I proposisjonen vert det vist til at dei frie
inntektene til kommunane i samband med endringar i statsbudsjettet
for 2010 under Kommunal- og regionaldepartementet blei auka med
1 mrd. kroner, jf. Prop. 29 S (2010–2011) og Innst. 129 S (2010–2011).
Auken kan til dømes nyttast til utbygging av sjukeheimar og omsorgsbustader,
og dermed utvikle ei verdig eldreomsorg. Samstundes varsla departementet
ei styrking av investeringstilskotet til omsorgsbustader og sjukeheimsplassar,
og at styrkinga vil bli gjeve tilbakeverkande kraft.
Det vert vidare peikt på at investeringstilskotet skal
stimulere til bygging og rehabilitering av fleire omsorgsplassar
med heildøgnstenester i kommunane. Regjeringa har ei målsetjing
om å gje tilsegn om tilskot til 12 000 omsorgsplassar i perioden
2008–2015.
I proposisjonen vert det gitt ei nærare utgreiing om
investeringstilskotet.
Sjukeheimsplassar kan få investeringstilskot
på opp til 30 pst. av byggje- og anleggskostnadene. Omsorgsbustader
kan få tilskot på opp til 20 pst. av kostnadene. Fellesareal som
er naudsynt for å yte tenester heile døgnet i noverande omsorgsbustader,
kan bli finansiert med opp til 30 pst. av kostnadene.
Kommunane skal disponere omsorgsplassane i minst
20 år etter at tilskotet er utbetalt.
Dei to første åra etter at investeringstilskotet
blei etablert, var etterspurnaden etter tilskot relativt høg. I
2010 fall søknadsinngangen kraftig. Til saman har det frå 2008 til
utgangen av 2010 blitt gjeve tilsegn til 4 047 omsorgsplassar. Det
blei gjeve tilsegn for til saman om lag 1,9 mrd. kroner.
Tilskotet blir utbetalt når omsorgsplassane
er ferdigstilte. Ved utgangen av 2010 var det utbetalt tilsegn til
1 436 plassar.
I proposisjonen viser regjeringa til at kommunane
ikkje fullt ut har nytta ordninga med investeringstilskot som skal
medverka til å nå målsetjinga i Omsorgsplan 2015 om 12 000 omsorgsplassar
med heildøgnstenester. Det blir peikt på at dette er viktig for
å møte dei framtidige utfordringane knytt til mellom anna ei aldrande
befolkning. Regjeringa har difor sett i verk tiltak for å medverke
til auka utbygging av omsorgsbustader og sjukeheimsplassar.
Regjeringa gjer i proposisjonen framlegg om
å auke tilskotssatsane for investeringstilskotet slik at den gjennomsnittlege
tilskotsutmålinga blir auka frå 25 til 35 pst. av dei godkjente
byggje- og anleggskostnadene. For omsorgsbustader blir satsen auka
frå 20 til 30 pst. og for sjukeheimsplassar frå 30 til 40 pst. Tilskotet
til bygging av fellesareal blir òg auka frå 30 til 40 pst.
Av omsyn til at kommunane skal bli handsama likt,
vil auken i tilskotssatsane bli gjeve tilbakeverkande kraft for
alle byggjeprosjekt som har fått tilsegn etter at ordninga blei
innført i 2008. Dette inkluderer òg tilsegn til kommunar som har
ferdigstilt prosjekt og der tilskota er utbetalt.
Etter kommunehelsetenestelova og sosialtenestelova
står den einskilde kommune fritt til å yte tenestene sjølve, eller
å kjøpe tenestene av private tilbydarar, inklusive kommersielle
aktørar. Kravet om at berre non-profitaktørar kan få tildelt investeringstilskot
vidare frå kommunane, inneber at kommunane må dekkje kostnadene utan
statlege tilskot dersom dei vel å samarbeide med kommersielle aktørar
om utbygging av omsorgsplassar med heildøgnstenester.
Mange kommunar har tradisjon for å samarbeide med
lokale bustadbyggjelag om å løyse bustad- og omsorgsutfordringar.
I proposisjonen kjem det fram at for å medverke til
at kommunane skaffar fleire omsorgsbustader og sjukeheimsplassar,
ynskjer regjeringa å gjere tilskotsordninga meir fleksibel og tydeleg
for kommunane. Regjeringa foreslår å endre reglane slik at det blir
opp til kommunane sjølve å bestemme om dei vil inngå avtalar med
frivillige organisasjonar, bustadbyggjelag, private omsorgsfirma
eller andre. Dette vil vere i samsvar med kommunehelsetenestelova
og sosialtenestelova.
Endringa inneber at høvet til å tildele tilskot
vidare vil bli avvikla, og tilskotet vil bli gjeve til kommunen
som ansvarleg for tenesta, uavhengig av om kommunen sjølv byggjer
og driftar tenesta, eller om kommunen heilt eller delvis kjøper
slike tenester av andre aktørar på vanlege forretningsvilkår. Samstundes
blir det lagt til grunn at kommunane må sikre seg disposisjonsrett
til omsorgsplassane i minst 30 år, mot 20 år etter gjeldande reglar.
At dei auka satsane blir gjeve tilbakeverkande kraft
har ein samla kostnad på 734 mill. kroner. Desse kostnadene vil
få konsekvensar for løyvingane i 2011 og dei neste tre åra. Samla
kostnad i 2011 som fylgje av at dei auka satsane blir gjeve tilbakeverkande
kraft, er på 567 mill. kroner.
Av tilsegna som får auka satsar med tilbakeverkande
kraft kjem 167 mill. kroner til utbetaling i 2012 og 2013.
I 2010 har aktiviteten vore betydeleg lågare
enn ein har budsjettert med. I tillegg visar det seg at prosjekta
tek noko lenger tid å fullføre enn ein tidligare har rekna med.
Nye anslag gjev eit mindrebehov i 2011 på i overkant av 300 mill.
kroner i forhold til saldert budsjett 2011.
Samla sett må løyvinga til investeringstilskotet aukast
med 310 mill. kroner i 2011 i forhold til saldert budsjett 2011.
Auken av tilskotssatsane fører til at tilsegnsramma
for 2011 må aukast med 444,4 mill. kroner til 1 555,4 mill. kroner.
Tilsegnsramma er summen av alle nye tilsegn som blir gjeve i budsjettåret. På
grunn av at det kan ta opp til fire år før prosjekt blir ferdigstilte,
blir det budsjettert med ei tilsegnsfullmakt på posten. Fullmakta
viser staten sine uteståande forpliktingar på posten ved utgangen
av året. Auken av tilskotssatsane fører til at tilsegnsfullmakta
må aukast med 579,3 mill. kroner til 2 167,1 mill. kroner.
Dersom ein legg til grunn investeringar i 12 000 plasser
i tråd med målsetjinga i Omsorgsplan 2015, inneber auken av satsane
at dei samla statlege utgiftene over kap. 586, post 64 Investeringstilskot
aukar med om lag 2,5 mrd. kroner, frå om lag 6,3 mrd. kroner til
om lag 8,8 mrd. kroner.