Bjørn Lødemel (H): Sogn og Fjordane er eit av dei fylka i landet som har lågast politidekning. Tal frå Politimeisteren i Sogn og Fjordane viser at politidekninga er på 1.1 politiårsverk per 1000 innbyggarar. I Politi 2020 blir det vist til at politidekninga bør hevast til 2.0. Politimeisteren i Sogn og Fjordane ønskjer å heve politidekninga til 1.5, og for å kome opp på det talet trengst det 40 nye stillingar.
Kva konkret vil statsråden gjere for å auke politidekninga i Sogn og Fjordane og når vil målsettinga om 1.5 bli nådd?
Begrunnelse
Sogn og Fjordane er eit fylke med store avstandar, fjordar og fjell. Det er også eit fylke som kallar seg trivselsfylket med god grunn. Folketalet i fylket er relativt stabilt.
Ein av grunnane til at Sogn og Fjordane kallar seg trivselsfylket er at det er låg kriminalitet. Politi og lensmannsetaten har sin del av æra for dette. Dei driv aktivt førebyggande arbeid i lag med kommunane i fylket, og dei deler kunnskap og erfaring med kommunale tenester og frivillige organisasjonar. Politimeisteren og hans medarbeidarar rundt om i fylket ønskjer å prioritere dette arbeidet høgt, og det er viktig for å halde på dei gode tala når det gjeld kriminalitet.
Dessverre ser vi at også vårt fylke vil få utfordringar med aukande kriminalitet. Dette kan vi ikkje akseptere. Derfor er det heilt avgjerande at Sogn og Fjordane får sin del av den auken i politistillingar som Politi 2020 legg til grunn, og som det er brei tilslutning til.
Politimeisteren i Sogn og Fjordane har eit rettkome krav om å få 40 nye stillingar for å kome opp i ei politidekning på 1.5, og det er viktig å få ei klår tilbakemelding frå justisministeren om nå og korleis det skal skje.