Gerd Eli Berge (Sp): Kan statsråden gjera greie for kva for kontrollrutiner og tiltak som vert gjennomført frå Folkeregisteret si side for å handheva gjeldande regelverk om faktisk og reell buadresse, og kva vil statsråden gjera for å sikra at lov om folkeregistrering vert handheva på ein betre måte enn i dag?
Begrunnelse
NRK Buskerud har 04.11.14 ei sak om at mange ikkje melder ifrå til Folkeregisteret når dei flyttar. Dei held dermed fram med å betala skatt til den kommunen dei ikkje lenger reelt sett bur i. Dette får direkte økonomiske konsekvensar for dei kommunane det gjeld.
Som eit eksempel kan ein nemna at for ein kommune som Flå i Buskerud kan dette vera eit stort problem. Ein innbyggjar i Flå kommune gjev i gjennomsnitt 70 000 kroner i skatt og rammetilskot for kommunen. Tredve uregistrerte innbyggjarar vil gje det utslag at Flå kommune mottek vel 2 mill. kroner mindre i overføringar frå staten.
Beredskapsmessig utgjer det også ein trussel ved ei større hending der ein er avhengig av å vite kvar og kor mange som bur i kommunen.
Tidligare hadde Folkeregisteret kontor i kvar enkelt kommune, noko som gjorde at lokalkunnskapen var god, og at det var lettare å føreta kontroll med gjeldande regelverk.