Unn Aarrestad (Sp):
Eg vil få stilla
fylgjande spørsmål:
Ifylgje media er Rogaland
Fiskesalgslag heilt avhengig av føringstilskot for å halda fleire av dei små
fiskemottaka opne.
Kva vil fiskeriministeren gjera for å
hindra stenging av desse slik at fisken kan bli transportert til større
foredlingsanlegg?
Statsråd Jan Henry T Olsen:
I samsvar
med Stortinget sitt vedtak av 18. desember 1995, jf.
B.innst.S.nr.8
Tl.02 (1995-1996), blei det for 1996 løyvt 70 mill. kr til støttetiltak for
fiskerinæringa.
Fiskeridepartementet fastsette
fordelinga av støttemidlane i brev av 19. januar d.å. I brevet går det fram
at Fiskeridepartementet har sett av 35 mill. kr til garantilott, 3 mill. kr
til lineegnesentralar, 8 mill. kr til selfangst, 17 mill. kr til
føringstilskot m.v. og 7 mill. kr til reserve. Av føringsmidlane er 3 mill.
kr sette av til krabbe og kystbrisling. Vidare har Norges Råfisklag fått
innvilga inntil 8 mill. kr og Norges Sildesalslag inntil 2 mill. kr i
føringstilskot. Då føringstilskotet vil måtte avgrensast til dei tilfelle
der det oppstår alvorlege mottaksproblem, fann ein det i utgangspunktet
føremålstenleg berre å setje av midlar til dei to salslaga som opererer i
Nord-Noreg, då det tradisjonelt er i desse områda det oppstår mottaksproblem
i samband med sesongfiskeria.
I tillegg sette departementet av 4
mill. kr i reserve på føringsmidlane, som er tenkt brukt i spesielle
situasjonar der det kan dokumenterast mottaksproblem. Av desse midlane er 1
mill. kr tildelt Vest-Norges Fiskesalslag som føringstilskot i 1996. Dersom
det oppstår mottaksproblem i andre distrikt, har dei andre salslaga fullt
høve til å søkje om midlar til føring frå denne avsetjinga.
Rogaland Fiskesalgslag ber i søknad av
27. mars i år departementet om å få innvilga 1,9 mill. kr til føringstilskot
for 1996. Laget hadde eit forbruk på i overkant av 1,2 mill. kr i 1995.
Hovuddelen av fjorårets tilskot - i underkant av 1 mill. kr - blei nytta til
ei ordning med føring frå mottaksstasjonar til større tilverkingsanlegg,
slik representanten Unn Aarrestad også etterlyser her.
Denne søknaden ligg for tida til
behandling i departementet. På bakgrunn av dei knappe midlane vi har
tilgjengelege til fiskeristøtte på budsjettet for inneverande år, har
departementet førebels ikkje funne å kunne ta endeleg stilling til salslaget
sin søknad - dette bl.a. sett i lys av dei alvorlege mottaksproblema som har
oppstått i Finnmark, og som representanten Nymo nettopp var inne på i førre
spørsmål.
Regjeringa vil leggje opp til konkrete
løyvingsforslag til verkemiddel for næringa knytte til problema i Finnmark i
samband med framlegginga av revidert nasjonalbudsjett. Departementet vil
vente med å behandle søknaden frå Rogaland Fiskesalgslag til etter dette.
Unn Aarrestad (Sp):
Eg takkar for
svaret, men bakgrunnen for spørsmålet mitt er vanskane som Rogaland
Fiskesalgslag nå har med å få føringstilskot og med å få avsetjing av
fangstar frå mindre farty - og Rogaland er òg ein del av Noreg!
Me er kjende me at føringstilskota
òg gjer det lettare å fordela råstoffet mellom fiskeindustribedrifter og
mellom regionar, og dette medverkar igjen til utjamning av sesongsvingingane
og stabilisering av sysselsetjinga. Dette tykkjer me er viktig.
Rogaland Fiskesalgslag er heilt
avhengig av føringstilskott for å halda dei små fiskemottaka i drift.
Alternativet er nedlegging.
Kva er det som gjer at Rogaland
stiller heilt utanfor ordninga i år? Har departementet tenkt å avvikla denne
ordninga, som verker så stabiliserande på sysselsetjinga innan
fiskerinæringa?
Statsråd Jan Henry T Olsen:
Først til
det siste spørsmålet frå representanten Unn Aarrestad, om departementet har
planar om å avvikle denne typen ordning. Det har departementet ikkje planar
om. Tvert imot, vi har funne det nødvendig, bl.a. i lys av situasjonen i
nord, å kome med påfylling av slike midlar for 1996. Og vi er nøydde til å
vente med å behandle den konkrete søknaden som Aarrestad omtalar, til så har
skjedd.
Føringsmidlar skal elles, når dei blir
nytta, brukast til å hjelpe fiskarane sine avsetjingsproblem, ikkje til å
fordele ekstra råstoff til enkeltbedrifter. Det ville i så fall vore i
strid med EØS-avtalen. Nettopp derfor er det viktig å halde fast på at det
er fiskarane sin avtalesituasjon som skal avhjelpast.
Unn Aarrestad (Sp):
Eg takkar igjen
for svaret.
Fiskerinæringa har dei seinare åra
hatt ei positiv utvikling i tråd med auken i kvotane for dei viktigaste
fiskeria. I 1995 fekk Rogaland 1,25 mill. kr til føring av fisk. No måtte
ein altså senda særskild søknad for å få støtte, noko som førebels har
resultert i ingenting og at saka berre vart lagd vekk i ein skuff.
Eg er kjend med at fiskeristøtta for
1996 kom på 70 millionar, altså ein veldig sterk nedgang frå tidlegare år.
I Senterpartiet hadde me forslag om å auka den totale ramma til 115
millionar. Vi fekk ikkje fleirtal for forslaget, men det igjen ville gjort
det mykje lettare å gi føringsmidlar til dei som treng det langs kysten, for
på den måten å halda oppe arbeidsplassane i fiskeria.
Når det no er så klart underbygt at
det trengst meir pengar til dette, reknar eg med at statsråden kjem med
ekstra midlar til dette i revidert budsjett. Eg håpar at dette kan
stadfestast.
Presidenten: Finn ikkje statsråd Jan
Henry T Olsen grunn til å kommentere dette spørsmålet?
Statsråd Jan Henry T Olsen:
Eg
oppfatta ikkje at det låg noko spørsmål i dette, eg oppfatta det som ein
kommentar. Men dersom det låg noko spørsmål i det, kan eg iallfall
stadfeste at det på fredag i revidert nasjonalbudsjett blir lagt fram tiltak
som går både på omstilling av fiskeindustrien i Finnmark, på flåten generelt
og på føringsmidlar.