Sigrun Eng (A): Også i år har praktiseringa av brøyting på riksveg 50 fått store oppslag og skapt mykje støy. I desse tider med fokus på effektivisering og rasjonell drift kan det vera grunn til å stille spørsmål om dagens praksis er den beste. Den er i alle fall ikkje strømlinjeforma!
Kan statsråden medverka til å forenkle kommandolinjene slik at det distriktskontoret som kjenner området best også får ansvaret for denne sesongoppgåva?
Begrunnelse
Dagens organisering verker ikkje logisk. Det er Regionkontoret Vest som har byggherreansvaret. Det er distriktskontoret Øvre Buskerud som har forvaltningsansvaret. Altså pulverisering av oppgåver og gode moglegheiter for at oppgåver blir vekkprioritert på toppen i systemet og ingen kan få gjort jobben slik Stortinget har bestemt. Slik vart det også i år i etterkant av budsjetthandsaminga for 2004.
Vel to vintermånader gjekk før ting fall på plass og saka måtte takast opp på statssekretærnivå meir enn ein gong, for denne vesle saka. Men saka er ikkje lita for dei den gjeld. Hytteområda er store og turisme med utgangspunkt i trafikk både ifrå aust og vest er grunnlaget for arbeidsplassar i Hallingdal. Det gir lite og ingen grunn til optimisme i ein region når kampen om vinteropen veg skal vere i gang kvart år. Kommunen meiner dette er så viktig at dei inngår spleiselag med staten om vinteropen veg. Då er det forståeleg at vekesvise uavklarte oppgåvefordelingar skaper frustrasjon. Min påstand blir difor: Øvre Buskerud distriktskontor har betre lokalkunnskap, betre regional tilhøyrighet og truleg kapasitet til å ta på seg denne oppgåva utan ein frustrerande omveg om regionkontoret i Leikanger. Og kanskje det viktigaste, ein ville unngå ansvarssplitting.