Ingrid Heggø (A): Regjeringa vil fjerne reguleringane av eigarskap i havbruksnæringa og forslag er sendt på høyring med frist på berre 6 veker. Det skal ikkje lenger stillast krav om søknad ved kjøp av 15 % eller meir av total MTB. Det kan heller ikkje stillast krav om FoU, bearbeiding, bruk av lærlingar eller spreidd aktivitet når selskap kjøper 15 % eller meir av den totale produksjonskapasiteten. Ministeren grunngjev forslaget med forenkling.
Kor mykje ressurser blir spart i høvesvis forvaltninga og næringa pga. endringane?
Begrunnelse
Nærings- og fiskeridepartementet sendte den 3.9.14 på høyring eit forslag om å fjerne særreglane som regulerer eigarskap i havbruksnæringa. Trass i at dei føreslåtte endringane får stor innverknad på kystsamfunna, er høyringsfristen sett til berre seks veker.
Endringane, som er i tråd med regjeringa sin ideologi om mindre politisk styring i fiskeripolitikken, betyr at det ikkje lenger blir krav om godkjenning frå departementet dersom ei bedrift vil kjøpe 15 prosent eller meir av produksjonskapasiteten i Noreg. Det offentlege skal heller ikkje kunne stille særskilte krav når ei verksemd eig 15 % eller meir av produksjonskapasiteten. I tråd med dagens regelverk blir krava til foredling, FoU, rekruttering og bruk av lærlinger gradvis strengare jo større eigarandelen er. Det blir òg stilt krav til eit aktivitetssenter i kvar region der verksemda driv. Regjeringa sitt forslag inneber at det offentlege ikkje lenger kan stille slik krav, og at høvet til å ta regionalpolitiske omsyn blir fjerna.
Oppdrettsnæringa skal sjølv regulera produksjon og bearbeiding ut frå marknadsomsyn. Fiskeriministeren si grunngjeving for å gjere desse endringane er at det vil føre til forenkling og mindre byråkrati. Det er difor av interesse å få innsyn i kor store ressursar det er forventa at endringane vil frigjere både i forvaltninga og i havbruksnæringa.