Unn Aarrestad (Sp):
Eg vil få retta
følgjande spørsmål til justisministeren:
Det er kjent at forsikringstakarar
ikkje har tilgjenge til opplysningar om seg sjølv dersom desse er manuelt
lagra i forsikringsselskapa.
Vil statsråden fremja forslag om
endring av lov om personregister slik at dette blir mogleg?
Statsråd Grete Faremo:
Personregisterlova gjev ein avgrensa rett til innsyn i private
personregister, men berre dersom opplysningane vert lagra eller handsama ved
hjelp av edb.
Men personregisterlova § 7 fjerde ledd
opnar for at Kongen ved forskrift kan fastsetje at innsynsrett òg skal
gjelde i høve til private sine manuelle personregister.
Det er ikkje fastsett særskilde
innsynsreglar for forsikringsselskapa sine personregister, og eg kjenner
heller ikkje til at spørsmålet tidlegare har vore vurdert. Men eg er gjord
kjent med at mange forsikringssøkjarar og forsikringstakarar føler det som
eit problem at dei ikkje får tilgjenge til opplysningar om seg sjølve som
forsikringsselskapa sit inne med. For tida arbeider Justisdepartementet med
ein generell revisjon av forskrifta til personregisterlova.
Justisdepartementet vil i samband med det arbeidet vurdere tilhøvet til
forsikringsselskapa sine personregister, her òg spørsmålet om innsynsrett.
Unn Aarrestad (Sp):
Eg takkar for
svaret, men eg er av den litt utålmodige typen, og eg veit at praksis har
synt at moglegheitene som finst for å « gøyma » følsame opplysningar i manuelle
delar av register, vert nytta. Dette kan igjen gjera det mogleg for
registereigaren å samla inn fakta og gi karakteristikkar som den registrerte
ikkje er kjend med og av den grunn ikkje har moglegheiter for å korrigera.
Det kan vera til skade for den registrerte ikkje å ha kjennskap til dei
opplysningane som finst om vedkomande, og opplysningane kan vera gale.
Dette gjeld ikkje berre for forsikringsselskap, men for alle manuelle
register, altså gjeld dette, som det òg vert sagt i svaret, når det er
manuelt og ikkje når det er elektronisk lagra. Samtidig veit me at me har
innsynsrett i journalane våre når me måtte trenga det på sjukehus. Dette
verkar ikkje logisk. Eg er kjend med at Datatilsynet har sendt brev til
Justisdepartementet for halvanna år sidan om dette, og eg lurer på når denne
lovendringa vil kunna skje.
Statsråd Grete Faremo:
Vi snakker her
om private selskaper. Når det gjelder offentlige institusjoner, har vi et
langt mer presist regelverk både i forvaltningsloven og i
offentlighetsloven. Men fra vår side vil vi, som sagt, gå gjennom disse
spørsmålene i forbindelse med gjennomgangen av forskriftsverket. Noe tid
vil det måtte ta, men vi skal love å følge det opp så fort som mulig.
Unn Aarrestad (Sp):
Det er sant som
det vart sagt her, at me har eit offentleg, presist regelverk. Me har det.
Men nettopp fordi dette er privat, er det veldig viktig at vi òg har
innsynsrett, slik at det ikkje skal skje uhell, og at ein kan få høve til å
retta på opplysningar som ikkje er korrekte. Ein har høyrt om fleire
eksempel på dette. Derfor tykkjer eg at det er viktig å få fortgang på
dette. Eg har ikkje ytterlegare spørsmål; eg håpar berre på snarleg
gjerning i denne saka.