Fellesskapsprogrammet for vern av barn som nyttar
Internett og annan kommunikasjonsteknologi (Sikrare Internett) 2009–2013
vart formelt vedteke i EU 16. desember 2008 ved europaparlaments-
og rådsavgjerd nr. 1351/2008/EF. Føremålet med programmet er å fremje
sikker bruk av Internett og annan kommunikasjonsteknologi blant
barn og unge, og å motkjempe ulovleg og skadeleg innhald.
Programmet skal vare i fem år frå 1. januar
2009 og er ei vidareføring av programmet Sikrare Internett Pluss
(2005–2008), som Noreg har teke del i sidan 2006.
Deltakinga i det nye programmet inneber økonomiske
plikter for Noreg over fleire år. Det totale budsjettet til det
nye programmet vil vere på 55 millionar euro over fem år. Det vil
seie 11 millionar euro per år.
Det går fram av meldinga at "Sikrare Internett" har
som mål å fremje sikker bruk av Internett og annen kommunikasjonsteknologi
blant barn og unge, og å motkjempe ulovleg innhald og skadeleg åtferd
ved bruk av direktekopla teknologi. For å nå målet vil programmet
særleg leggje vekt på praktisk informasjon til barn, foreldre, omsorgspersonar
og lærarar.
Programmet skal leggje til rette for tiltak
mot ulovleg innhald, fremje eit sikkert Internett og syte for auka
medvit rundt risiko og kva rådgjerder som bør setjast i verk.
Programmet vert utvida med to nye punkt samanlikna
med tidligare. Dette gjeld særlege tiltak for å verne utsette barn
mot barnelokking og mobbing gjennom digitale medium og for å samle
meir informasjon om korleis barn nyttar ny teknologi. Vidare vil
det nye programmet i større grad ha fokus på nyare kommunikasjonstenester, slik
som nettsamfunn/sosiale medium.
Det går fram av meldinga at kampen mot ulovleg,
skadeleg og uønskt innhald på Internett (og ved bruk av annan kommunikasjonsteknologi), best
kan førast gjennom internasjonalt samarbeid. Dei nasjonale tiltaka
kan såleis gjennomførast meir effektivt, ved koordinering med tiltak utanfor
landegrensene. Den auka utbreiinga og bruken av ny teknologi blant
barn gjer det viktig å halde fram med og utvikle arbeidet på området.