Begrunnelse

Regjeringa legg i Nasjonal transportplan opp til å ta meir omsyn til jordvern ved nye samferdselsprosjekt. Det står at det i transportpolitikken må førast ei svært restriktiv linje i omdisponeringa av dyrka jord. Det blir også varsla at departementet vil ta ein gjennomgang av vegnormalane for å sikre at det blir teke tilstrekkeleg omsyn til jordvern. Det har i den seinare tid vore fleire saker knytt til gang- og sykkelvegar, der Statens Vegvesen står hardt på at det skal vera tre meter mellom vegen og gang- og sykkelstien. På sterkt trafikkerte vegar med høg fart verkar eit slikt standpunkt fornuftig, men på vegar med lågare trafikk synest det unødvendig å ha så stor avstand mellom veg og sykkelveg der dette utfordrar jordvernet.