Fredric Holen Bjørdal (A): Beredskapsutfordringane for Stranda og kommunane rundt er unike i norsk samanheng. Det er stor fare for at det ustabile fjellpartiet ved Åknes kjem til å rase, noko som vil få katastrofale følgjer.
Ser statsråden behovet for ein ekstraordinær statleg innsats og garanti for å redusere dei økonomiske konsekvensane for særleg Stranda kommune knytt til langvarig og gjentatt evakuering, beredskap og sikringstiltak, eller meiner statsråden at kommunane må bere dette ansvaret åleine?
Begrunnelse
Nye og oppdaterte prognoser viser at når raset går vil det utløyse ei flodbølgje med ei bølgjehøgd på over 80 meter, og evakueringssonene må utvidast frå sonene i gjeldande beredskapsplanar. Det tyder mellom anna at kommunane no får problem med å finne trygge lokalitetar til evakuering.
Det vil vere økonomisk svært utfordrande for desse kommunane å handtere utgiftene ved langvarig og gjentatt evakuering av heile lokalsamfunn slik det her kan bli tale om. Sjølv om staten etter søknad ofte tek ein del av rekninga ved naturskadar, er det her tale om ein heilt unik situasjon der heile lokalsamfunn vil bli avstengde ved heving av beredskapsnivået, og utsletta og raserte når raset går.
Spørsmålet er om statsråden meiner denne situasjonen er så unik i nasjonal samanheng at det kan vere mogleg for staten å stille opp med ekstraordinær bistand når det blir aktuelt og garantiar (utover allereie finansiert overvaking av fjellpartiet), som reduserer konsekvensane av raset, syt for deling av utgifter til evakuering, risikoreduksjon gjennom bistand til flytting av prekær infrastruktur og så vidare.