Petter Løvik (H): Eg tillet meg å stille følgjande spørsmål
til kyrkje-, utdannings- og forskingsministeren:
«Alta kristne grunnskole søkte
i desember 1997 Kyrkje-, utdannings- og forskingsdepartementet om
godkjenning. I september 1999 etterlyste skulen saka, og fekk etter
nokre dagar eit svar der departementet ikkje eingong gir det minste
signal om kor lang tid vurderingane av saka vil ta og kva tid skulen
vil få svar på søknaden.
Vil statsråden sjå til at
denne saka straks blir ferdig handsama?»
Statsråd Jon Lilletun: Skulen søkte om godkjenning etter
privatskulelova den 9. desember 1997. I brev til skulen den 27.
mai 1998 etterlyste departementet nærare planar for tilpassinga
til Læreplanverket for den tiårige grunnskulen.
Departementet mottok fagplanane frå skulen den 23. november
1998.
Som representanten Løvik opplyser,
skreiv departementet brev til Alta kristne grunnskole den 10. september i år.
Skulen vart informert om at det gjenstår faglege vurderingar
av undervisningsplanane.
Eg har hatt som mål at søknader
om godkjenning etter privatskulelova skal behandlast så raskt
som mogleg. Saksbehandlingstida har òg gått ned.
Det er likevel viktig at departementet bruker tilstrekkeleg tid
på den faglege godkjenninga av dei private grunnskulane.
Elevane skal sikrast ein kompetanse som svarer til den som vert
gjeven i offentleg skule. Dette er viktig for at elevane skal kunne
ta del i vidare opplæring, yrkesliv og samfunnet elles.
Søknader om støtte etter privatskulelova reiser òg mange
prinsipielle og juridiske problemstillingar som må løysast
undervegs i prosessen. Det kan derfor ta noko tid å vurdere
søknadene, under dette om det er behov for ytterlegare
utfylling.
Eg vil sjå til at søknaden
om godkjenning av Alta kristne grunnskole får høg
prioritet, og at han vert behandla så raskt som mogleg.
Det er likevel eit absolutt krav at før det vert gjeven
eventuell godkjenning, skal departementet ha forsikra seg om at
det faglege opplegget held mål. Departementet vil kanskje
måtte gå ytterlegare rundar med skulen før
det eventuelt vert gjeve godkjenning. Eg håpar likevel
at søknaden vil vere ferdigbehandla ved årsskiftet.
Petter Løvik (H): Eg vil takke statsråden for svaret.
Sjølv om hovudfokuseringa og hovudsatsinga
skal vere på den offentlege skulen, er det klart at for å oppfylle
foreldreretten er det veldig viktig at det finst reelle alternativ.
Då er ei god tilskotsordning og rimeleg rask saksbehandling
to av føresetnadene.
Eg veit at då noverande statsråd
var leiar av utdanningskomiteen, hadde han den same innvendinga
som eg har i dag, at dette går for seint. Ein kan sjølvsagt
diskutere korleis kommunikasjonen skal vere. Det gjekk sju månader
frå søknaden kom inn, til departementet bad om nye
opplysningar. Statsråden har jo sagt at han har som eit
mål at saksbehandlinga ved godkjenning av nye skular ikkje
skal ta særleg lengre tid enn eit år. Vi har vore borti
den problemstillinga tidlegare, og eg vil på prinsipielt
grunnlag spørje statsråden vidare: Vil det bli
sett i gang tiltak for å få ned saksbehandlingstida
generelt?
Statsråd Jon Lilletun: Eg kan stadfeste det som representanten Løvik
no spurde om, at det er sett i gang tiltak, og derfor er gjennomsnittstida
nede i eitt år, som eg har sagt bør vere ei forsvarleg
saksbehandlingstid. Så er det ein del unntak. Eg vil utan
vidare ta ansvaret for ein del av dei unntaka. Eg skal heller ikkje
saksbehandle denne saka frå talarstolen, men det er klart
at når privatskuleelevane skal ha tilsvarande opplæring
som dei i det offentlege, tek det mange gonger litt tid før
ein kjem fram til korleis ein slik læreplan skal sjå ut.
Då er det slik at ein må bruke ein del tid på det.
Dersom ein ser på dei datoane som
eg refererte til i svaret mitt, ser ein at det er heilt rett at
vi brukte vel lang tid før vi bad om ytterlegare opplysingar.
Men det gjekk òg svært lang tid før vi
fekk svar attende. Det tok òg bortimot eit halvår.
Derfor vil eg seie at denne saka har teke for lang tid, og eg skal
halde det eg har lovt her, at vi skal setje opp tempoet, men vi
er avhengig av eit samarbeid.
Petter Løvik (H): Eg er glad for det svaret som statsråden
igjen gav.
Det er muleg at gjennomsnittstida no er nede
mot eitt år, men det er klart at når vi her har
ein situasjon der det har gått tett på to år
frå søknaden blei send inn til dei kan få eit
svar, så er det for lang tid. Då har det litt
med kommunikasjonen mellom skule og departement å gjere.
Eg er også einig i det statsråden
sa, at læreplanane må ha ei veldig grundig behandling,
for med dei politiske diskusjonane vi har om privatskular generelt,
så er det viktig at saksbehandlinga blir grundig og skikkeleg,
slik at læreplanane ikkje kan angripast vidare. Men eg
er tilfreds med svaret, at den spesielle skulen det her gjeld, Alta
kristne grunnskole, vil få eit svar før nyttår.
Dette vil gi både privatskulen og den offentlege skulen
i Alta mulegheiter til å planlegge, og det er nødvendig
i ein slik situasjon.