Spørsmål

Kjersti Toppe (Sp): Vil statsråden ta initiativ til å ein klar strategi i NAV for auka bruk av Inn på tunet som arbeidstreningstiltak, der det er i mykje større grad blir praksis at Inn på tunet- tilbydarar kan inngå direkte og langsikitige avtalar med det lokale NAV-kontoret for å yte arbeidstreningstiltak for personar som fell utanfor utdanning- og arbeidsliv, og kan statsråden gje ei oversikt over kor mange avtalar NAV i dag har med Inn-på tunet gardar fordelt på fylke, og utviklinga siste åra?

Svar

Anniken Hauglie: Inn på tunet er tilrettelagde og kvalitetssikra velferdstenester på gardsbruk. Tenestene skal gje meistring, utvikling og trivsel. Grønt arbeid er tilbodet til NAV innanfor Inn på tunet.
Grønt arbeid er eit arbeidsretta tilbod retta mot menneske med psykiske helseproblem eller rusmiddelproblem. Tilbodet blir gjennomført hovudsakleg innanfor ramma av arbeidsmarknadstiltaket arbeidsførebuande trening. Arbeidsførebuande trening blir gjennomført av skjerma verksemder som er godkjende av NAV. Tiltaket arbeidsførebuande trening har bestemte krav til organisering, innhald og kompetanse, jf. forskrift om arbeidsmarknadstiltak. Dette er krav som det vil vere vanskeleg å oppfylle for den einskilde gardbrukaren. Inn på tunet gardar som ønskjer å tilby Grønt arbeid, kan gjere dette som underleverandør til ei skjerma verksemd.
NAV er ansvarleg for oppretting og oppfølging av Grønt arbeid-tiltaka. Det ligg innanfor det lokale handlingsrommet til NAV å fastsetje omfanget av ulike arbeidsretta tilbod. Føresetnaden for ei etablering av Grønt arbeid er at det lokalt er eit brukarbehov for denne typen tilrettelagde tiltaksplassar. Det må og finnast statlege tiltaksplassar, og ein eller fleire godkjende skjerma verksemder som kan stå ansvarlege for tiltaket. Til slutt må det vere gardsbruk som kan tilby ei formålstenleg ramme for Grønt arbeid.
Arbeids- og velferdsdirektoratet jobbar med å revidere rettleiaren og avtalen om Grønt arbeid, der det er lagt opp til ein brei prosess med medverknad frå alle partar i saka.
Departementet har henta inn tal frå Arbeids- og velferdsdirektoratet som gjev ei oversikt over avtalar fordelt på fylke for 2013 og 2015. Det manglar tal for tre av fylka (Vest-Agder, Møre og Romsdal og Troms) For dei øvrige fylka var summen av avtaler 23 både i 2013 og 2015. Direktoratet jobbar med ei oversikt og revidering av eksisterande avtalar for 2018 og rekner da med å få ein fullstendig oversikt over talet på avtaler for heile landet.

Tilleggsvar 02.07.18:

Lenke til tilleggsvar med tabell i pdf-format