Magnhild Meltveit Kleppa (Sp):
Mitt
spørsmål til olje- og energiministeren lyder slik:
Kvifor vart sekretariatet for INTSOK
(Internasjonalisering og samordning av oljeaktiviteten) lagt til Oslo i
staden for til « oljebyen » Stavanger?
Statsråd Ranveig Frøiland:
Norsk olje-
og gassindustri har med sin teknologi, kompetanse og erfaring mykje å tilby
olje- og gassverksemda òg utanfor norsk sokkel.
Rapporten INTSOK - for auka
internasjonal konkurransekraft - tilrår at INTSOK skal vidareførast i ein
fast organisasjon. På bakgrunn av denne rapporten tok eg initiativ til å
oppretta eit interimsstyre med deltaking frå industrien og myndigheitene for
å ta prosessen vidare med sikte på å få etablert INTSOK som ein stiftelse.
Blant oppgåvene til interimsstyret var å foreslå lokaliseringa av
stiftelsen. To stader peikte seg ut: Stavanger og Oslo. Interimsstyret har
konkludert i denne saka og innstilt Oslo som lokaliseringsstad for INTSOK.
Stiftelsen INTSOK er no etablert, og
interimsstyret har avslutta arbeidet sitt. Både stiftarane og styret har
slutta seg til interimsstyret si innstilling.
Eg har tillit til at det standpunktet
som er teke i denne saka, er det beste for industrien. Når det no er
bestemt at INTSOK skal lokaliserast til Oslo, håpar eg at vi kan leggja
lokaliseringsdebatten bak oss. Dermed kan vi konsentrera merksemda om det
INTSOK skal gjera, nemleg å medverka til å fremja og samordna norsk olje- og
gassindustri sine interesser på den internasjonale arenaen.
Magnhild Meltveit Kleppa (Sp):
Det har
vekt stor merksemd på Vestlandet at INTSOK-sekretariatet er lagt til Oslo.
Regjeringa har vore representert i styringsgruppa, så vidt eg forstår, og
kunne ha påverka valet av stad. Lokale styresmakter og lokalt næringsliv
står sterkt og overtydande bak kravet om lokalisering til Stavanger, og dei
har støtte frå kommunar med offshore-retta næringsliv frå Kristiansand til
Flora. Oljedirektoratet og PETRAD, som INTSOK må samarbeide tett med, ligg
i Stavanger. Det utøvande næringslivet, oljeselskapa og fagfolka held til
her, og den globale kontakten og dei nettverka som skal til, er etablerte.
Stavanger, olje, Noreg er samanhengande og kjende omgrep i verdssamanheng.
Føresetnadene og grunnlaget for INTSOK er altså lagde i Stavanger.
Eg spør på nytt: Kva er det som gjer
at oppfylginga ikkje kan ha adresse Stavanger?
Statsråd Ranveig Frøiland:
I alle dei
tre SOK-arbeida som har gått føre seg, har det frå departementet si side
vore veldig viktig at industrien - oljesektoren sjølv - har vore med. Eg må
seia at eg finn det ikkje rett at det er myndigheitene som då skal bestemma
rammene rundt INTSOK og òg lokaliseringa. Derfor var vi veldig opptekne av
at industrien sjølv måtte vera med og ta avgjerd i kvar dette skal
lokaliserast, og derfor vart tilrådinga om kvar sekretariatet skulle vera,
lagt til interimsstyret. Styret som no er oppretta, slutta seg òg til at
Oslo vart vald, slik interimsstyret hadde gjort. Eg legg vekt på at det er
viktig at industrien er med på dette. Dersom det skal vera slik at
myndigheiter, Oljedirektoratet og kommunar skal bestemma over det industrien
skal jobba med, trur eg vi har eit dårleg utgangspunkt. Eg har registrert
at dei har plassert det i Oslo, og eg trur det er heilt rett slik INTSOK er
no.
Magnhild Meltveit Kleppa (Sp):
Statsråden sa i sitt første svar at ho hadde teke initiativet til
interimsstyret, med deltaking frå industri og styresmakter. Mitt første
spørsmål er då: Kva oppgåver har dei personane som ho set inn i eit slikt
interimsstyre, og kva oppgåver har dei i det som no blir eit fast styre,
dersom det ikkje skulle vera å sikra mål som Regjeringa har sett? Ho seier
òg at ho har tillit til at det standpunktet som er teke i denne saka, er til
det beste for industrien.
Mitt andre spørsmål blir då: Er det
slik at det er nokre store selskap som har flytt si verksemd til Oslo, som
betyr meir for at statsråden godtek resultatet, enn dei måla som Regjeringa
måtte ha for å etablera verksemd utanfor Oslo og for å byggja vidare på dei
miljøa - høgst oppegåande - som allereie er etablerte?
Statsråd Ranveig Frøiland:
Eg trur det
er nødvendig å slå fast at INTSOK-arbeidet er eit arbeid som skal gjerast
utanfor dette landet, av oljeindustrien og av styresmaktene i dette landet.
Så ein må ikkje berre fokusera på det som skal gjerast i Noreg - det
viktigaste skal gjerast utanfor.
Det er klart at Regjeringa har som mål
at oljeindustrien skal internasjonaliserast. Det har vore eit tett
samarbeid med industrien og med oljeselskapa for å få mest mogleg ut av
arbeidet for å nå det målet. Ein har no laga ein stiftelse, og når det
gjeld den kapitalen som styret der skal arbeida vidare med, er det ikkje
slik at det er styresmaktene som bidrar med mest, det er faktisk industrien
sjølv som bidrar med mest. Derfor føler eg at det er rett å høyra på kva
industrien seier. Eg kan ikkje på nokon måte gå god for det som Magnhild
Meltveit Kleppa seier, at småindustrien ikkje er høyrd her. Representantar
frå heile industrien har vore med i interimsstyret.