare
alkoholbruk og at det blir drukke meir pr. gong før dei
reknar det som misbruk. Likevel synest det som eit fleirtal i befolkninga
er rimeleg nøgd med hovudlinene i norsk alkoholpolitikk.
Det blir peika på at dagens narkotikapolitikk
har stor oppslutnad hjå folk flest. Undersøkingar
utførte av SIFA viser at klart restriktive haldningar til
bruk og omsetnad av narkotika dominerer blant folk. Haldningane
blant ungdom ser likevel ut til å ha endra seg i noko meir
liberal retning i 1990-åra, men framleis er det store fleirtalet
sterkt restriktivt også i denne gruppa. Det er ein klar
oppslutnad om ein aktiv verkemiddelbruk i narkotikapolitikken. Det
blir uttrykt stor vilje til å gripe inn både med
førebyggjande, terapeutiske og repressive tiltak.
Regjeringa vil oppnemne eit rusmiddelpolitisk
råd for å sikre eit breitt samfunnsmessig engasjement. Rådet
skal fungere som referansegruppe for sosialministeren og vere bindeledd
mellom styresmaktene, partane i arbeidslivet, næringslivsorganisasjonane,
forsik-ringsbransjen og dei rusmiddelpolitiske organisasjo-nane.
Rusmiddeldirektoratet vil gjennomføre
ein haldningskampanje for å auke forståinga blant
foreldre om kor viktig det er å skape trygge og inkluderande
oppvekstmiljø for born og unge, og om at foreldra må vere gode
rollemodellar når det gjeld bruk av rusmiddel. Samstundes
med at innsatsen overfor foreldra blir auka, vil Rusmiddeldirektoratet
også lansere ein haldningskampanje mot ungdomsfyll. Hovudmålet
vil vere å utsetje debutalderen. Kampanjane vil mellom
anna også fokusere på dei skadeverknadene som
følgjer av langing av alkoholhaldig drikke til mindreårige.
Regjeringa vil syte for at det vert sett i verk tiltak for å gjere foreldre
betre i stand til å oppdage ungdommen sin narkotikabruk,
og som vil gje rettleiing om korleis dei bør gå fram
i høve seg til misbruket.
Sosial- og helsedepartementet vil tilføre
dei regionale kompetansesentra for rusmiddelspørsmål
ekstra ressursar for å rettleie grunnskulane og dei vidaregåande
skulane i rusmiddelundervisninga og andre haldningsskapande tiltak.
Rusmiddeldirektoratet vil vidareføre
og vidareutvik-le støtta til rusfrie miljøtiltak
og ungdomskulturelle motkulturar, og vil leggje vekt på å prøve
ut nye tiltak på området. Regjeringa vil auke
støtta til dei rusmiddelpolitiske organisasjonane. Prosjekt
som tek sikte på å byggje nettverk i lokalmiljøa,
vil bli prioriterte. Regjeringa ser det òg som viktig å engasjere
organisasjonar og grupper som ikkje har arbeid med å førebyggje
rusmiddelbruk som hovudmål, i det lokale førebyggjande
arbeidet. Regjeringa vil auke støtta til rusmiddelrelaterte
førebyggjande prosjekt i regi av mellom anna frivillige
barne- og ungdomsorganisasjonar, kultur- og fritidstiltak og ulike
ungdomsgrupper.
Sosial- og helsedepartementet oppnemnde i 1997 Norsk
forebyggingsforum for to år. Dette året kjem forumet
mellom anna til å
– lage ei
handbok i førebyggjande arbeid i samarbeid med Nordlandsklinikken
– leggje fram forslag til ein
langsiktig kampanje for å redusere forbruket av alkohol
og narkotika
– setje i gang tiltak for ungdom
utan tilknyting til organisasjonslivet
Regjeringa vil halde ved like og styrkje den
breie oppslutninga om at sentrale arenaer og situasjonar skal haldast
rusmiddelfrie. Døme på slike situasjonar er samvær
med og aktivitetar saman med born og ungdom, graviditet, idrett
og friluftsliv, og periodar der ein brukar medikament. Regjeringa
vil vidareutvikle og styrkje det samarbeidet som allereie skjer
på dette området, mellom anna med Alko-Kutt-aksjonen, AKAN
og Norges Idrettsforbund. Regjeringa vil vurdere korleis satsinga
gjennom Alko-kutt kan organiserast for å gi denne ein meir
permanent karakter. Regjeringa vil dessutan styrkje samarbeidet
og samordne innsatsen mellom aktuelle departement og andre interesserte
partar med sikte på å redusere bruken av rusmiddel
i trafikken. Regjeringa har fremja forslag om å innføre
ei fast promillegrense på 0,5 promille for førarar
av småbåtar, og vil i 1998 leggje fram forslag
om ei lovendring med sikte på å senke promillegrensa
for bilførarar.
Justisdepartementet har utarbeidd ein strategiplan for
førebyggjande polititeneste og vil i særleg grad
prioritere strategiar retta mot ungdom i risikosoner. Både når
det gjeld narkotikakriminalitet og anna kriminalitet skal det iverksetjast
særskilt tilpassa tiltak med sikte på å hindre
gjentak og stoppe utvikling av karrierar som rusmiddelmisbrukarar
og kriminelle. Vidare arbeider Justisdepartementet også med
ein handlingsplan for å intensivere kampen mot narkotika
i fengsla.
Det blir sagt i proposisjonen at den største
utfordringa no er å styrkje det kommunale arbeidet med
rusmiddelproblematikk, medrekna tiltak for misbrukarar. Kommunehelsetenesta
kan spele ei viktig rolle når det gjeld å avdekkje
rusmiddelproblem på eit tidleg tidspunkt, og det er den
kommunale sosialtenesta som har hovudansvaret for å gje
råd og rettleiing og syte for hjelpe-, behandlings- og
rehabiliteringstilbod til misbrukarar, medrekna ettervern. Det blir
understreka at samarbeidet med frivillige organisasjonar er viktig,
og at ettervernet må utformast på ein slik måte
at klienten får eit reelt alternativ til eit liv i rus.
Sosial- og helsedepartementet vil leggje vekt på mellom
anna desse forholda, i særleg grad ettervernet, i ein eigen
Handlingsplan for styrking av førstelinetenesta i sosialtenesta, som
blir sett i verk i l998. Noreg har mange døgninstitusjonsplassar
for omsorg for, behandling og rehabilitering av rusmiddelmisbrukarar.
For å vidareutvikle og sikre kvaliteten ved desse institusjonane
tek Sosial- og helsedepartementet sikte på å utarbeide
ei forskrift om kvalitet i tiltak for rusmiddelmisbrukarar. Som
ledd i kvalitetssikringsarbeidet vil Sosial- og helsedepartementet
vidareføre støtta til dei regionale kompetansesentra
for rusmiddelspørsmål. Departementet vil òg vidareføre
støtta til det viktige arbeidet som blir utført av
frivillige organisasjonar. Departementet vil dessutan stimulere
forsøk med nye ettervernstiltak. På oppdrag frå Sosial-
og helsedepartementet har Rusmiddeldirektoratet etablert eit nasjonalt
dokumentasjons-system for tiltaka for rusmiddelmisbrukarar.
Regjeringa vil oppmode kommunane til å skjerpe kontrollen
der det er nødvendig, og å samarbeide med politiet
lokalt mellom anna for å sikre at ulovleg verksemd ikkje
finn stad i samband med den lovlege omsetnaden av rusmiddel. Samarbeidet
om dette mellom det offentlege, serveringsnæringa og dei
rusmiddelpolitiske organisasjonane vil bli styrkt. Regjeringa viser
til heimelen kommunane har etter serveringslova til etter særskilte
vilkår også å regulere opningstidene
for den einskilde serveringstaden. Justisdepartementet har sett i
gang kurs for dørvakter, som igjen har informert politiet
om kriminelle handlingar, mellom anna omsetnad av narkotika. Rusmiddeldirektoratet
vil vidareføre innsatsen mot ulovleg omsetnad av alkohol
og narkotika gjennom haldningsskapande arbeid som tek sikte på å redusere
etterspurnaden.
Ein reknar med at alkohol tilsvarande om lag
9 prosent av totalforbruket er blitt skaffa gjennom illegale kanalar.
Regjeringa vil understreke at smugling av alkohol og narkotika og
heimebrenning er eit alvorleg samfunnsproblem som det må setjast
inn store ressursar for å hindre.
Dei endringane som er gjorde i alkohollova med verknad
frå 1. januar 1998, gir kommunane høve til å drive
ein meir aktiv alkoholpolitikk. Regjeringa ser på evalueringa
av oppfølginga av lovendringane som ei viktig oppgåve.
Det vil særleg vere viktig å undersøkje i
kva grad kommunane faktisk nyttar den heimelen dei no har fått
i den reviderte lova til å styre den lokale alkoholpolitikken
på ein betre måte. Regjeringa vil kartleggje nærmare
dei grensene for tiltak som internasjonalt regelverk set.
Frå 1. januar 1998 er kommunane pålagde å utarbeide
ein alkoholpolitisk handlingsplan. Regjeringa ser slike planar som
eit viktig verkemiddel for kommunane i arbeidet med å leggje
til rette for ein heilskapleg rusmiddelpolitikk. Sosial- og helsedepartementet
vil i 1998 utarbeide ein mal for slike rusmiddelpolitiske handlingsplanar,
og Rusmiddeldirektoratet vil gi stimuleringsmidlar for å få sett
planane i verk.
Landsplanen for A/S Vinmonopolet har heimel
i alkohollova � 3-3 og gir departementet høve til å fastsetje eit
høgste tal på salsbevillingar og bestemme fordelinga av dei. Regjeringa
Harlem Brundtland føreslo i 1996 å la eit tak på talet på vinmonopolutsal stå
ved lag, men at ramma for talet kunne utvidast med opptil 50 utsal.
Eit fleirtal i Stortinget slutta seg våren 1997 til dette forslaget.
Etter dette opna A/S Vinmonopolet to nye utsalsstader hausten 1997. Denne
regjeringa har ønskt å sjå ei så omfattande utviding av talet på
utsal i samanheng med den rusmiddelpolitiske handlingsplanen. Sosial-
og helse-departementet forlengde derfor i desember 1997 i første
omgang landsplanen for perioden 1994-1997 til også å omfatte 1998,
og det blei sett ei ramme på 8 nye utsal i 1998. For perioden 1999-2002
har departementet vedteke ein ny landsplan for Vinmonopolet, med
ei ramme på inntil 40 nye utsal, i tillegg til dei 10 som ble vedtekne
for 1997/98.
Regjeringa legg vekt på at A/S
Vinmonopolet gir brei informasjon om grunnlaget for verksemda og
den rolla verksemda spelar som alkoholpolitisk instrument. Regjeringa
vil såleis ta initiativ til at verksemda i større utstrekning
enn i dag utarbeider og bruker informasjonsmateriell o.l. Informasjonsansvaret
skal også omfatte utarbeiding av opplysningsmateriell om
helsefarane ved overdrive alkoholforbruk, og mellom anna støtte
opp under punktfråhaldsstrategien. Regjeringa er oppteken
av at A/S Vinmonopolet ikkje blir brukt som salskanal for
alkoholhaldige drikker som av alkoholpolitiske grunnar er uønskte
på marknaden i Noreg, t.d. produkt som tydeleg rettar seg
til ungdom. Det vil bli vurdert om departementet bør bruke
retten til å påverke vareutvalet meir aktivt enn
i dag. Regjeringa vil òg vurdere helsefaremerking av alkoholhaldige
drikker som eit mogleg tiltak.
Regjeringa arbeider med tiltak som kan effektivisere forbodet
mot alkoholreklame.
Det er i Dokument nr. 8:41 (1997-98) sett fram
forslag om forbod mot varer og reklame som relaterer seg til narkotika.
Stortinget vedtok 28. april 1998 å oversende forslaget
til Regjeringa for utgreiing og uttale. I straffelova § 140
er det eit generelt forbod mot å oppfordre til straffbare
handlingar. Sosial- og helsedepartementet ønskjer å innføre
eit forbod som spesielt rettar seg mot oppmoding til bruk av illegale
narkotiske stoff, og tek sikte på å leggje fram
ein odelstingsproposisjon om dette.
Sosial- og helsedepartementet har følgt
nøye med på utviklinga av salet av rusbrus som
på grunn av smaken og marknadsføringa i særleg
grad appellerer til ungdom. Førebels ser det ut til at
salet gjennom A/S Vinmonopolet har stagnert, etter at det
ein periode fram til sommaren 1997 auka markant. Salet av maltbasert
rusbrus i daglegvarehandelen har gått ned. Regjeringa finn det
likevel uheldig at nokre av desse drikkene kan seljast i daglegvarehandelen
som øl. Regjeringa tek derfor sikte på at definisjonen
av øl i forskrifta til øllova blir revidert, slik
at rusbrus basert på malt ikkje kan omsetjast etter reglane
i alkohollova som om det var øl. Regjeringa har også vurdert
om det er råd å påleggje rusbrus ei særskild
avgift. På grunn av store problem med å definere
produktet klart nok til å skilje det frå andre
produkt i avgiftsmessig samanheng, vil det vere vanskeleg å føreslå ei
særskild avgift.
Sosial- og helsedepartementet vil utarbeide
utkast til ei forskrift om 18-års aldersgrense knytt til
innførsel, sal og kjøp av preparat og andre varer
som i hovudsak blir brukte ved tilverking av eller som tilsetjing
til alkoholhaldig drikk. Formålet med forskrifta vil vere å syte for
at såkalla «rusbruspulver» ikkje blir
omsett av eller til mindreårige. Sosial- og helsedepartementet
har også vurdert forbod mot «rusbruspulver»,
men funne at pliktene ein har gjennom EØS-avtala ikkje
gjer det mogleg.
Legalt utskrivne medikament hamnar til ein viss
grad på den ulovlege stoffmarknaden. Statens helsetilsyn
vil styrkje rettleiinga og tilsynet med korleis legar skriv ut resept
på vanedannande medikament. Sosial- og helsedepartementet
vil vidare vurdere den rolla legalt utskrivne lækjemiddel
spelar som misbruksproblem, mellom anna når det gjeld overdosedødsfall,
og tiltak for å motverke slike problem og medfølgjande
dødsfall.
Både på alkohol- og narkotikaområdet
skjer det ei global utjamning av forbruksmønstra. Internasjonalt blir
det teke til orde for meir liberale haldningar til narkotikabruk.
Regjeringa vil at Noreg framleis skal stå for ein restriktiv
rusmiddelpolitikk, og meiner det i aukande grad er viktig at Noreg
deltek i internasjonale forum der holdningar til rusmiddel blir
drøfta og påverka. Regjeringa legg vekt på eit
utstrekt nordisk samarbeid om rusmiddelspørsmål.
Noreg vil framleis ta aktiv del i alle relevante FN-forum.Noreg
deltek òg gjennom EØS-avtala i Narkotikaførebyggingsprogrammet
under Folkehelseprogrammet til EU, og er ein aktiv medlem i samarbeidsgruppa
om narkotikaspørsmål i Europarådet.
Regjeringa stør FN sitt arbeid for å stimulere
til auka internasjonal innsats mot narkotikaproblema, mellom anna
med prosjektstøtte for å skape alternative inntekter
for bønder som i dag dyrkar narkotika. Det vil bli vurdert
ytterlegare bruk av norske bistandsmidlar til det internasjonale
samarbeidet for å medverke til å redusere både
det nasjonale og det internasjonale rusmiddelmisbruket.
Alkoholpolitikken blir i stor grad forvalta
av kommunane. Det gjeld òg for ei rad tiltak retta mot
narkotika. Ein meir offensiv alkohol- og narkotikapolitikk må derfor
innebere auka kommunalt engasjement og kommunal innsats. For å kunne
starte opp handlingsplanen i 1998, meiner Regjeringa det er nødvendig å styrkje
statsbudsjettet med i alt 20 mill. kroner, og gjer framlegg om å auke
løyvinga under kap. 610 Rusmiddeldirektoratet med 13 mill.
kroner og under kap. 614 Tiltak for rusmiddelmisbrukarar med 7 mill.
kroner. Midlane skal bli nytta til å styrkje rusmiddelundervisninga
i skulen, til haldningskampanjar, til kommunal innsats for å setje
i verk rusmiddelpolitiske planar, som tilskot til frivillig innsats,
til nye ettervernstiltak og til oppretting av Rusmiddelpolitisk
råd.
Planen gjeld for perioden 1998-2000, og Regjeringa tek
sikte på at planen minst skal ha den same ramma i 1999
og 2000 som i 1998.
Når det gjeld finansiering av løyvinga,
vert det vist til framlegg i St.prp. nr. 65 (1997-98) om reduksjon
av løyvinga under kap 673, post 61 Oppfølging
av ansvarsreformen for menneske med psykisk utvik-lingshemming.