Oddbjørg Ausdal Starrfelt (A): Eg tillèt meg å stilla følgjande
spørsmål til kyrkje-, utdannings- og forskingsministeren:
«Korleis vil statsråden sikra
ungdom som har spesielle lese- og skrivevanskar (dysleksi) eller
spesielle lærevanskar i matematikk (dyskalkuli), med evne
til å ta ulike former for høgare utdanning, tilgang
til slik utdanning og høve til å få studiefinansiering
på same vilkår som andre?»
Statsråd Jon Lilletun: Fyrst av alt vil eg minne om følgjande:
Opptak til høgre utdanning skjer i all hovudsak på grunnlag
av gjeldande krav om at søkjaren må ha generell
studiekompetanse frå vidaregåande opplæring. Nokre
få studium har tilleggskrav om spesiell studiekompetanse.
Departementet vert med jamne mellomrom kontakta av
einskildpersonar som ynskjer høgre utdanning, men som ikkje
fyller dei formelle krava til generell studiekompetanse. Fleire
av desse nemner lese- og skrivevanskar eller særskilde
lærevanskar i matematikk som årsak til at dei
ikkje har oppfylt alle fagkrava til generell studiekompetanse.
Eg har stor forståing for dei spørsmåla
representanten Ausdal Starrfelt her reiser. I gjeldande forskrift
om generell studiekompetanse finst det i dag ikkje heimel for å gjere
avvik frå opptakskrava i særskilde høve,
som der det t.d. er påvist lærevanskar som dysleksi
eller dyskalkuli. Dette er eg innstilt på å sjå nærmare
på, i samband med ein snarleg gjennomgang av opptaksreglane.
Eg vil konkret vurdere å forskriftsfeste høve
til å avvike frå kravet om generell studiekompetanse
i særlege tilfelle, etter individuell vurdering.
Eg hadde i januar eit eige møte med
representantar frå m.a. Dysleksiforbundet, Senter for leseforsking
og Statens ressurs- og voksenopplæringssenter for å drøfte
aktuelle problemstillingar knytte opp til studiesituasjonen for
studentar med lese- og skrivevanskar. Som oppfølging av
møtet er eg i ferd med å nedsetje ei arbeidsgruppe
som skal gå meir konkret inn i slike spørsmål.
Temaet som representanten Ausdal Starrfelt tek opp, har altså høg
prioritet i departementet.
Spørsmålet om å opne
for avvik frå kravet om generell studiekompetanse i opptaksforskriftene
har samanheng med diskusjonen om opptak på grunnlag av
realkompetanse. I løpet av dette studieåret er
fleire høgre utdanningsinstitusjonar gjevne høve
til forsøk med opptak på slikt grunnlag. Det gjeld
t.d. vernepleiarutdanning, førskolelærarutdanning
og allmennlærarutdanning. Departementet er no i ferd med å sende
på høyring forslag til lovendring som opnar for å ta
opp studentar til høgre studium ut frå individuell
vurdering av kompetanse tileigna utanfor utdanningsinstitusjon.
I forslaget er det sett som minimumskrav for opptak at søkjaren
må ha fylt 25 år.
Når det gjeld spørsmålet
om studiefinansiering, føreset eg at eventuelle endringar
i lov og opptaksforskrifter vil følgjast opp av tilsvarande
endringar i regelverket til Lånekassen.
Lat meg til slutt få understreke at
ei opning av moglegheitene til å bli teken opp
til høgre utdanning ikkje skal innebere reduserte krav
til studentane sin dokumentasjon av kunnskap og kompetanse undervegs
i og ved utgangen av studiet.
Oddbjørg Ausdal Starrfelt (A): Eg takkar statsråden for svaret.
Spørsmålet mitt har akkurat
no utgangspunkt i ei heilt konkret sak, der ein norsk ungdom med
problem med matematikk og derfor ikkje karakter i matematikk frå vidaregåande
skule likevel kom inn på ein utdanningsinstitusjon i USA,
men fekk så nei til studiefinansiering. Den saka ligg no
i statsråden sitt departement, og eg håpar at det
er mogleg å la nåde gå for rett i den
saka. Og det peiker jo på, som statsråden også seier,
eit viktig problem, og eg er glad for den positive viljen som kom
til uttrykk i statsråden sitt svar.
Det er jo litt rart, må eg seia, at
denne saka ikkje er teken opp før, når me veit
kor mykje fokusering det har vore på dette – kanskje
meir på dysleksi enn dyskalkuli. No er det truleg slik
at dei med dysleksi vil ha større problem som studentar
enn dei med dyskalkuli, men eg håpar at den utgreiinga
som skal gjerast, og den arbeidsgruppa som skal setjast ned, gjeld
begge område, og ber statsråden svara på det
og eventuelt seia noko om framdrifta i dette spørsmålet.
Statsråd Jon Lilletun: Ja, eg er samd med representanten Ausdal Starrfelt
i at det eigentleg er rart at ein ikkje på eit tidlegare
tidspunkt har teke fatt i saka. Det grunnar seg vel djupast sett
på ei redsle for å lage unnataksreglar, som så må behandlast
individuelt. Det er klart at dersom ein ikkje gjerdar dei godt inn
i forhold til klart definerte område, vil alle statsrådar
få ei heilt umogleg oppgåve med å gå individuelt
inn i sakene. Men eg er samd med representanten Ausdal Starrfelt
i at det er heilt urimeleg at dei som har dette problemet, ikkje
kan få individuell behandling. Det er eg innstilt på,
men det må nok tilpassast enkelte studium og kanskje ikkje
andre.
Når det gjeld den konkrete saka, kan
ikkje eg saksbehandle den her, men eg kan seie så mykje:
Så sant det går innafor gjeldande forskrift, skal
vi løyse saka. Men det er det vi driv og slit med akkurat
no.
Oddbjørg Ausdal Starrfelt (A): Eg takkar igjen statsråden for svaret,
og det var i grunnen ei helsing eg ønskte å senda
i den samanhengen, ikkje eit spørsmål for å få svar
her og no.
Eg ser heilt klart at dette må gjerdast
inn, og at det må gjerast eit stykke arbeid slik at ein
gjer slike unntak på visse vilkår og i visse samanhengar.
Eg føreset at det som står om individuell vurdering
berre for dei over 25 år, ikkje vil gjelda, men at dette
også kan gjelda 19-20-åringar. Det er på ein
måte det denne saka også illustrerte – vedkomande
kunne koma tilbake når ho var 23, og då ville
ho kunna få lån. Då blir det på ein
måte ikkje logisk på noko område. Så eg
håpar altså at det også vil gjelda ungdom,
og vil gjerne ha ei stadfesting av det.
Så lurer eg på om statsråden
har nokon ambisjonar om at studentar med denne typen problem kan
søkja opptak på individuelt grunnlag allereie
frå hausten 2000.
Statsråd Jon Lilletun: Ja, statsråden har det som ambisjon,
men kan ikkje her og no love at vi får det til, for vi
må fyrst ha dette utgreiingsarbeidet. Eg vil òg
stadfeste at begge dei gruppene som spørsmålsstillaren
tok med – dysleksi og dyskalkuli – skal vere med.
Eg vil òg stadfeste at det ikkje skal vere noka 25-årsgrense
for dei som skal vurderast på individuelt grunnlag. Grunnen
til at vi har det på realkompetanse, er at vi ikkje ynskjer å få ei utvikling
der folk ikkje tek vidaregåande skule. Men her er det folk
som har teke vidaregåande skule som likevel har problem
på eitt område. Dermed må vurderinga
skje på individuelt grunnlag med ein lågare alder,
og då må òg Lånekassen synkroniserast
med det.
Eg skal gjere så godt eg kan for å få dette
til, men eg må nok vedgå at eg etter at eg begynte å lage
forskrifter og reglar her, har innsett at det her er ein monaleg
kompleksitet. Men eg er iallfall heilt samd med spørsmålsstillaren
og skal gjere så godt eg kan.
Presidenten: Da var siste ord sagt i denne spørretimen.