Rita Tveiten (A): Noreg har eit nasjonalt ansvar for å sikra levedyktige villaksstammar. Det har vore stor semja om at etablering av nasjonale laksevassdrag og fjordar kan vera eit viktig bidrag i dette arbeidet. Frå fleire tunge fagmiljø er det hevda at etableringa må sjåast på som ei før-var-tiltak, og at ordninga med nasjonale laksefjordar må følgjast opp med systematiske undersøkingar for å finna ut om tiltaket har den ønska effekten.
Kva planar har statsråden for å undersøkja effekten av dei nasjonale laksefjordane/vassdraga?
Begrunnelse
Noreg har eit stort ansvar for å verna villaksstammane, samstundes må det leggjast tilrette for næringsutvikling basert på våre naturgjevne fortrinn gjennom oppdrett av ulike artar. Det betyr at dei som satsar på oppdrett av laks og aure i fjordane våre, må ha vissa om at dei ikkje får skulda for reduksjonen av villaksstammane, dersom det eigentleg er andre faktorar som er syndaren. Samt at det vert arbeid for å identifisera "syndarane" slik at verksame åtgjerder kan setjast i verk. Det har vore nemnt at kraftutbygging i vassdraga våre, vegutbygging og bruk av kjemikaliar i samband med vedlikehald av veglekamen, uttak av sand i elvar osv. har påverka utviklinga av villaksstammane. Det har også vore peika på at villaksen har synt tilbakegang rundt heile Nord-Atlanteren. Det må leggjast tilrette for forsking knytt til dette fenomenet. Her er det naturleg at Noreg tek sin del av ansvaret og initiativet. Det er viktig å få fram resultat av tiltaka som vert sette i verk slik at det varige vernet vert mest mogeleg faktabasert.