Begrunnelse

Det er uttalt politikk at utnytting av petroleumsressursane skal skape ringverknader i land og at basestrukturen langs kysten skal nyttast aktivt i aktivitetane på sokkelen. Dette framgår både av petroleumslova og av sentrale styringsdokument for regjeringa. Då Stortinget handsama plan for utbygging og drift av Gjøa-feltet utanfor Sogn og Fjordane vart det frå regionale styresmakter arbeidd aktivt for å sikre aktivitet i fylket som fylgje av utbygginga både i utbyggings- og i driftsfasen. Stortinget stadfesta i handsaminga av saka dei føringar som driftsoperatør sjølv hadde lagt opp til når det gjaldt lokale ringverknader. I tillegg peika komiteen på at det var gode grunnar til at både logistikkavdeling og teknisk del av driftsorganisasjonen burde ligge i Florø og ba operatøren legge til rette for dette så langt dette var mulig. Komiteen ba vidare operatøren vurdere å flytte endå større delar av driftsorganisasjonen til kystbyen. Statsråd Enoksen uttalte vidare til Stortinget at "...en del av driftsorganisasjonen - driftstøtte - settes ut til en underleverandør.
En betingelse for underleverandøren er at landorganisasjonen samlokaliseres med Gaz de France sine aktiviteter i Florø." Det er grunn til å tolke dette som at driftsstøttefunksjonane til Gjøafeltet skulle lokaliserast i Florø.
Utviklinga i etterkant av Stortinget sitt vedtak har vist at Gaz de France legg opp til å plassere ein beskjeden del av driftsorganisasjonen i Florø og at hovuddelen både av dei tilsette i driftsorganisasjonen til GdF Suez og driftstøttepartner IKM vert plassert i Stavanger. Dette harmoniserer ikkje med dei føringar som energi- og miljøkomiteen på Stortinget har lagt og er heller ikkje i tråd med dei føringar som statsråd Enoksen den gong la til grunn.