Begrunnelse

I brev frå alle dei politiske partia i Solund kommune til Statens vegvesen og fylkesordføraren i Sogn og Fjordane, datert 02.04.08, har desse uttrykt undring over innhaldet i anbodsutlysinga på ferjesambandet Krakhella-Rutledal-Rysjedalsvika når det gjeld storleik av ferja som skal trafikkere dette sambandet.
I anbodsutlysinga er det sett krav om minstestandards for storleik til 35 personbilar, som er ein reduksjon på 11 bilar i forhold til den ferja som i dag trafikkerar sambandet.
Det vert også vist til at dei politiske partia er kjend med at Solund kommune gjennom sin dialog med Statens vegvesen ikkje har fått informasjon om planar om å redusere kapasiteten på ferja med omsyn til tal bilar.
Solund kommune er i dag i sluttfasen med utarbeiding av kommuneplan for perioden 2008-2020. Planen legg til rette for og føreset vekst i kommunen, både med omsyn til næringsliv og tal på innbyggjarar. Ein av dei viktigaste føresetnadane for vekst er gode kommunikasjonar, både for å få eit konkurransedyktig næringsliv og for trivselen til innbyggjarane i kommunen. I brevet til Statens vegvesen og fylkesordføraren i Sogn og Fjordane skriv dei politiske parti at dei ikkje godtek at offentlege instansar som Statens vegvesen og fylkeskommunen ikkje vektlegg premissane som er avgjerande for at kommunar som Solund skal bestå.
Dei skriv også at det ikkje er haldbart at kommunen ikkje får fleire ferjeavgangar før ev. 2011.
På bakgrunn av det som dei politiske partia i Solund skriv i sitt brev til Statens vegvesen og fylkesordføraren kan dei ikkje godta anbodsutlysinga slik den ligg føre for det aktuelle sambandet, og dei påpeikar at dette gjeld også for sambandet Daløy - Haldorsneset.