Stortingsrepresentantane Carl I. Hagen og Jan Simonsen
har den 2. mars 2000 sett fram følgjande forslag:
«Stortinget ber Regjeringen fremme
de nødvendige forslag og fatte de nødvendige vedtak
slik at:
1. Det innføres
en "hurtig-paragraf" i utlendingsloven slik at asylsøknader
som er "åpenbart grunnløse" avslås uten
ankerett, men med en særskilt kvalitetssikringsprosedyre.
2. Det innføres en nødvendig
adgang eller hjemmel for utlendingsmyndighetene til å holde
særskilte asylsøkere i asylmottak med sterke begrensninger i
bevegelsesfriheten eller full forvaring på asylmottaket
inntil søknaden er ferdig behandlet.
3. Det opprettes særskilte asylmottak
organisert slik at det kan innføres en sterk begrensning
eller full forvaring av de asylsøkere som myndighetene
innfører slike begrensninger for.»
I grunngjevinga for framlegget vert det m.a.
vist til at før asylsøknader er gjennomgått
og bakgrunnen og identiteten til asylsøkjarane er granska
av norsk politi og utlendingsstyresmaktene, veit vi ikkje sikkert
kven dei er og kva for motiv dei har for å kome til Noreg.
Det er berre 3-5 pst. som får sin søknad om asyl
i medhald av FNs flyktningkonvensjon innvilga. Vi veit vidare at mange
lyg om sin identitet, og at mange nyttar falske papir for å oppkonstruere
ei fortid dei ikkje har. Forslagsstillarane meiner asylsøkjarane
bør bu i asylmottak fram til søknaden er ferdig
handsama. Slik systemet i asylmottaka er i dag, eksisterer det ingen avgrensingar
i retten til å ferdast fritt.
Noreg har underteikna Schengen-avtalen, som
har som siktemål å sikre betre kontroll med personar
frå land utanfor Schengen-området når
dei kjem til Noreg og andre Schengen-land, samt å hindre
illegal innvandring til desse landa. Schengen-avtalen er langt på veg verdilaus
så lenge det er mogleg å bruke asylordninga til å kome
seg inn i Noreg og Europa og operere som illegale innvandrarar.
Tal offentleggjorde i Aftenposten 15. oktober 1999 viste at så mange
som 869 asylsøkjarar var forsvunne frå norske
asylmottak dei første ni månadene i 1999. I ein
spørjetime i Stortinget uttala justisministeren at fleire
av desse heilt klårt var forsvunne fordi dei var kriminelle,
medan andre var såkalla "asylhopparar", personar som søkjer
om asyl i fleire europeiske land etter tur sjølv om dei
ikkje får status som flyktningar.
Eit vesentleg argument for ein strengare kontroll
med asylsøkjarar, er at ei ordning som gjer det mogleg
for utlendingar som kjem til Noreg utan papir og søkjer om
asyl å bli buande i Noreg i fleire månader med
full rett til å ferdast fritt, heilt klårt vil
bli misbrukt av yrkeskriminelle utlendingar.
Det meste av den asylkriminaliteten som er avdekka dei
siste månadene er utført av asylsøkjarar
frå land i Aust-Europa. Det er lite truleg at desse asylsøkjarane er
reelle flyktningar, og det er all grunn til å stille spørsmålsteikn
ved kva for motiv dei då har for å søkje
asyl i Noreg.
Danmark innførte i 1994 nye reglar
for asylsøkjarar frå Aust-Europa. Dei blir haldne
i lukka forvaring til søknaden er ferdig handsama. Deretter
blir dei aller fleste sendt ut av landet. Samstundes vart sakshandsamingstida
redusert frå om lag tre månader til om lag sju dagar.
Noko liknande burde det vere mogleg å få til i Noreg.
I Danmark er det vidare innført ein
såkalla "hurtigparagraf" i utlendingsloven som fungerer
slik at utlendingsstyresmaktene under den første samtalen
med asylsøkjaren kan vurdere ein søknad som "klårt
grunnlaus". Ei slik avgjerd kan ikkje ankast slik andre avgjerder
kan, men organisasjonen Dansk Flyktninghjelp kan leggje ned veto
og overføre søknaden til ordinær sakshandsaming.
Ein kan innføre ein liknande regel i Noreg, samt opprette
eit rådgjevande organ med representasjon frå NOAS,
Flyktningerådet og eventuelle andre som får rett
til å leggje ned veto på lik line med systemet
i Danmark.
Av andre røynsler frå Danmark
som bør innførast, er ei plikt for alle asylmottak
til å melde kriminelle handlingar utført av asylsøkjarar.