Magnhild Meltveit Kleppa (Sp): Det å mista eit barn i slutten av eit svangerskap er ei oppleving der mange naturleg nok slit med fylgjene i årevis. Ny gravferdslov har gitt fleire ei grav å gå til.
Vil finansministeren ta initiativ til ei endring slik at barnet kan registrerast med namn også i folkeregisteret, ikkje berre på gravstøtta?
Begrunnelse
Ny gravferdlov gir dødfødde ein tydelegare rett til ei eiga grav. Det vert stadig vanlegare å gravleggja dødfødde. "Alle" gir i dag namn til sitt dødfødde barn. I samtale med foreldre som har vore gjennom ei slik hending er eg gjort merksam på inkonsekvensen mellom gravferdslova og lov om folkeregister.
Eg er fortalt at folkeregisteret i dag ikkje kan føra inn namn på personar utan personnummer. Det kan løysast ved at folkeregisteret set av nødvendige tal nummerseriar reservert for dødfødde. Eg vil be finansministeren medverka til å gi sorga rom ved å føreslå nødvendige endringar i lovverket. Eg ber også om at faren vert ført inn i folkeregisteret, ikkje berre mora, samt tilbakeverkande kraft for dei tilfelle der einskilde foreldre ynskjer tidlegare dødfødde barn registrerte.