Laila Kaland (A):
Eg har stilt
følgjande spørsmål til fiskeriministeren som no blir svara på av
landbruksministeren:
Då Stortinget handsama
strukturmeldinga for fiskeria 7. desember 1992, bad ein samla sjøfarts- og
fiskerikomite om at det blei nedsett eit samansett utval for å vurdere
fritidsfiskarane sine framtidige rettar på sjøen.
Kan statsråden gjere greie for korleis
denne saka står i dag?
Statsråd Gunhild Øyangen:
Fiskeridepartementet sette den 1. juni 1993 ned eit utval for å greie ut
spørsmål om regulering av fritidsfiske i sjøen, det såkalla
Fritidsfiskeutvalet. Bakgrunnen er det auka omfanget som fritidsfisket har
fått, tidvis drive som eit skjult næringsfiske.
Innstillinga frå utvalet vart lagd
fram i oktober 1994, og Fiskeridepartementet sende den ut på høyring med
høyringsfrist 15. mars 1995.
I innstillinga foreslår utvalet at
hovudreguleringsforma i fritidsfisket skal vere regulering av
reiskapsbruken.
Utvalet foreslår vidare at fangst som
ikkje går med til eige konsum, skal kunne omsetjast gjennom salslag.
Utvalet seier òg at det for visse artar eller fiskeri bør kunne gjelde
føresegner om reiskapsavgrensing som er strengare enn det generelle
forslaget, dette ut frå ressursomsyn, orden på feltet e.l.
Fleirtalet av høyringsinstansane har i
hovudsak slutta seg til forslaget frå utvalet.
På bakgrunn av forslaget frå utvalet
og utsegnene frå høyringsinstansane tek Regjeringa sikte på å fremje ein
odelstingsproposisjon om endring av saltvassfiskelova i løpet av våren 1996.
Dette er Stortinget gjort kjent med.
Laila Kaland (A):
Eg er glad for det
statsråden sa, at denne saka blir behandla i vårsesjonen, for den er blitt
møtt med stor interesse frå ein del folk langs kysten vår.
Vi veit at i fleire århundre har folk
langs vår lange kyst hatt fiske som livsgrunnlag og som ei avgrensa
attåtinntekt. Det å bruke båt og hauste av havet gjev også trivsel og
avstressing. Fritidsfiskarane har til liks med andre godteke reguleringa i
fisket, og vil på ingen måte konkurrere med dei som driv fiske som einaste
næringsgrunnlag.
Eg vil be landbruksministeren ta med
seg følgjande synspunkt til fiskeriministeren: No når ressursane er gode -
av bestandane på torsk, hyse og sild - må avgrensingane nord for 62.
breiddegrad opphevast fram til eit politisk vedtak blir gjort i Stortinget i
høve til fritidsfiskarane.
Etter mitt syn er det ikkje
fritidsfiskarane som øydelegg ressursane i havet. I saltvassfiskelova er
det lovheimel for reiskapsavgrensing i visse delar av året og landet, men
allmennretten til å fiske må vi ikkje øydeleggje.
Statsråd Gunhild Øyangen:
Jeg vil ta
med meg de synspunkter som representanten Kaland her tar opp, tilbake til
fiskeriministeren.