Sigvald Oppebøen Hansen (A):
Eg skal
på vegner av representanten Tomas Norvoll få lov å stille kyrkje-,
utdannings- og forskingsministeren følgjande spørsmål:
Under behandlingen av siste
statsbudsjett vedtok Stortinget et forslag der Regjeringen ble bedt om å
endre universitetenes og høgskolenes adgang til å ta på seg oppdrag med
sikte på å gi institusjonene større handlefrihet.
Når vil statsråden følge opp dette
vedtaket?
Statsråd Jon Lilletun:
I
utgangspunktet vil eg minne om at universitet og høgskular alt no har vid
adgang til å ta på seg oppdrag innanfor forsking og undervisning.
Regjeringa har nyleg, med bakgrunn i
Stortinget si oppmoding, oppnemnt eit offentleg utval til utgreiing om norsk
høgare utdanning etter år 2000. Utvalet skal analysere status innanfor
høgare utdanning og situasjonen for norske universitet og høgskular som
undervisnings- og forskingsinstitusjonar. Utvalet vert leidd av professor
Ole Danbolt Mjøs, og skal gje innstilling innan 1. april 2000.
Utvalet skal gjere ei delutgreiing om
rammene for organisering av oppdrag og randsoneinstitusjonar innan 1. april
1999. Utvalet skal her vurdere dei personalmessige, juridiske og økonomiske
rammene både for oppdragsverksemd i regi av institusjonane sjølve og for
samarbeid med randsoneinstitusjonar i lys av utfordringane frå samfunns- og
næringsliv, slik at institusjonane m.a er betre i stand til å møte
kompetansebehova i arbeidslivet. Det er føresett at departementet skal gje
utvalet nærare oppgåver når det gjeld etter- og vidareutdanning.
Universitetsrådet har nett sluttført
ei eiga utgreiing om forholdet til randsoneverksemda. Dette arbeidet kan
nyttast som del av underlaget for Mjøs-utvalet.
Mange av institusjonane har ynske om å
få vidare høve til å ta eigendel frå studentar som ikkje fylgjer ordinær
grunnutdanning. Buer-utvalet har gjort framlegg om at institusjonane skal
få høve til å ta eigendel for studium opp til 20 vekttal, mot 10 vekttal no.
Regjeringa vil i stortingsmeldinga om kompetansereforma gjere framlegg om ei
oppmjuking av denne grensa.
Sigvald Oppebøen Hansen (A):
Eg
takkar statsråden for svaret. Det er særleg positivt at ein allereie i
stortingsmeldinga om etter- og vidareutdanninga vil signalisere synspunkt
frå departementet i dette spørsmålet. Dersom ein skulle avvente ei ordning
heilt fram til år 2000, ville det nok gå litt for lang tid.
Det er for så vidt greitt at
statsråden vil kome tilbake til dette ganske snart. Men etter vår meining
er det viktig at departementet allereie nå kan vise litt større
fleksibilitet og la høgskolane få ei moglegheit til å ta på seg slike
oppdrag. Så mitt tilleggsspørsmål til statsråden blir om han allereie nå
kan signalisere at departementet vil vise ein større fleksibilitet på
bakgrunn av søknader frå høgskolar og universitet.
Statsråd Jon Lilletun:
Eg skal love
representanten Oppebøen Hansen at vi skal vise fleksibilitet. Vi har prøvd
å gjere det, men det er klart at her er det heile tida eit spenningsforhold
mellom å kvalitetssikre skikkeleg og ikkje å risikere at ein lagar ei
grunnutdanning som ikkje er gratis, men at ein på ein måte vrir det over til
ei utdanning på oppdrag som det skal betalast for. Det er ein del
avgrensingar som er viktige, og då kan det godt hende at vi i departementet
av og til sikrar oss litt for mykje i forhold til den biten. Derfor treng
vi nok ei utgreiing. Men når det gjeld enkelttilfelle og behovet for at vi
raskt får gjort ein del ting, bl.a med dette med opp til 20 vekttal, lovar
eg at vi nokså snart skal begynne å praktisere det eg var inne på. Det kjem
altså i denne meldinga.