Begrunnelse

Helse- og omsorgsministeren har gledeleg nok flagga høgt at rusfeltet skal prioriterast høgare. I styringsdokumenta til dei regionale helseføretaka vert det peika på at rusområdet skal prioriterast høgt. Styreleiaren i Helse Vest, Oddvar Nilsen, har så seint som i ein kronikk i Fjordabladet i dag (12. mars.2009), streka under at rus, rehabilitering og psykisk helsevern skal styrkast vesentleg innan Helse Vest. Han seier vidare i kronikken at "Satsinga på rusfeltet er basert på ein regional plan for rusomsorga på Vestlandet. Eit vesentleg punkt er at rusfeltet skal integrerast i dei eksisterande sjukehustenestene".
Helse Førde har til no ikkje hatt tilfredsstillande tilbod til pasientar innan rusfeltet i eige føretaksområde. Etter det eg får opplyst, nytta difor Helse Førde 23 millionar kroner til kjøp av plassar utanfor eige helseføretak til denne pasientgruppa i 2008. På Nordfjordeid, i Helse Førde, er det under bygging ein ny ruspost med ti plassar for unge vaksne.
Nybygget er knytt til Nordfjord Psykiatrisenter og det somatiske sjukehuset, Nordfjord sjukehus, ligg berre eit steinkast frå den nye rusinstitusjonen. Det nye tilbodet er såleis vel-integrert i dei eksisterande spesialisthelsetenestene på Nordfjordeid. Konseptet har fått mange godord, mellom anna frå statssekretær Rigmor Åserud.
Den nye rusposten vil stå ferdig i september 2009 og driftsstart har vore planlagt til umiddelbart etter ferdigstilling av byggeprosjektet.
Årlege driftskostnader er rekna til omlag 15 millionar kroner. Den administrative leiinga i Helse Førde melder no at det ikkje vil bli driftsstart i 2009. Dette inneber at den nybygde rusposten på Nordfjordeid vil bli ståande tom og at eit sårt tiltrengt tilbod til rusmisbrukarar i Sogn og Fjordane ikkje vert oppretta før tidlegast langt inn i 2010.