Bjørn Jacobsen (SV): Kva er definisjonen på miljøvennleg drivstoff, og sidan anbodstida er 8 år, korleis kan ein stramme inn miljøkrava etter kvart som pårekna kommande krav om klimagassreduksjon strammast til utover i anbodsperioden?
Begrunnelse
To av dei største fergesambanda i Møre og Romsdal; Festøya - Solavågen og Ørsneset - Magerholm er no ute på anbod under nemninga "Midtre Sunnmøre".
Med det systemet som er vald for kjøp av fergetenester, altså anbodssystem med lange avtalar, kan ein ikkje gjere noko med klima og luftforureining, det er innhaldet i konkurransegrunnlaget fergerederia må levere tilbod i forhold til.
Det har oppstått ein interessant situasjon i konkurransen på Midtre Sunnmøre. Statens vegvesen har i utgangspunktet ikkje ønska å stille spesielle miljøkrav til fergene som skal trafikkere desse sambanda.
Konsekvensen av eit slikt standpunkt er at det er vorte ganske sannsynleg at dei to sambanda vil bli "dumpingplass" for fergemateriell som er tatt ut av drift i andre samband, kanskje materiell som elles kunne blitt oppgradert slik at dei forureina mindre.
Dette med bruk av uttrykket "miljøvennlig drivstoff" er eit svært omstridt tema, som m.a. Forbrukerombodet har hatt til vurdering. Det som er klart, er at berre nullutsleppsdrivstoff har høve til å marknadsføre seg som "miljøvennlig drivstoff". Det vil difor ikkje vere høve til å drive fergene på fossil marin gassolje eller på fossil naturgass. I praksis er det bioolje, biodiesel og biogass som er dei aktuelle teknologiane i dag. Bioolje er olje frå plante- eller dyrerestar, biodiesel er diesel produsert på slik bioolje, medan biogass er metan frå nedbryting av plante- eller dyrerestar og avfall (i motsetnad til fossil naturgass som er fleire millionar år gamal metan).